Read Kodava 1 ಯೋಹಾನ 1 Bible Online

1 ಯೋಹಾನ 1 - Kodava bible

1 ಯೋಹಾನ 1

¹ನಂಗ ನಿಂಗಕ್ ಒಳ್‍ದ್‍ವ ಜೀವತ್‍ರ ತಕ್ಕ್‌ರ ವಿಷಯ ಆದಿಯಿಂಜಲೆ ಬಂದದ್. ಅದ್‍ನ ನಂಗ ನಂಗಡ ಕೆಮಿಲ್ ಕ್‍ೕಟಿತ್ ಕಣ್ಣಾರೆ ಕಂಡಿತುಂಡ್; ಅಕ್ಕು, ನಂಗ ಅದ್‍ನ ನೋಟಿತ್, ನಂಗಡ ಕೈಯಿಂಜ ಮುಟ್ಟಿತುಂಡ್.

²ಆ ಜೀವ ಕಾಂಬಕಾಚಿ, ನಂಗ ಅದ್‍ನ ಕಂಡಿತ್ ಸಾಕ್ಷಿ ತಪ್ಪ. ಆನಗುಂಡ್, ನಂಗಕ್ ಗೊತ್ತ್ ಮಾಡಿತ್ ಅರಿಚಿಟ್ಟ ಅಪ್ಪನಾನ ದೇವಡ ಕೂಡೆ ಇಂಜ ನಿತ್ಯ ಜೀವತ್‍ರ ವಿಷಯತ್‍ನ ನಿಂಗಕ್ ಎಣ್ಣ್‌ವಿ.

³ಅಪ್ಪಂಡ ಪಿಂಞ ಮೋಂವೊನಾನ ಯೇಸು ಕ್ರಿಸ್ತಂಡಲ್ಲಿ ನಂಗಕ್ ಉಳ್ಳ ಐಕ್ಯತ್‍ಲ್ ನಿಂಗಳು ಕೂಡಂಡೂಂದ್ ನಂಗ ಕಂಡಾನ ಕ್‍ೕಟಾನ ನಿಂಗಕ್ ಎಣ್ಣಿ ತಪ್ಪ.

⁴ನಂಗಡ ಈ ಸಂತೋಷ ಪೂರ್ತಿ ಆಂಡೂಂದ್ ನಿಂಗಕ್ ಒಳ್‍ದ್‍ವ.

⁵ದೇವ ಬೊಳಿಯಾಯಿತುಂಡ್. ಅಂವೊಂಡಲ್ಲಿ ಇರ್‌ಟ್‌ಂದ್ ಎಣ್ಣ್‌ವದೇ ಇಲ್ಲೆ; ಇದ್ ನಂಗ ಯೇಸು ಕ್ರಿಸ್ತಯಿಂಜ ಕ್‍ೕಟಗುಂಡ್, ನಿಂಗಕ್ ಅರಿಚಿಟ್ಟಡುಂಡ್.

⁶ನಂಗ ದೇವಡ ಕೂಡೆ ಐಕ್ಯತ್‍ಲ್ ಉಂಡ್‍ೕಂದ್ ಎಣ್ಣ್‌ಚೇಂಗಿಯು, ಇರ್‌ಟ್‌ಲ್ ನಡ್‍ಪಯಿಂಗಳಾಯಿತುಂಡೇಂಗಿ ನಂಗ ಸತ್ಯತ್‍ಲ್ ನಡ್‍ಕತೆ ಪೊಟ್ಟ್ ಪರಿಯುವಂಗಳಾಯಿತುಂಡ್.

⁷ಆಚೇಂಗಿ, ದೇವ ಬೊಳಿಲ್ ಉಳ್ಳನೆಕೆ ನಂಗಳು ಬೊಳಿಳ್ ನಡ್ಂದತೇಂಗಿ, ಅಕ್ಕ ನಂಗ ಒಬ್ಬೊಬ್ಬಂಡ ಕೂಡೆ ಐಕ್ಯತ್‍ಲ್ ಉಂಡ್‍ೕಂದ್ ಆಪ; ದೇವಡ ಮೋಂವೊನಾನ ಯೇಸು ಕ್ರಿಸ್ತಂಡ ಚೋರೆ ನಂಗಡ ಸಕಲ ಪಾಪತ್‍ನ ಶುದ್ದ ಮಾಡ್‌ವ.

⁸ಆಚೇಂಗಿ ನಂಗ ನಂಗಡಲ್ಲಿ ಪಾಪ ಇಲ್ಲೇಂದ್ ಎಣ್ಣ್‌ಚೇಂಗಿ ನಂಗಳ ನಂಗಳೇ ಮೋಸ ಮಾಡ್‌ವನೆಕೆ. ಅಕ್ಕ ಸತ್ಯ ನಂಗಡ ಒಳ್‍ಲ್ ಇಲ್ಲೆ.

⁹ನಂಗ ನಂಗಡ ಪಾಪತ್‍ನ ನೇರಾಯಿತ್ ಅಂವೊಂಡ ಪಕ್ಕ ಒತ್ತಂಡತೇಂಗಿ, ದೇವ ಅಂವೊಂಡ ತಕ್ಕ್‌ನ ಮೀರತೆ, ನಂಗಡ ಪಾಪತ್‍ನ ಮನ್ನಿಚಿಟ್ಟಿತ್ ನಂಗಡಲ್ಲಿ ಉಳ್ಳ ಸಕಲ ಕೆಟ್ಟ ಗುಣತ್‍ನ ಶುದ್ದ ಮಾಡ್‌ವಕ್ ಅಂವೊ ನೀತಿವಂತಂವೊನಾಯಿತ್ ಉಂಡ್.

¹⁰ನಂಗ ಪಾಪ ಮಾಡಿತ್‌ಲ್ಲೇಂದ್ ಎಣ್ಣ್‌ಚೇಂಗಿ ದೇವನ ನಂಗ ಪೊಟ್ಟ್‌ಪರಿಯುಂವೊನಾಯಿತ್ ಮಾಡ್‌ವನೆಕೆ. ಅಂವೊಂಡ ವಾಕ್ಯ ನಂಗಡಲ್ಲಿ ಇಲ್ಲೆ.