Read Kodava 1 ಯೋಹಾನ 2 Bible Online

1 ಯೋಹಾನ 2 - Kodava bible

1 ಯೋಹಾನ 2

¹ನಾಡ ಪ್ರೀತಿರ ಮಕ್ಕಳೇ, ನಿಂಗ ಪಾಪ ಮಾಡತೆ ಇಪ್ಪಕಾಯಿತ್ ನಾನ್ ನಿಂಗಕ್ ಇದ್‍ನ ಒಳ್‍ದ್‍ವಿ. ಅನ್ನನೆ ದಾರೇಂಗಿ ಪಾಪ ಮಾಡ್‍ಚೇಂಗಿ, ನಂಗಕಾಯಿತ್ ಅಪ್ಪನಾನ ದೇವಡ ಪಕ್ಕ ಬೋಡ್‍ವಕ್ ಮದ್ಯಸ್ತ ಒಬ್ಬ ಉಂಡ್. ಆ ಮದ್ಯಸ್ತ, ನೀತಿವಂತಂವೊನಾನ ಯೇಸು ಕ್ರಿಸ್ತ.

²ಅಂವೊನೇ ನಂಗಡ ಪಾಪತ್‍ನ ಪರಿಹಾರ ಮಾಡ್‌ವ ಬಲಿ ಅರ್ಪಣೆ. ನಂಗಡ ಪಾಪಕಾಯಿತ್ ಮಾತ್ರ ಅಲ್ಲ, ಲೋಕತ್‍ಲ್ ಉಳ್ಳ ಎಲ್ಲಾ ಜನಡ ಪಾಪಕು ತ್ಯಾಗ ಅರ್ಪಣೆಯಾಯಿತುಂಡ್.

³ದೇವಡ ಆಜ್ಞೆನ ಮೀರತೆ ನಡ್ಂದತೇಂಗಿ, ಅಂವೊನ ನಂಗಕ್ ಗುತ್ತುಂಡ್‍ೕಂದ್ ದೃಡವಾಯಿತ್ ನಂಗಕ್ ಗೊತ್ತಾಪ.

⁴ಒಬ್ಬ, ನಾಕ್ ದೇವನ ಗೊತ್ತುಂಡ್‍ೕಂದ್ ಎಣ್ಣ್‌ಚೇಂಗಿಯು, ಅಂವೊಂಡ ಆಜ್ಞೆರ ಪ್ರಕಾರ ನಡ್‍ಕತೆ ಪೋಚೇಂಗಿ, ಅಂವೊ ಪೊಟ್ಟ್ ಪರಿಯುಂವೊನಾಯಿತುಂಡ್, ಅಂವೊಂಡ ಪಕ್ಕ ಸತ್ಯ ಇಲ್ಲೆ.

⁵ಆಚೇಂಗಿ ದಾರ್ ಅಂವೊಂಡ ತಕ್ಕ್‌ನ ಮೀರತೆ ನಡ್‍ಪ, ನೇರಾಯಿತ್ ಅಂವೊಂಡಲ್ಲಿ ದೇವಡ ಪ್ರೀತಿ ಪೂರ್ತಿಯಾಯಿತ್‌ಪ್ಪ. ಅನ್ನನೆ ಮಾಡ್‍ಚೇಂಗಿ ಮಾತ್ರ ನಂಗ ದೇವಡ ಕೂಡೆ ಐಕ್ಯತ್‍ಲ್ ಉಂಡ್‍ೕಂದ್ ಗೊತ್ತಾಪ.

⁶ದಾರೇಂಗಿ ನಾನ್ ದೇವಡ ಐಕ್ಯತ್‍ಲ್ ಉಳ್ಳ್‌ಂದ್ ಎಣ್ಣ್‌ಚೇಂಗಿ, ಅಂವೊನು ಯೇಸು ಕ್ರಿಸ್ತ ನಡ್ಂದನೆಕೆ ನಡ್‌ಕಂಡು.

⁷ಪ್ರೀತಿರ ಮಕ್ಕಳೇ, ನಾನ್ ನಿಂಗಕ್ ಒಳ್‍ದಿಯಂಡುಳ್ಳ ಈ ಆಜ್ಞೆ ಪುದಿಯದಲ್ಲ. ಇದ್ ಪಳೆಯದೇ. ಆದಿಯಿಂಜಲೆ ನಿಂಗಕ್ ಇಂಜದ್. ಪಳೆಯ ಆಜ್ಞೆನ ನಿಂಗ ಮಿಂಞಲೇ ಕ್‍ೕಟಿತುಳ್ಳಿರ.

⁸ಆಚೇಂಗಿ, ನಾನ್ ನಿಂಗಕ್ ಒಳ್‍ದ್‍ವ ಪುದಿಯ ಆಜ್ಞೆ ಎನ್ನಂಗೆಣ್ಣ್‌ಚೇಂಗಿ, ಇದ್ ಯೇಸುರಲ್ಲಿ ಪಿಂಞ ನಿಂಗಡಲ್ಲಿ ಸತ್ಯವಾಯಿತುಂಡ್. ಎನ್ನನೆ ಎಣ್ಣ್‌ಚೇಂಗಿ ಇರ್‌ಟ್ ಪೋಯಂಡುಂಡ್, ನೇರಾನ ಬೊಳಿ ಇಕ್ಕಲೆ ಮಿನ್ನಿಯಂಡಂಡು.

⁹ದಾರೇಂಗಿ ಒಬ್ಬ, ನಾನ್ ಬೊಳಿಲ್ ಉಳ್ಳ್‌ಂದ್ ಎಣ್ಣಿತ್, ಇಂಞು ಅಣ್ಣತಮ್ಮಣಂಗಳ ದ್ವೇಶ ಮಾಡ್‍ಚೇಂಗಿ ಅಂವೊ ಇಂಞು ಇರ್‌ಟ್‌ಲ್ ಉಂಡ್.

¹⁰ದಾರೇಂಗಿ ಒಬ್ಬ ಅಂವೊಂಡ ಅಣ್ಣತಮ್ಮಣಂಗಳ ಪ್ರೀತಿ ಮಾಡ್‍ಚೇಂಗಿ ಅಂವೊ ಬೊಳಿಲ್ ಉಂಡ್; ಪಾಪ ಮಾಡ್‌ವಕ್ ಕಾರಣವಾಯಿತ್‌ಪ್ಪದ್ ಏದು ನಿಂಗಡ ಪಕ್ಕ ಇಪ್ಪುಲೆ.

¹¹ಆಚೇಂಗಿ ಒಬ್ಬ ಅಂವೊಂಡ ಅಣ್ಣತಮ್ಮಣಂಗಕ್ ವಿರೋದ ಮಾಡ್‍ಚೇಂಗಿ ಅಂವೊ ಇರ್‌ಟ್‌ಲ್ ಇಂಜಂಡ್ ಇರ್‌ಟ್‌ಲೇ ನಡ್ಂದಂಡುಂಡ್. ಇರ್‌ಟ್ ಅಂವೊಂಡ ಕಣ್ಣ್‌ನ ಕಾಂಗತನೆಕೆ ಮಾಡ್‍ನಗುಂಡ್, ಅಂವೊ ಎಲ್ಲಿಕ್ ಪೋಪಾಂದ್ ಗೊತ್ತಿಪ್ಪುಲೆ.

¹²ಪ್ರೀತಿರ ಚೆರಿಯ ಮಕ್ಕಳೇ, ಕ್ರಿಸ್ತಂಡ ಪೆದತ್‍ರಗುಂಡ್ ನಿಂಗಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ನಗುಂಡ್ ನಿಂಗಕ್ ಇದ್‍ನ ಒಳ್‍ದ್‍ವಿ.

¹³ಅಪ್ಪಂಗಳೇ, ಆದಿಯಿಂಜಲೆ ಕ್ರಿಸ್ತ ಯೇಸುನ ನಿಂಗಕ್ ಗೊತ್ತಾನಗುಂಡ್ ನಾನ್ ಇದ್‍ನ ನಿಂಗಕ್ ಒಳ್‍ದ್‍ವಿ. ಬಾಲೆಕಾರಳೇ ನಿಂಗ ಕೆಟ್ಟಂವೊನಾನ ಸೈತಾನನ ಗೆದ್ದಗುಂಡ್ ನಾನ್ ಇದ್‍ನ ನಿಂಗಕ್ ಒಳ್‍ದ್‍ವಿ.

¹⁴ಅಪ್ಪಂಗಳೇ, ಆದಿಯಿಂಜಲೆ ಯೇಸು ಕ್ರಿಸ್ತನ ನಿಂಗಕ್ ಗೊತ್ತಾನಗುಂಡ್ ನಾನ್ ಇದ್‍ನ ನಿಂಗಕ್ ಒಳ್‍ದಿಯೆ. ಬಾಲೆಕಾರಂಗಳೇ ನಿಂಗ ಬಲಶಾಲಿಯಾಯಿತ್ ಉಳ್ಳಿರ, ದೇವಡ ವಾಕ್ಯ ನಿಂಗಡಲ್ಲಿ ಉಳ್ಳಗುಂಡ್ ಪಿಂಞ ನಿಂಗ ಸೈತಾನನ ಗೆದ್ದಗುಂಡ್ ನಾನ್ ಇದ್‍ನ ನಿಂಗಕ್ ಒಳ್‍ದಿಯೆ.

¹⁵ಈ ಲೋಕತ್‍ರ ಕೆಟ್ಟ ರೀತಿನ ಪಿಂಞ ಲೋಕತ್‍ಲ್ ಉಳ್ಳಾನ ಪ್ರೀತಿಮಾಡತಿ. ನಿಂಗ ಈ ಲೋಕತ್‍ನ ಪ್ರೀತಿ ಮಾಡ್‍ಚೇಂಗಿ, ಅಪ್ಪನಾನ ದೇವಡ ಪ್ರೀತಿ ನಿಂಗಡಲ್ಲಿ ಇಲ್ಲೆ.

¹⁶ಎನ್ನಂಗೆಣ್ಣ್‌ಚೇಂಗಿ ತಡೀನ ಕುಶಿಪಡ್‌ತ್‌ವ ಆಸೆ, ನೋಟ್‌ವಾನೆಲ್ಲ ಬೋಂಡೂಂದ್ ಉಳ್ಳ ಆಸೆ, ಆಸ್ತಿರ ಹೆಮ್ಮೆ ಇದ್ ಏದು ದೇವನಾನ ಅಪ್ಪಂಡಿಂಜ ಬಪ್ಪುಲೆ. ಇದೆಲ್ಲ ಲೋಕತ್ಂಜ ಬಪ್ಪದೇ.

¹⁷ಲೋಕವು ಅದ್ಂಡ ಇಚ್ಛೆಯು ಕಾಂಗತಾಯಿ ಪೋಪ, ಆಚೇಂಗಿ ದೇವಡ ಚಿತ್ತತ್‍ರನೆಕೆ ನಡ್‌ಪಂವೊ ಎಕ್ಕಲೂ ಬದ್‍ಕ್‍ವ.

¹⁸ನಾಡ ಮಕ್ಕಳೇ ಕಡೆ ಕಾಲ ಬೆರಿಯ ಬಂದಂಡುಂಡ್! ಅಕ್ಕ, ನಾನೇ ಕ್ರಿಸ್ತಾಂದ್ ಪೊಟ್ಟ್ ಪರಿಯುವಂವೊ ಬಪ್ಪಾಂದ್ ಅಕ್ಕ ಕ್‍ೕಟಿತುಳ್ಳಿರ, ಆಚೇಂಗಿ ಇಕ್ಕಲೆ ಕಳ್ಳ ಕ್ರಿಸ್ತಂಗ ಬಂದಿತುಂಡ್. ಅಂದಕ ಇದ್ ಕಡೆ ಕಾಲಾಂದ್ ನಂಗಕ್ ಗೊತ್ತಾಪ.

¹⁹ಈ ಜನ ನಂಗಡ ಕೂಡೆ ಐಕ್ಯ ಉಳ್ಳಯಿಂಗಳಾಯಿತ್ ಇಂಜಿತಿಲ್ಲೆ, ಅದ್ಂಗೇ ಅಯಿಂಗ ನಂಗಳ ಬುಟ್ಟಿತ್ ಪೋಚಿ. ಅಯಿಂಗ ನಂಗಡ ಜನಾಂಗಾಯಿತ್ ಇಂಜಿತೇಂಗಿ ಅಯಿಂಗ ನಂಗಡ ಕೂಡೆ ಇಪ್ಪಕಿಂಜತ್. ಆಚೇಂಗಿ ಅಯಿಂಗ ನಂಗಳ ಬುಟ್ಟಿತ್ ಪೋನಗುಂಡ್, ಒಬ್ಬ ಕೂಡೆ ನಂಗಡ ಜನ ಇಲ್ಲೇಂದ್ ಗೊತ್ತಾಚಿ.

²⁰ಆಚೇಂಗಿ, ನಿಂಗ ಅನ್ನನೆ ಇಲ್ಲೆ, ಕ್ರಿಸ್ತ ನಿಂಗಳ ಪವಿತ್ರಾತ್ಮತ್‍ಲ್ ಅಬಿಷೇಕ ಮಾಡ್‍ನಗುಂಡ್ ನಿಂಗಕ್ ಸತ್ಯ ಏದ್‍ೕಂದ್ ಗೊತ್ತುಂಡ್.

²¹ಆನಗುಂಡ್, ನಿಂಗಕ್ ಸತ್ಯ ಎಂತ್‍ೕಂದ್ ಗೊತ್ತ್‌ಲ್ಲೇಂದ್ ಅಲ್ಲ, ಆಚೇಂಗಿ ನಿಂಗಕ್ ಸತ್ಯ ಗೊತ್ತುಳ್ಳಗುಂಡು, ಏದ್ ಪೊಟ್ಟೂ ಸತ್ಯತ್ಂಜ ಪುಟ್ಟ್‌ನದ್ ಅಲ್ಲಾಂದ್ ಗೊತ್ತುಳ್ಳಗುಂಡ್ ನಾನ್ ಒಳ್‍ದ್‍ವಿ.

²²ಯೇಸುನ, ದೇವ ಗೊತ್ತ್ ಮಾಡ್‍ನ ರಾಜನಾನ ಕ್ರಿಸ್ತ[1] ಅಲ್ಲಾಂದ್ ಎಣ್ಣ್‌ವಂವೊನಲ್ಲತೆ ಬೋರೆ ದಾರ್ ಪೊಟ್ಟ್ ಪರಿಯುವಂವೊ? ಅನ್ನನೆ ಪೊಟ್ಟ್ ಪರಿಯುವಂವೊನೇ ಕಳ್ಳ ಕ್ರಿಸ್ತ. ಅಂವೊನೇ ಅಪ್ಪನಾನ ದೇವ ಪಿಂಞ ಮೋಂವೊನಾನ ಯೇಸು ಕ್ರಿಸ್ತನ ಗೊತ್ತಿಲ್ಲೇಂದ್ ಎಣ್ಣ್‌ವಂವೊ.

²³ದಾರ್ ಮೋಂವೊನ ಅಲ್ಲಗೆಳೆಯುವ ಅಂವೊ ಅಪ್ಪನ ಅಲ್ಲಗೆಳೆಯುವ. ದಾರ್ ಮೋಂವೊನ ಸ್ವೀಕಾರ ಮಾಡ್‌ವ ಅಂವೊಂಡ ಕೂಡೆ ಅಪ್ಪ ಉಂಡ್‍ೕಂದ್ ಗೊತ್ತಾಪ.

²⁴ನಿಂಗ ಏದ್ ಉಪದೇಶತ್‍ನ ಆದಿಯಿಂಜ ಕ್‍ೕಟಿತುಳ್ಳಿರ ಅದ್ ನಿಂಗಡಲ್ಲಿ ಎಕ್ಕಾಲು ಇರಂಡು. ಆದಿಯಿಂಜ ನಿಂಗ ಕ್‍ೕಟದ್, ನಿಂಗಡಲ್ಲಿ ಇಂಜತೇಂಗಿ, ನಿಂಗ ಅಪ್ಪನಾನ ದೇವಡ ಕೂಡೆ ಪಿಂಞ ಅಂವೊಂಡ ಮೋಂವೊಂಡ ಕೂಡೆ ಉಳ್ಳ ಐಕ್ಯತ್‍ಲ್ ಎಕ್ಕಾಲು ಬದ್‍ಕ್‍ವಿರ.

²⁵ಈ ಐಕ್ಯವೇ ಕ್ರಿಸ್ತ ನಿಂಗಕ್ ತಪ್ಪೀಂದ್ ವಾಗ್ದಾನ ಮಾಡ್‍ನ ನಿತ್ಯ ಜೀವ.

²⁶ನಿಂಗಳ ವಂಚನೆ ಮಾಡ್‌ವ ಜನಡ ವಿಷಯತ್‍ಲ್ ಇದ್‍ನ ನಾನ್ ನಿಂಗಕ್ ಒಳ್‍ದ್‍ವಿ.

²⁷ಆಚೇಂಗಿ ನಿಂಗಡ ವಿಷಯತ್‍ಲ್, ಕ್ರಿಸ್ತ ನಿಂಗಳ ಪವಿತ್ರ ಆತ್ಮತ್‍ಲ್ ಅಬಿಷೇಕ ಮಾಡಿತುಂಡ್. ಅಂವೊಂಡ ಅಬಿಷೇಕ ನಿಂಗಡಲ್ಲಿ ಉಳ್ಳಗುಂಡ್, ದಾರೂ ನಿಂಗಕ್ ಉಪದೇಶ ಮಾಡ್‌ವ ಅವಸ್ಯ ಇಲ್ಲೆ, ಅಂವೊಂಡ ಆತ್ಮ ಎಲ್ಲಾ ವಿಷಯತ್‍ನ ನಿಂಗಕ್ ಬೋದನೆ ಮಾಡ್‌ವ. ಅಂವೊ ಮಾಡ್‌ವ ಬೋದನೆಯೆಲ್ಲ ಸತ್ಯ, ಅದ್‍ಲ್ ಪೊಟ್ಟ್ ಇಲ್ಲೆ. ಆನಗುಂಡ್, ಅಂವೊ ನಿಂಗಕ್ ಉಪದೇಶ ಮಾಡ್‍ನ ಪ್ರಕಾರ ನಡ್‌ಂದಿತ್ ಕ್ರಿಸ್ತಂಡ ಕೂಡೆ ಐಕ್ಯ ಉಳ್ಳಯಿಂಗಳಾಯಿತಿರಿ.

²⁸ಇಕ್ಕ, ನಾಡ ಪ್ರೀತಿರ ಚೆರಿಯ ಮಕ್ಕಳೇ, ಅಂವೊ ಈ ಲೋಕಕ್ ಪ್ರತ್ಯಕ್ಷ ಆಪ ದಿವಸತ್‍ಲ್ ನಂಗ ಅಂವೊಂಡ ಮಿಂಞತ್‍ಲ್ ಒರ್ ಞಾಣ ಇಲ್ಲತೆ ದೈರ್ಯತ್‍ಲ್ ನಿಪ್ಪಕ್ ಅಂವೊಂಡ ಕೂಡೆ ಒಂದಾಯಿತ್ ಇರಂಡು.

²⁹ಕ್ರಿಸ್ತ ನೀತಿವಂತಂವೊನೇಂದ್ ನಿಂಗಕ್ ಗೊತ್ತಾನಗುಂಡ್, ನೀತಿಲ್ ನಡ್‍ಪಯಿಂಗೆಲ್ಲಾ ದೇವಡ ಮಕ್ಕಾಂದ್ ನಿಂಗಕ್ ಗೊತ್ತಿರಂಡು.