Read Kodava ಪ್ರಕಟನೆ 12 Bible Online

ಪ್ರಕಟನೆ 12 - Kodava bible

ಪ್ರಕಟನೆ 12

¹ಬಾನತ್‍ಲ್ ಒರ್ ಬಲ್ಯ ಗುರ್‍ತ್‍ನ ಕಾಂಬಕಾಚಿ; ಅದ್ ಎಂತ ಎಣ್ಣ್‌ಚೇಂಗಿ ಒರ್ ಪೊಣ್ಣಾಳ್ ಸೂರ್ಯನ ಬಟ್ಟೇಯಾಯಿತ್ ಇಟ್ಟಂಡ್ ಇಂಜತ್. ಅವಡ ಕಾಲ್‍ರ ಅಡಿಲ್ ಚಂದ್ರ ಇಂಜತ್, ಪನ್ನೆರಂಡ್ ನಕ್ಷತ್ರ ಉಳ್ಳ ಒರ್ ಕಿರೀಟತ್‍ನ ಅವಡ ಮಂಡೆಕ್ ಇಟ್ಟಿತ್ಂಜತ್.

²ಅವ ಕೆಲಕರ್ತಿತಯಾಯಿತ್ ಇಂಜಿತ್, ಅವಕ್ ಪೆರುವ ನೊಂಬಲ ಬಂದಿತ್, ಪೆರ್‌ವಕಾಯಿತ್ ಕೂತ್ ಕೊಡ್‌ತಂಡ್ ಇಂಜತ್.

³ಅಕ್ಕ, ಬಾನತ್‍ಲ್ ಇಂಞೊರ್ ಗುರ್‍ತ್‍ನ ಕಾಂಬಕಾಚಿ; ಅದ್ ಚೋಂದಿತ್ ಇಂಜ ಬಲ್ಯ ಘಟಸರ್ಪವಾಯಿತ್ಂಜತ್. ಅದ್ಂಗ್ ಏಳ್ ಮಂಡೆ, ಪತ್ತ್ ಕೊಂಬ್ ಪಿಂಞ ಅದ್ಂಡ ಮಂಡೆರ ಮೇಲೆ ಏಳ್ ಕಿರೀಟ ಇಂಜತ್.

⁴ಆಂಡ ಬಾಲ್ ಬಾನತ್‍ಲ್ ಉಳ್ಳ ನಕ್ಷತ್ರತ್‌ಲ್ ಮೂಂದ್‍ಲ್ ಒರ್ ಬಾಗತ್‍ನ ಬಲ್‍ಚಿತ್ ಬೂಮಿಕ್ ಇಟ್ಟತ್; ಪೆರುವಕ್ ಉಳ್ಳ ಆ ಪೊಣ್ಣಾಳ್, ಪೆರುವ ಆ ಗಳಿಗೆಲೇ ಆ ಕುಂಞಿನ ಮುಗ್ಗ್‌ವಕ್ ಈ ಘಟಸರ್ಪ ಪೊಣ್ಣಾಳ್‍ರ ಮಿಂಞತ್ ನಿಂದಂಡಿಂಜತ್.

⁵ಅವ ಎಲ್ಲಾ ಜನಳ, ಇರ್‍ಂಬ್ ಕೋಲ್‍ಲ್ ರಾಜ್ಯಬಾರ ಮಾಡ್‌ವಕ್ ಉಳ್ಳ ಒರ್ ಕ್‍ಣ್ಣ ಕುಂಞಿನ ಪೆತ್ತತ್; ಅವಡ ಕುಂಞಿನ ದೇವಡ ಪಕ್ಕ ಪಿಂಞ ದೇವಡ ಸಿಂಹಾಸನತ್‍ರ ಪಕ್ಕ ಬೆರಿಯ ಕೊಂಡ್ ಪೋಯಿರ್‌ತ್.

⁶ಆ ಪೊಣ್ಣಾಳ್ ಮಣಬೂಮಿಕ್ ಓಡಿ ಪೋಚಿ; ಅಲ್ಲಿ ಅವಕ್ 1,260 ದಿವಸಕತ್ತನೆ ಚಾಯಿತೆ ಬದ್‌ಕುವನೆಕೆ ದೇವ ಆ ಜಾಗತ್‍ನ ತಯಾರ್ ಮಾಡಿತ್ ಬೆಚ್ಚಿತ್ಂಜತ್.

⁷ಬಾನತ್‍ಲ್ ಯುದ್ದ ಉಂಟಾಚಿ. ಮಿಕಾಯೇಲ ಎಣ್ಣುವ ದೇವಡ ಸೇನೆರ ಅದಿಪತಿಯು ಅಂವೊಂಡ ದೂತಂಗಳು ಘಟಸರ್ಪತ್‍ರ ಕೂಡೆ ಯುದ್ದ ಮಾಡ್‍ಚಿ. ಫಟಸರ್ಪ ಪಿಂಞ ಅಂವೊಂಡ ಕೂಡೆ ಉಳ್ಳ ದೂತಂಗ ಯುದ್ದ ಮಾಡ್‍ಚೇಂಗಿಯು, ಗೆಲ್ಲುವಕ್ ಕಯಿಂಜಿತ್ತ್‌ಲ್ಲೆ.

⁸ಬಾನತ್‍ಲ್ ಅಯಿಂಗ ಇಂಜ ಜಾಗ ಸಹ ಕಾಂಗತೆ ಆಯಿಪೋಚಿ.

⁹ಬೂಲೋಕತ್‍ನ ಎಲ್ಲಾ ಮೋಸ ಮಾಡಿಯಂಡಿಂಜ, ಪಿಶಾಚೀಂದೂ ಸೈತಾನಾಂದೂ ಎಣ್ಣಿಯಂಡಿಂಜ ಪಳೆಯ ಘಟಸರ್ಪತ್‍ನ ಬೂಮಿಕ್ ಬೂವನೆಕೆ ದೂಡ್‍ಚಿ. ಅದ್ಂಡಕೂಡೆ ಇಂಜ ದೂತಂಗಳ ಸಹ ಬೂಮಿಕ್ ದೂಡಿರ್‌ತ್.

¹⁰ಅಕ್ಕ, ಪರಲೋಕತ್‍ಲ್ ಒರ್ ಬಲ್ಯ ವಾಣಿ ಕ್‍ೕಟತ್: ಇಕ್ಕ, ರಕ್ಷಣೆಯು, ಶಕ್ತಿಯು, ನಂಗಡ ದೇವಡ ರಾಜ್ಯವು, ಅಂವೊಂಡ ಕ್ರಿಸ್ತಂಡ ಅದಿಕಾರವು ಬಂದಿತುಂಡ್; ಬಯಿಟ್ ಪೋಲ್ ನಂಗಡ ದೇವಡ ಮಿಂಞತ್, ನಂಗಡ ಅಣ್ಣತಮ್ಮಣಂಗಡ ಮೇಲೆ ಕುತ್ತ ಪರ್ಂದಂಡ್ ಇಂಜ ಅಂವೊ, ಅಡಿಕ್ ಬೂವನೆಕೆ ಮಾಡಿರ್‌ತ್.

¹¹ಚಾವನೆಕೆ ಕಷ್ಟ ಬಾತೇಂಗಿಯು, ಅದ್‍ಯಿಂಜ ತಪ್ಪ್‌ಚಿಡುವಕಾಯಿತ್, ಅಯಿಂಗಡ ಜೀವತ್‍ನ ಸಹ ನೋಟತೆ, ಕೊರಿಕುಟ್ಟಿರ ಚೋರೆರ ಮೂಲಕ, ಪಿಂಞ ಅಯಿಂಗಡ ಸಾಕ್ಷಿರ ವಾಕ್ಯತ್‍ರ ಮೂಲಕ ಸೈತಾನನ ಗೆದ್ದತ್.

¹²ಆನಗುಂಡ್, ಪರಲೋಕವೇ, ಅದ್‍ಲ್ ವಾಸ ಮಾಡಿಯಂಡ್ ಉಳ್ಳಯಿಂಗಳೇ, ಕುಶಿ ಪಡಿರಿ. ಬೂಮಿಲ್ ಸಮುದ್ರತ್‍ಲ್ ವಾಸಮಾಡಿಯಂಡುಳ್ಳಯಿಂಗಳೇ, ನಿಂಗಕ್ ಅಯ್ಯೋ! ಸೈತಾನ ತಾಂಗ್ ಚೆನ್ನ ಸಮಯ ಮಾತ್ರ ಉಂಡ್‍ೕಂದ್ ಗೊತ್ತಾನಗುಂಡ್, ದುಂಬ ಚೆಡಿಲ್, ನಿಂಗಡ ಪಕ್ಕ ಇಳಿಂಜಗುಂಡ್, ನಿಂಗಕ್ ಬಲ್ಯ ಕಷ್ಟ ಆಪಾಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್.

¹³ಘಟಸರ್ಪ ಬೂಮಿಕ್ ಬುದ್ದತ್‍ೕಂದ್ ಗೊತ್ತಾನಗುಂಡ್, ಆ ಕ್‍ಣ್ಣ ಕುಂಞಿನ ಪೆತ್ತ ಪೊಣ್ಣಾಳ್‍ನ ಹಿಂಸೆಪಡ್‍ತ್‌ವಕ್ ಸುರು ಮಾಡ್‍ಚಿ.

¹⁴ಅಕ್ಕ ಆ ಪೊಣ್ಣಾಳ್ ತಾಂಡ ಮಣಬೂಮಿರ ಜಾಗಕ್ ಪಾರಿತ್ ಪೋಪಕಾಯಿತ್ ಗರುಡಪಕ್ಷಿರ ದಂಡ್ ಬಲ್ಯ ರೆಕ್ಕೆ ಅವಕ್ ಕ್‍ಟ್ಟ್‌ಚಿ. ಅಲ್ಲಿ ಅವ ಆ ಪಾಂಬ್‍ಕ್ ಕಾಂಗತನೆಕೆ ಒರ್ ಕಾಲ, ದಂಡ್ ಕಾಲ, ಅರೆಕಾಲ, ಬದ್‍ಕಿಯಂಡ್ ಇಪ್ಪಕ್ ಮಾಡಿತ್ಂಜತ್.

¹⁵ಆ ಪಾಂಬ್ ಆ ಪೊಣ್ಣಾಳ್‍ನ ಜಲಪ್ರಳಯ ಒಕ್ಕಿಯಂಡ್ ಪೋಂಡೂಂದ್ ತಾಂಡ ಬಾಯಿಂಜ ನೀರ್‌ರ ಪೊಳೆರನೆಕೆ ಬೂಕಿತ್ ಬುಟ್ಟತ್.

¹⁶ಆಚೇಂಗಿ ಬೂಮಿ ಆ ಪೊಣ್ಣಾಳ್‍ರ ಸಹಾಯಕ್ ಬಂದಿತ್ ಆ ಘಟಸರ್ಪ ಬಾಯಿಂಜ ಬೂಕ್‌ನ ನೀರ್‌ನ ಕುಡ್‍ಚಿರ್‌ತ್.

¹⁷ಅಕ್ಕ, ಆ ಘಟಸರ್ಪಕ್ ಆ ಪೊಣ್ಣಾಳ್‍ರ ಮೇಲೆ ಬಾರಿ ಚೆಡಿ ಬಂದಿತ್, ದೇವಡ ಆಜ್ಞೆಕ್ ತಗ್ಗಿತ್ ನಡ್‍ಪಯಿಂಗಳು, ಯೇಸು ಕ್ರಿಸ್ತಂಡ ಸಾಕ್ಷಿ ಉಳ್ಳಯಿಂಗಳು ಆನ ಅವಡ ಸಂತಾನಕಾರಂಗಳಾನ ಬೋರೆಯಿಂಗಡ ಕೂಡೆ ಯುದ್ದ ಮಾಡ್‌ವಕ್ ಪೋಚಿ.

¹⁸ಸಮುದ್ರತ್‍ರ ಕೆರೆಕ್ ಪೋಯಿತ್ ಘಟಸರ್ಪ ನಿಂದಂಡಿಂಜತ್.