Read Kodava 3 ಯೋಹಾನ 1 Bible Online

3 ಯೋಹಾನ 1 - Kodava bible

3 ಯೋಹಾನ 1

¹ಮೂಪನಾನ ನಾನ್, ನೇರಾಯಿತ್ ಪ್ರೀತಿಚಿಡುವ ಪ್ರಿಯ ಗಾಯಂಗ್ ಒಳ್‍ದ್‍ವದ್ ಎಂತ ಎಣ್ಣ್‌ಚೇಂಗಿ,

²ಪ್ರೀತಿರ ಕೂಟ್‌ಕಾರನೇ, ನೀನ್ ಆತ್ಮತ್‍ರ ವಿಷಯತ್‍ಲ್ ಚಾಯಿತೆ ಉಳ್ಳನೆಕೆ, ತಡೀರ ಆರೋಗ್ಯತ್‍ಲ್ ಚಾಯಿ ಇಂಜಿತ್, ಎಲ್ಲಾ ವಿಷಯತ್‍ಲ್ ಚಾಯಿತೆ ಬದ್‍ಕಂಡೂಂದ್ ನಾನ್ ಪ್ರಾರ್ಥನೆ ಮಾಡ್‌ವಿ.

³ಯೇಸುನ ನಂಬ್‍ನಯಿಂಗ ನಾಡ ಪಕ್ಕ ಬಂದಿತ್ ನೀನ್ ಸತ್ಯತ್‍ಲ್ ನಡ್‌ದಂಡ್ ಉಳ್ಳಿಯಾಂದ್ ನೀಡ ನೇರಾನ ವಿಷಯತ್‍ನ ಎಣ್ಣ್‌ವಕ ನಾಕ್ ಪೆರ್ತ್‌ ಕುಶಿ ಆಚಿ.

⁴ನಾಡ ಮಕ್ಕ ಸತ್ಯತ್‍ಲ್ ನಡ್‍ದಂಡುಂಡ್‍ೕಂದ್ ಕ್‍ೕಪಕಿಂಜ ಬಲ್ಯ ಕುಶಿ ನಾಕ್ ಬೋರೆ ಏದು ಇಲ್ಲೆ.

⁵ನಾಡ ಪ್ರೀತಿರ ಕೂಟ್‌ಕಾರನೇ, ನೀನ್ ಯೇಸುನ ನಂಬ್‍ನಯಿಂಗಳ ಸತ್ಕಾರ ಮಾಡಿತ್ ಅಯಿಂಗಕ್ ನಂಬಿಕಸ್ತನಾಯಿತ್ ಸೇವೆ ಮಾಡ್‌ವಿಯ. ಅಯಿಂಗಳ ನೀಕ್ ಗೊತ್ತಿಲ್ಲತೇಂಗಿಯು ಮಾಡ್‌ವಿಯಲ್ಲ.

⁶ನೀನ್ ಕಾಟ್‍ನ ಪ್ರೀತಿನ ಅಯಿಂಗ ಇಲ್ಲಿ ಸಬೇಲ್ ಎಣ್ಣ್‌ಚಿ. ಇಂಞು ಅಯಿಂಗಳ ನೀನ್ ದೇವಡ ಸೇವಕಂಗಕ್ ಯೋಗ್ಯವಾನ ತರತ್‍ಲ್ ನೋಟಿತ್ ಅಯಿಚತೇಂಗಿ ಚಾಯಿಪ್ಪ.

⁷ಎನ್ನಂಗೆಣ್ಣ್‌ಚೇಂಗಿ ಅಯಿಂಗ ಕ್ರಿಸ್ತಂಡ ಮೇಲೆ ನಂಬಿಕೆ ಇಡತಯಿಂಗಡ ಪಕ್ಕ ಒಂದು ಎಡ್‍ಕತೆ, ಕ್ರಿಸ್ತಂಡ ಪೆದಕಾಯಿತ್ ಪೊರಟಿತುಂಡ್.

⁸ಆನಗುಂಡ್ ನಂಗ ಅಯಿಂಗಕ್ ಸಹಾಯ ಮಾಡಂಡು, ಅಕ್ಕ ಅಯಿಂಗ ಮಾಡ್‌ವ ನೇರಾನ ಸೇವೇಲ್ ನಂಗಕ್ ಸಹ ಫಲ ಕ್‍ಟ್ಟ್‌ವ.

⁹ನಾನ್ ಸಬೇಕ್ ಕಾಗದತ್‍ನ ಒಳ್‍ದಿಯೆ. ಆಚೇಂಗಿ ಸಬೇಲ್ ಮುಕ್ಯಸ್ತನಾಯಿತ್‌ಪ್ಪಕ್ ಕುಶಿಯಾಯಿತುಳ್ಳ ದಿಯೊತ್ರೇಫ ನಂಗ ಎಣ್ಣ್‌ನಾನ ಕ್‍ೕಪಕ್ ಮನಸ್ಸಿಲತಂವೊನಾಯಿತುಂಡ್.

¹⁰ಅದ್ಂಗಾಯಿತ್ ನಾನ್ ನಿಂಗಡ ಪಕ್ಕ ಬಂದತೇಂಗಿ ಅಂವೊ ಮಾಡ್‌ವ ಕೆಟ್ಟ ಕೆಲಸತ್‍ನ ನಿಂಗಕ್ ಕಾಟಿತಪ್ಪಿ. ನಂಗಡ ವಿಷಯತ್‍ಲ್, ಎಣ್ಣುವಕ್ಕಾಗತ ಕೆಟ್ಟ ತಕ್ಕ್‌ನ ಅಂವೊ ಪರ್ಂದಂಡುಂಡ್. ಅದ್‍ಲ್ ಅಯಿಂಗ ತೃಪ್ತಿ ಆಕತನೆಕೆ, ಯೇಸುನ ನಂಬ್‍ನಯಿಂಗಳ ಸಬೇಕ್ ಸತ್ಕಾರ ಮಾಡತೆ, ಪಿಂಞ ಬೋರೆ ದಾರೇಂಗಿಯು ಅಯಿಂಗಳ ಸತ್ಕಾರ ಮಾಡ್‍ಚೇಂಗಿ ಅಯಿಂಗಳ ಸಹ ಸಬೇಕ್ ಪೊರಮೆ ಇಟ್ಟಂಡುಂಡ್.

¹¹ನಾಡ ಪ್ರೀತಿರ ಕೂಟ್‌ಕಾರನೇ, ಬೋರೆಯಿಂಗ ಪೋಪ ಕೆಟ್ಟ ಬಟ್ಟೇಲ್ ನೀನು ಪೋಕತೆ, ನಲ್ಲ ಬಟ್ಟೇಲ್ ನಡ್‌ದಂಡ್ ಪೋ. ನಲ್ಲದ್ ಮಾಡ್‌ವಂವೊ ದೇವಡಯಿಂಜ ಪುಟ್ಟ್‌ನಂವೊ. ಕೆಟ್ಟದ್ ಮಾಡ್‌ವಂವೊ ದೇವನ ಕಂಡಿತ್‌ಲ್ಲೆ.

¹²ಎಲ್ಲಾಡಿಂಜ ದೇಮೇತ್ರಿಯಂಗ್ ನಲ್ಲ ಸಾಕ್ಷಿ ಉಂಡ್; ಸತ್ಯತ್‍ಲು ಅಂವೊಂಗ್ ನಲ್ಲ ಸಾಕ್ಷಿ ಉಂಡ್. ನಂಗ ಸಹ ಅಂವೊಂಡ ವಿಷಯತ್‍ಲ್ ಸಾಕ್ಷಿ ತಪ್ಪ, ನಂಗಡ ಸಾಕ್ಷಿ ಸತ್ಯಾಂದ್ ನಿಂಗಕ್ ಗೊತ್ತುಂಡ್.

¹³ನಾಕ್ ಎಣ್ಣುವಕ್ ದುಂಬ ಉಂಡ್. ಆಚೇಂಗಿ ನಾಕ್ ಈ ಕಾಗದತ್‍ಲ್ ಎಲ್ಲಾನ ಒಳ್‍ದ್‍ವಕ್ ಮನಸ್ಸಿಲ್ಲೆ.

¹⁴ನಾನ್ ನಿನ್ನ ಬೆರಿಯ ನೋಟ್‌ವೀಂದ್ ನಂಬಿಕೇಲ್ ಉಳ್ಳ. ಅಕ್ಕ ನಂಗ ಮೂಡ್ ನೋಟಿತ್ ತಕ್ಕ್ ಪರಿಯುಲು.

¹⁵ದೇವಡ ಸಮಾದಾನ ನೀಡ ಕೂಡೆ ಇರಡ್. ನೀಡ ಸ್ನೇಹಿತಂಗೆಲ್ಲ ನೀಕ್ ವಂದನೆ ಎಣ್ಣುವ. ನಂಗಡ ಸ್ನೇಹಿತಂಗಕು ವಂದನೆ ಎಣ್ಣ್. ಆಮೆನ್.