Read Kodava ಪ್ರಕಟನೆ 10 Bible Online

ಪ್ರಕಟನೆ 10 - Kodava bible

ಪ್ರಕಟನೆ 10

¹ಪಿಂಞ, ಇಂಞೊರ್ ಶಕ್ತಿವಂತ ದೇವದೂತ ಬಾನತ್ಂಜ ಇಳ್ಂಜಿ ಬಪ್ಪಾನ ನಾನ್ ಕಂಡಿಯೆ; ಮೋಡ ಅಂವೊನ ಮುಚ್ಚಿತ್ಂಜತ್. ಅಂವೊಂಡ ಮಂಡೆರ ಮೇಲೆ ಮಳೆಬಿಲ್ಲ್ ಇಂಜತ್. ಅಂವೊಂಡ ಮೂಡ್ ಸೂರ್ಯಂಡನೆಕೆ ಇಂಜತ್, ಅಂವೊಂಡ ಕಾಲ್ ತಿತ್ತ್‌ರ ಕಂಬತ್‍ರನೆಕೆ ಇಂಜತ್.

²ಅಂವೊಂಡ ಕೈಯಿಲ್ ತೊರ್‌ಂದಿತ್‌ಂಜ ಒರ್ ಚೆರಿಯ ಪುಸ್ತಕ ಇಂಜತ್. ಅಂವೊ ತಾಂಡ ಬಲ್‌ತೆ ಕಾಲ್‌ನ ಸಮುದ್ರತ್‍ರ ಮೇಲೆ ಬೆಚ್ಚತ್. ಅಂವೊಂಡ ಎಡ್‍ತೆ ಕಾಲ್‌ನ ಬೂಮಿರ ಮೇಲೆ ಬೆಚ್ಚಿತ್,

³ಸಿಂಹತ್‍ರ ಕೂಪಡೆನೆಕೆ ಬಲ್ಯ ಸ್ವರತ್‍ಲ್ ಕೂತ್ ಕೊಡ್‍ತತ್. ಅಂವೊ ಅನ್ನನೆ ಕೂತ್‍ಕೊಡ್‍ಪಕಾಪಕ ಏಳ್ ಗುಡ್‍ಗ್ ಬಲ್ಯ ಸ್ವರತ್‍ಲ್ ಕೂತ್ ಕೊಡ್‍ತತ್.

⁴ಆ ಏಳ್ ಗುಡ್‍ಗ್ ಸದ್ದ್ ಮಾಡ್‌ವಕ, ನಾನ್ ಒಳ್‍ದ್‍ವಕ್ ಇಂಜ್. ಆಚೇಂಗಿ ಆ ಏಳ್ ಗುಡ್‍ಗ್: ನೀನ್ ಒಳ್‍ದತೆ ಮುದ್ರೆ ಇಡ್‍ೕಂದ್ ಪರಲೋಕತ್ಂಜ ಒರ್ ವಾಣಿ ನಾಕ್ ಕ್‍ೕಟತ್.

⁵ಸಮುದ್ರತ್‍ರ ಮೇಲೆಯು ಬೂಮಿರ ಮೇಲೆಯು ನಿಂದಂಡುಳ್ಳ ದೇವದೂತನ ನಾನ್ ಕಂಡಿಯೆ. ಅಂವೊ ತಾಂಡ ಬಲ್‌ತೆ ಕೈಯಿನ ಪರಲೋಕತ್‍ರ ಕಡೇಕ್ ನೇತಿತ್:

⁶ಬಾನತ್‍ನ ಪಿಂಞ ಅದ್‍ಲ್ ಉಳ್ಳದ್‍ನ, ಬೂಮಿನ ಪಿಂಞ ಅದ್‍ಲ್ ಉಳ್ಳದ್‍ನ, ಸಮುದ್ರತ್‍ನ ಪಿಂಞ ಅದ್‍ಲ್ ಉಳ್ಳದ್‍ನ ಸೃಷ್ಟಿ ಮಾಡಿತ್, ಎಕ್ಕಾಲು ಬದ್‍ಕಿಯಂಡ್ ಇಪ್ಪಂವೊಂಡ ಮೇಲೆ ಆಣೆ ಇಟ್ಟಿತ್ ಇನ್ನನೆ ಎಣ್ಣ್‌ಚಿ.

⁷ಇಂಞು ಮಿಂಞಕ್ ಸಮಯ ಇಲ್ಲೆ; ಆಚೇಂಗಿಯು, ದೇವ ತಾಂಡ ಸೇವಕಂಗಳಾನ ಪ್ರವಾದಿಯಂಗಕ್ ನಲ್ಲ ಸುದ್ದಿಯಾಯಿತ್ ಅರಿಚಿಟ್ಟನೆಕೆ, ಏಳನೆ ದೇವದೂತ ವಾಲಗ ಕೊಂಬ್‍ನ ಊದ್‍ವ ಸಮಯತ್‍ಲ್, ದೇವಡ ಮರ್ಮ ನೆರವೇರ್‌ವಾಂದ್ ಎಣ್ಣ್‌ಚಿ.

⁸ಪರಲೋಕತ್ಂಜ ನಾಕ್ ಕ್‍ೕಟ ವಾಣಿ ಇಂಞೊಮ್ಮ ನಾಡ ಕೂಡೆ ತಕ್ಕ್ ಪರ್ಂದಿತ್: ನೀನ್ ಪೋಯಿತ್ ಸಮುದ್ರತ್‍ರ ಮೇಲೆಯು, ಬೂಮಿರ ಮೇಲೆಯು ನಿಂದಂಡುಳ್ಳ ದೂತಂಡ ಕೈಯಿಂಜ ತೊರ್‌ಂದಿತುಳ್ಳ ಆ ಚೆರಿಯ ಪುಸ್ತಕತ್‍ನ ಎಡ್‍ತಾಂದ್ ಎಣ್ಣ್‌ಚಿ.

⁹ಅಕ್ಕ ನಾನ್ ಆ ದೇವದೂತಂಡ ಪಕ್ಕ ಪೋಯಿತ್, ಆ ಚೆರಿಯ ಪುಸ್ತಕತ್‍ನ ನಾಕ್ ತಾಂದ್ ಕ್‍ೕಟ್. ಅದ್ಂಗ್ ಅಂವೊ: ಇದಾ ಎಡ್‌ತ, ಇದ್‍ನ ನೀನ್ ತಿನ್ನ್, ಇದ್ ನೀಡ ಕೆಲಕ್ ಕೈಪಾಯಿತ್ ಇಪ್ಪ, ಆಚೇಂಗಿ ನೀಡ ಬಾಯಿಕ್ ತೇನ್‍ರನೆಕೆ ಮೊದ್‍ರವಾಯಿತ್‌ಪ್ಪಾಂದ್ ಎಣ್ಣ್‌ಚಿ.

¹⁰ನಾನ್ ಆ ದೇವದೂತಂಡ ಕೈಯಿಂಜ ಆ ಚೆರಿಯ ಪುಸ್ತಕತ್‍ನ ಎಡ್‍ತಿತ್, ಅದ್‍ನ ತಿಂದಿಯೆ. ಅದ್ ಬಾಯಿಕ್ ತೇನ್‍ರನೆಕೆ ಮೊದ್‍ರವಾಯಿತ್ಂಜತ್, ಅದ್‍ನ ನಾನ್ ತಿಂದ ಪಿಂಞ ನಾಡ ಕೆಲ ಕಯಿಪಾಚಿ.

¹¹ಅಕ್ಕ ಅಂವೊ ನನ್ನ ನೋಟಿತ್: ನೀನ್ ಪುನಃ ದುಂಬ ಜನಡ, ಜಾತಿಯಡ, ಬಾಷೆಕಾರಡ, ರಾಜಂಗಡ ವಿಷಯತ್ ಪ್ರವಾದನೆ ಎಣ್ಣಂಡೂಂದ್ ನಾಕ್ ಎಣ್ಣ್‌ಚಿ.