Read Kodava ಪ್ರಕಟನೆ 11 Bible Online

ಪ್ರಕಟನೆ 11 - Kodava bible

ಪ್ರಕಟನೆ 11

¹ಪಿಂಞ ನಾಕ್ ಅಳ್‌ತೆ ಮಾಡ್‌ವಂತ ಓಡೆರನೆಕೆ ಒರ್ ಕೋಲ್‍ನ ನಾಕ್ ತಾತ್. ಅಕ್ಕ ದೇವತೂತ: ನೀನ್ ಎದ್ದಿತ್, ದೇವಾಲಯತ್‍ನ, ಬಲಿಪೀಠತ್‍ನ ಪಿಂಞ ಅಲ್ಲಿ ಆರಾದನೆ ಮಾಡ್‌ವಯಿಂಗಳ ಅಳ್‌ತೆ ಮಾಡ್‍ೕಂದ್ ನಾಕ್ ಆಜ್ಞೆ ಕೊಡ್‍ತತ್.

²ದೇವಾಲಯತ್‍ರ ಪೊರಮೆ ಬಾಗತ್‍ನ ಅಳ್‌ತೆ ಮಾಡತೆ, ಅದ್‍ನ ಯೆಹೂದ್ಯ ಅಲ್ಲತಯಿಂಗಕ್ ಕೊಡ್‌ತಿಯೆ; ಅಯಿಂಗ ಪವಿತ್ರವಾಯಿತುಳ್ಳ ಪಟ್ಟಣತ್‍ನ ನಾಪತ ದಂಡ್ ತಿಂಗ ಚೌಟ್‍ವ.

³ನಾನ್ ನಾಡ ದಂಡ್ ಸಾಕ್ಷಿಕಾರಂಗಕ್ ಅದಿಕಾರ ಕೊಡ್‍ಪಿ. ಅಯಿಂಗ ಗೋಣಿಚೀಲತ್‍ನ ಪೊತ್ತಂಡ್ 1,260 ದಿನಕತ್ತನೆ ಪ್ರವಾದನೆ ಎಣ್ಣುವ.

⁴ಬೂಲೋಕತ್‌ರ ಒಡೆಯಂಡ ಮಿಂಞತ್‍ಲ್ ನಿಂದಂಡುಳ್ಳ ಆಲಿವ್ ಮರವು, ಬೊಳ್‍ಚ ಕಂಬವು ಈಂಗಳೇ.

⁵ಈಂಗಕ್ ದಾರೇಂಗಿ ಕ್‍ೕಡ್ ಮಾಡಂಡೂಂದ್ ಗೇನ ಮಾಡ್‍ಚೇಂಗಿ, ಅಯಿಂಗಡ ಬಾಯಿಂಜ ತಿತ್ತ್ ಬಂದಿತ್ ಅಯಿಂಗಡ ವಿರೋದಿಯಳ ಚುಟ್ಟ್‌ರ್‍ವ. ಈಂಗಕ್ ದಾರೇಂಗಿ ಕ್‍ೕಡ್ ಮಾಡ್‌ವಕ್ ಗೇನ ಮಾಡ್‍ಚೇಂಗಿ ಅಂವೊ ಈ ರೀತಿಲ್ ಕೊಲೆ ಆಂಡು.

⁶ಈಂಗ ಪ್ರವಾದನೆ ಎಣ್ಣಿಯಂಡುಳ್ಳ ಕಾಲತ್‍ಲ್, ಬಾನತ್‍ನ ಮುಚ್ಚಿತ್ ಮಳೆ ಬಕ್ಕತನೆಕೆ ಮಾಡ್‌ವಕ್ ಈಂಗಕ್ ಅದಿಕಾರ ಉಂಡ್; ಅದಲ್ಲತೆ ಅಯಿಂಗಕ್ ನೀರ್‌ನ ಚೋರೆಯಾಯಿತ್ ಮಾಡ್‌ವಂತ ಶಕ್ತಿಯು, ಅಯಿಂಗಕ್ ಎಕ್ಕೆಕ್ಕ ಬೋಂಡ್‌ವೋ, ಅಕ್ಕ ಎಲ್ಲಾ ಬೂಮಿಕ್ ನಾನಾತರ ಬಾದೆ ಕೊಡ್‌ತಿತ್ ಅಲ್ಲಿ ಉಳ್ಳಯಿಂಗಳ ಹಿಂಸೆ ಮಾಡ್‌ವಕ್ ಅದಿಕಾರ ಉಂಡ್.

⁷ಅಯಿಂಗ ಅಯಿಂಗಡ ಸಾಕ್ಷಿನ ಎಣ್ಣಿತಾನ ಪಿಂಞ, ಪಾತಾಳತ್ಂಜ ಬಪ್ಪ ಮೃಗ ಈಂಗಡ ಕೂಡೆ ಯುದ್ದ ಮಾಡಿತ್ ಈಂಗಳ ಗೆದ್ದಿತ್ ಕೊಲ್ಲುವ.

⁸ಈ ಸಾಕ್ಷಿಯಡ ಚಾವ್ ತಡಿ, ಆ ಬಲ್ಯ ಪಟ್ಟಣತ್‍ರ ಬೀದಿಲ್ ಬುದ್ದಿತ್ ಇಪ್ಪ. ಆ ಪಟ್ಟಣಕ್ ಸೋದೋಮ್ಂದ್ ಪಿಂಞ ಐಗುಪ್ತಾಂದ್ ಒರ್ ಗುರ್‌ತಾಯಿತ್ ಎಣ್ಣುವ; ಇಲ್ಲಿಯೇ ನಂಗಡ ಒಡೆಯನ ಶಿಲುಬೇಲ್ ಇಟ್ಟತ್.

⁹ಎಲ್ಲಾ ಜನಳು, ಎಲ್ಲಾ ಕುಲವು, ಎಲ್ಲಾ ತಕ್ಕ್‌ರ ಜನಳು, ಎಲ್ಲಾ ಜಾತಿಯಳು ಅಯಿಂಗಡ ಚಾವ್ ತಡೀನ ಮೂಂದರೆ ನಾಳ್‍ಕತ್ತನೆ ನೋಟುವ, ಅಯಿಂಗಡ ಚಾವ್ ತಡೀನ ಗೋರಿಲ್ ಇಡ್‌ವಕ್ ಒಪ್ಪ್‌ಲೆ.

¹⁰ಈ ದಂಡ್ ಪ್ರವಾದಿಯಳು ಬೂಮಿರ ಜನತ್‍ನ ಹಿಂಸೆ ಮಾಡ್‍ನಗುಂಡ್, ಅಯಿಂಗಕಾಯಿತ್ ಬೂಮಿಲ್ ವಾಸ ಮಾಡಿಯಂಡ್ ಉಳ್ಳಯಿಂಗ ದುಂಬ ಕುಶಿಪಟ್ಟಿತ್ ಕೊಂಡಾಡಿತ್ ಒಬ್ಬೊಂಗೊಬ್ಬ ಇನಾಮ್‍ನ ಅಯಿಪ.

¹¹ಮೂಂದರೆ ದಿವಸ ಆನ ಪಿಂಞ, ದೇವಡ ಕಡೇಯಿಂಜ ಜೀವತ್‍ರ ಆತ್ಮ ಬಂದಿತ್ ಅಯಿಂಗಡ ಒಳ್‍ಕ್ ಪೋಪ. ಅಕ್ಕ ಅಯಿಂಗ ಕಾಲೂರಿತ್ ಎದ್ದಿತ್ ನಿಂದತ್; ಅಯಿಂಗಳ ನೋಟ್‌ನಯಿಂಗಕ್ ದುಂಬ ಪೋಡಿ ಆಚಿ.

¹²ನಿಂಗ ಇಲ್ಲಿಕ್ ಪತ್ತಿತ್ ಬಾರೀಂದ್ ಒರ್ ಬಲ್ಯ ವಾಣಿ ಪರಲೋಕತ್ಂಜ ಅಯಿಂಗಕ್ ಕ್‍ೕಟತ್, ಅಕ್ಕ ಅಯಿಂಗ ಮೋಡತ್‍ಲ್ ಪತ್ತಿತ್ ಪರಲೋಕಕ್ ಪೋಚಿ; ಅಯಿಂಗಡ ವಿರೋದಿಯಂಗ ಇದ್‍ನ ನೋಟಿಯಂಡ್ ಇಂಜತ್.

¹³ಅದೇ ಸಮಯತ್‍ಲ್ ಬಲ್ಯ ಬೂಕಂಪ ಆಚಿ. ಅಕ್ಕಣೆಕ್ ಆ ಪಟ್ಟಣತ್‍ರ ಪತ್ತ್ ಬಾಗತ್‍ಲ್ ಒರ್ ಬಾಗ ಪೊಳಿಂಜ್ ಬುದ್ದ್ ಪೋಚಿ; ಏಳ್ ಆಯಿರ ಜನ ಚತ್ತ್ ಪೋಚಿ, ಬಾಕಿ ಜನಕ್ ಬಲ್ಯ ಪೋಡಿಯಾಯಿತ್ ಪರಲೋಕತ್‍ಲ್ ಉಳ್ಳ ದೇವಕ್ ಮಹಿಮೆ ಕೊಡ್‍ತತ್.

¹⁴ದಂಡನೆ ಅಪಾಯ ಕಯಿಂಜತ್, ಇದಾ ಮೂಂದನೆ ಕಷ್ಟ ಬೆರಿಯ ಬಂದಂಡುಂಡ್.

¹⁵ಏಳನೆ ದೇವದೂತ ವಾಲಗತ್‍ರ ಕೊಂಬ್‍ನ ಊದ್‍ವಕಾಪಕ: ಲೋಕತ್‍ರ ರಾಜ್ಯಂಗ ನಂಗಡ ಒಡೆಯಂಗು, ಅಂವೊಂಡ ಕ್ರಿಸ್ತಂಡ ರಾಜ್ಯವಾಯಿತು ಆಚಿ. ಅಂವೊ ಕಾಲಕಾಲಕು ರಾಜನಾಯಿತ್ ರಾಜ್ಯಬಾರ ಮಾಡ್‌ವಾಂದ್ ಪರಲೋಕತ್ಂಜ ಒರ್ ಬಲ್ಯ ಸದ್ದ್ ಕ್‍ೕಟತ್.

¹⁶ಅಕ್ಕ, ದೇವಡ ಮಿಂಞತ್‍ಲ್ ಅಯಿಂಗಯಿಂಗಡ ಸಿಂಹಾಸನತ್‍ಲ್ ಅಳ್‍ತಂಡಿಂಜ ಇರುವತ ನಾಲ್ ಪೆರಿಯಯಿಂಗಳು, ಅಡ್ಡ ಬುದ್ದಿತ್ ದೇವನ ಆರಾದನೆ ಮಾಡ್‍ಚಿ.

¹⁷ಇಕ್ಕ ಇಪ್ಪಂವೊನೂ, ಮಿಂಞ ಇಂಜಂವೊನು ಸರ್ವ ಶಕ್ತಿವಂತಂವೊನು ಆಯಿತುಳ್ಳ, ಒಡೆಯನಾನ ದೇವನೇ, ನಿನ್ನ ನಂಗ ಆರಾದನೆ ಮಾಡ್‌ವ. ನೀನ್ ಬಲ್ಯ ಶಕ್ತಿರಗುಂಡ್ ರಾಜ್ಯಬಾರ ಮಾಡ್‌ವ ರಾಜನಾಯಿತುಳ್ಳಿಯ.

¹⁸ನೀಡ ಜನ ಅಲ್ಲತಯಿಂಗಕ್ ಚೆಡಿ ಬಾತ್, ಅಕ್ಕ ನೀಕ್ ಬಲ್ಯ ಚೆಡಿ ಉಂಟಾಚಿ; ಚತ್ತಯಿಂಗಕ್ ನ್ಯಾಯತೀರ್ಪ್ ಕ್‍ಟ್ಟ್‌ವಕು, ಪ್ರವಾದಿಯಳಾನ ನೀಡ ಸೇವಕಂಗಕು, ದೇವಡ ಮಕ್ಕಕು, ನೀಡ ಪೆದತ್‍ರ ಮೇಲೆ ಬಕ್ತಿಯಾಯಿತ್ ಇಂಜ ಬಲ್ಯಯಿಂಗಕು ಚೆರಿಯಯಿಂಗಕು ಫಲ ತಪ್ಪಕು, ಬೂಮಿಕ್ ಕ್‍ೕಡ್ ಮಾಡ್‍ನಯಿಂಗಳ ಪಾಳ್ ಮಾಡ್‌ವಕು, ಸಮಯ ಬಾತ್‍ೕಂದ್ ಎಣ್ಣಿತ್ ದೇವನ ತುದಿಚತ್.

¹⁹ಅಕ್ಕ, ಪರಲೋಕತ್‍ಲ್ ಉಳ್ಳ ದೇವಾಲಯ ತೊರ್ಂದತ್. ಅಂವೊಂಡ ಆಲಯತ್‍ಲ್ ಅಂವೊಂಡ ಒಪ್ಪಂದತ್‍ರ ಪೊಟ್ಟಿನ ಕಾಂಬಕ್ ಆಚಿ; ಅಕ್ಕಣೆಕ್ ಮಿಂಚ್, ವಾಣಿ, ಗುಡ್‍ಗ್ ಬೂಕಂಪ ಪಿಂಞ ಬಲ್ಯ ಆಲಿಕಾಯಿರ ಮಳೆ ಪೊಜ್ಜತ್.