Read Kodava 1 ಯೋಹಾನ 5 Bible Online

1 ಯೋಹಾನ 5 - Kodava bible

1 ಯೋಹಾನ 5

¹ದಾರೆಲ್ಲ ಯೇಸುನ ಕ್ರಿಸ್ತಾಂದ್ ನಂಬುವ ಅಯಿಂಗ ಎಲ್ಲಾ ದೇವಡ ಮಕ್ಕ. ಅಪ್ಪನ ದಾರೆಲ್ಲ ಪ್ರೀತಿ ಮಾಡ್‌ವ, ಅಯಿಂಗ ಅಂವೊಂಡ ಮಕ್ಕಳ ಸಹ ಪ್ರೀತಿಚಿಡುವ.

²ದೇವನ ಪ್ರೀತಿ ಮಾಡಿತ್ ಅಂವೊ ಕೊಡ್‍ತ ಆಜ್ಞೆರ ಪ್ರಕಾರ ನಡ್ಂದತೇಂಗಿ ನಂಗ ದೇವಡ ಮಕ್ಕಳ ಪ್ರೀತಿ ಮಾಡ್‌ವಾಂದ್ ಗೊತ್ತಾಪ.

³ದೇವಡ ಆಜ್ಞೆರನೆಕೆ ನಡ್ಂದತೇಂಗಿ ಅಂವೊನ ಪ್ರೀತಿ ಮಾಡ್‌ವನೆಕೆ. ಪಿಂಞ ಅಂವೊಂಡ ಆಜ್ಞೆನ ಮಾಡ್‌ವಕ್ ನಂಗಕ್ ದುಂಬ ಕಷ್ಟವಾಯಿತ್‌ಪ್ಪುಲೆ.

⁴ಎನ್ನಂಗೆಣ್ಣ್‌ಚೇಂಗಿ ದೇವಡ ಮಕ್ಕ ಎಲ್ಲಾರು ಈ ಲೋಕತ್‍ನ ಗೆಲ್ಲುವ. ದೇವಡ ಮೇಲೆ ಬೆಚ್ಚ ನಂಬಿಕೆಯಿಂಜಲೇ ನಂಗ ಈ ಲೋಕತ್‍ನ ಗೆದ್ದತ್.

⁵ಯೇಸು ದೇವಡ ಮೋಂವೋಂದ್ ನಂಬ್‌ನಯಂಗಳ ಅಲ್ಲತೆ ಈ ಲೋಕತ್‍ನ ಗೆಲ್ಲ್‌ವದ್ ಬೋರೆ ದಾರ್?

⁶ಯೇಸು ಕ್ರಿಸ್ತನಾನ ಇಂವೊನೇ ನೀರ್ಂಜಲು ಚೋರೆಯಿಂಜಲು ಬಂದಂವೊ. ನೀರ್ಂಜ ಮಾತ್ರವಲ್ಲ, ನೀರ್ಂಜಲು ಪಿಂಞ ಚೋರೆಯಿಂಜಲು ಬಂದಂವೊ. ಪವಿತ್ರಾತ್ಮನಾನಂವೊನೇ ಇದ್ ಸತ್ಯಾಂದ್ ಸಾಕ್ಷಿ ಕೊಡ್‍ತಂಡುಂಡ್. ಎನ್ನಂಗೆಣ್ಣ್‌ಚೇಂಗಿ ದೇವಡ ಆತ್ಮ ಸತ್ಯವುಳ್ಳಂವೊ.

⁷ಪರಲೋಕತ್‍ಲ್ ಸಾಕ್ಷಿ ತಪ್ಪಯಿಂಗ ಮೂಂದಾಳ್: ಪವಿತ್ರಾತ್ಮ, ನೀರ್ ಪಿಂಞ ಚೋರೆ.[2]

⁸ಮೂಂದಾಳು ಒರೇ ತರತ್‍ಲ್ ಸಾಕ್ಷಿ ಕೊಡ್‍ಪ.

⁹ನಂಗ ಮನುಷ್ಯಂಡ ಸಾಕ್ಷಿನ ನಂಬುವ. ಆಚೇಂಗಿ ದೇವಡ ಸಾಕ್ಷಿ ಎಲ್ಲಾಗಿಂಜ ವಿಶೇಷವಾಯಿತುಳ್ಳಗುಂಡ್ ಅದ್‍ನ ಎಚ್ಚಕ್ ನಂಬಂಡು! ದೇವ ತಾಂಡ ಮೋಂವೊಂಡ ವಿಷಯತ್ ಎಣ್ಣ್‌ನ ಸಾಕ್ಷಿ ಇದ್.

¹⁰ಆನಗುಂಡ್ ದೇವಡ ಮೋಂವೊಂಡಲ್ಲಿ ನಂಬಿಕೆ ಇಟ್ಟಿತುಳ್ಳಯಿಂಗಡ ಹೃದಯತ್‍ಲ್ ಈ ಸಾಕ್ಷಿ ಉಂಡ್. ಆಚೇಂಗಿ ದಾರೆಲ್ಲಾ ದೇವನ ನಂಬುಲೆಯೋ ಅಯಿಂಗ ಅಂವೊನ ಪೊಟ್ಟ್‌ಮಾರಿಯಾಯಿತ್ ಮಾಡಿಯಂಡುಂಡ್. ಎನ್ನನೆ ಎಣ್ಣ್‌ಚೇಂಗಿ ದೇವ ತಾಂಡ ಮೋಂವೊಂಡ ವಿಷಯತ್‍ಲ್ ಎಣ್ಣ್‌ನ ಸಾಕ್ಷಿನ ಅಯಿಂಗ ನಂಬಿತ್‌ಲ್ಲೆ.

¹¹ಆ ಸಾಕ್ಷಿ ಎಂತ್‍ೕಂದ್ ಎಣ್ಣ್‌ಚೇಂಗಿ ದೇವ ನಂಗಕ್ ನಿತ್ಯ ಜೀವತ್‍ನ ತಾತ್. ಈ ಜೀವ ದೇವಡ ಮೋಂವೊಂಡಿಂಜ ಬಂದದ್.

¹²ಅಕ್ಕ, ದಾಡ ಒಳ್‍ಲ್ ದೇವಡ ಮೋಂವೊ ಉಂಡೋ ಅಯಿಂಗಕ್ ನಿತ್ಯ ಜೀವ ಉಂಡ್. ದಾಡ ಒಳ್‍ಲ್ ದೇವಡ ಮೋಂವೊ ಇಲ್ಲೆ ಅಯಿಂಗಕ್ ನಿತ್ಯ ಜೀವ ಇಲ್ಲೆ.

¹³ನಿಂಗಕ್ ನಿತ್ಯ ಜೀವ ಉಂಡ್‍ೕಂದ್ ಗೊತ್ತಾಪಕಾಯಿತ್, ದೇವಡ ಮೋಂವೊಂಡ ಪೆದತ್‍ರ ಮೇಲೆ ನಂಬಿಕೆ ಬೆಚ್ಚಿತುಳ್ಳ ನಿಂಗಕ್ ನಾನ್ ಇದ್‍ನ ಒಳ್‍ದ್‍ವಿ.

¹⁴ನಂಗ ದೇವಡ ಚಿತ್ತತ್‍ರ ಪ್ರಕಾರ ಎಂತ ಬೋಡ್‍ಚೇಂಗಿಯು ಅಂವೊ ನಂಗಕ್ ಕೆಮಿ ಕೊಡ್‍ಪ. ಇದ್‍ನಗುಂಡ್ ನಂಗಕ್ ಅಂವೊಂಡ ಪ್ರಸನ್ನತ್‌ಲ್ ದೈರ್ಯ ಉಂಡ್.

¹⁵ನಂಗ ಎಂತ ಕ್‍ೕಟತೇಂಗಿಯು ಅಂವೊ ನಂಗಕ್ ಕೆಮಿ ಕೊಡ್‍ಪಾಂದ್ ಗೊತ್ತ್‌ಂಜತೇಂಗಿ, ಅಂವೊಂಡಲ್ಲಿ ನಂಗ ಕ್‍ೕಟದೆಲ್ಲ ಕ್‌ಟ್ಟ್‌ಚೀಂದು ನಂಗಕ್ ಗೊತ್ತುಂಡ್.

¹⁶ಮರಣತ್‌ರ[3] ಬಟ್ಟೇಲ್ ಕಾಕಿಯಂಡ್ ಪೋಕತ ಪಾಪ ಮಾಡಿಯಂಡುಳ್ಳ ತಾಂಡ ಅಣ್ಣತಮ್ಮಣನ ನಿಂಗ ಕಂಡತೇಂಗಿ, ನಿಂಗ ಅಂವೊಂಗ್ ಜೀವ ತಪ್ಪ ದೇವಡ ಪಕ್ಕ ಅಂವೊಂಗಾಯಿತ್ ಬೋಡಂಡು. ಇದ್ ದಾರ್‌ಕ್ ಎಣ್ಣ್‌ಚೇಂಗಿ, ಮರಣತ್‌ರ ಬಟ್ಟೇಲ್ ಕಾಕಿಯಂಡ್ ಪೋಕತ ಪಾಪ ಮಾಡಿಯಂಡುಳ್ಳ ಅಣ್ಣತಮ್ಮಣನಂಗಕ್. ಆಚೇಂಗಿ ಚಾವ್‍ಕ್ ಕಾರಣವಾನ ಪಾಪವು ಉಂಡ್, ಅದ್ಂಗಾಯಿತ್ ನಿಂಗ ದೇವಡ ಪಕ್ಕ ಪ್ರಾರ್ತಥನೆ ಮಾಡಂಡೂಂದ್ ನಾನ್ ಎಣ್ಣುಲೆ.

¹⁷ನಂಗ ಮಾಡ್‌ವ ಎಲ್ಲಾ ತಪ್ಪು ಪಾಪವೇ. ಆಚೇಂಗಿ ಚಾವ್‍ಕ್ ಕಾರಣವಿಲ್ಲತ ಪಾಪವು ಉಂಡ್.

¹⁸ದೇವಡ ಮಕ್ಕ ಪಾಪ ಮಾಡಿಯಂಡೇ ಇಪ್ಪುಲೇಂದ್ ನಂಗಕ್ ಗೊತ್ತುಂಡ್, ಎನ್ನಂಗೆಣ್ಣ್‌ಚೇಂಗಿ ದೇವಡ ಮೋಂವೊ ಅಯಿಂಗಳ ಬದ್ರವಾಯಿತ್ ಕಾಪಾಡ್‌ವ. ಪಿಂಞ ಸೈತಾನ ಅಯಿಂಗಳ ತೊಂದರೆ ಮಾಡ್‌ವಕ್ ಕಯ್ಯುಲೆ.

¹⁹ಇಡಿ ಲೋಕ ಸೈತಾನಂಡ ಕೈಯಿಲ್ ಉಂಡೇಂಗಿಯು, ನಂಗೆಲ್ಲಾ ದೇವಕ್ ಕೂಡ್‍ನಯಿಂಗಾಂದ್ ನಂಗಕ್ ಗೊತ್ತುಂಡ್.

²⁰ದೇವಡ ಮೋಂವೊ ಬಂತ್ ನೇರಾನ ದೇವ ದಾರ್‍ೕಂದ್ ನಂಗಕ್ ಗೊತ್ತಾಪನೆಕೆ ಅರ್ಥ ಮಾಡಿತಾತ್. ಇಕ್ಕ ನಂಗ ಅಂವೊಂಡ ಮೋಂವೊಂಡ ಕೂಡೆ ಐಕ್ಯತ್‍ಲ್ ಬದ್‍ಕಿಯಂಡುಳ್ಳಗುಂಡ್, ನಂಗೆಲ್ಲಾ ನಿತ್ಯ ಜೀವವಾಯಿತುಳ್ಳ ನೇರಾನ ದೇವಡ ಐಕ್ಯತ್‍ಲ್ ಬದ್‍ಕಿಯಂಡುಂಡ್.

²¹ಪ್ರೀತಿರ ಮಕ್ಕಳೇ, ವಿಗ್ರಹತ್ಂಜ ದೂರ ಇಂಜಂಡ್ ನಿಂಗಳ ಕಾಪಾಡಿಯೊಳಿ. ಆಮೆನ್.