Read Kodava ಪ್ರಕಟನೆ 14 Bible Online

ಪ್ರಕಟನೆ 14 - Kodava bible

ಪ್ರಕಟನೆ 14

¹ಪಿಂಞ ನಾನ್ ನೋಟ್‍ವಕ, ಇದಾ, ಚೀಯೋನ್‌[9] ಕುಂದ್‌ರ ಕೊಡಿಲ್ ಕೊರಿಕುಟ್ಟಿಯಾನಂವೊನ ಪಿಂಞ ಅಂವೊಂಡ ಕೂಡೆ ಅಂವೊಂಡ ಅಪ್ಪನಾನ ದೇವಡ ಪೆದತ್‍ನ ನೆತ್ತಿರ ಮೇಲೆ ಒಳ್‍ದಿತ್ಂಜ 1,44,000 ಜನಳ ಕಂಡಿಯೆ.

²ಇದ್‍ಲ್ಲತೆ, ಬಲ್ಯ ನೀರ್ ಚಾಡಿತ್ ಬಪ್ಪ ಸದ್ದ್‌ರನೆಕೆ, ಬಲ್ಯ ತೆಡ್‌ರ ಸದ್ದ್‌ಲ್ ಒರ್ ವಾಣಿ ಪರಲೋಕತ್ಂಜ ಬಂದದ್ ನಾಕ್ ಕ್‍ೕಟತ್; ನಾನ್ ಕ್‍ೕಟ ಸದ್ದ್, ವೀಣೇಲ್ ಸಂಗೀತ ಮಾಡ್‌ವ ಅಯಿಂಗಡ ವೀಣೇರ ಸಂಗೀತವಾಯಿತ್ ಇಂಜತ್.

³ಅಯಿಂಗ, ಸಿಂಹಾಸನತ್‍ರ ಮಿಂಞತ್‍ಲ್, ನಾಲ್ ಜೀವಿಯಡ ಮಿಂಞತ್‍ಲ್, ಪೆರಿಯಯಿಂಗಡ ಮಿಂಞತ್‍ಲ್ ಪುದಿಯ ಪಾಟ್‍ನ ಪಾಡ್‌ಚಿ. ಬೂಲೋಕತ್ಂಜ ವಿಮೋಚನ ಕ್‍ಟ್ಟಿತ್ ಬಂದ 1,44,000 ಜನಳ ಬುಟ್ಟಿತ್ ಆ ಪಾಟ್‍ನ ಬೋರೆ ದಾರೂ ಪಡಿಪಕ್ ಕಯ್ಯುವಕಿಂಜಿಲೆ.

⁴ಈಂಗಳೇ ಪೊಣ್ಣಾಳ್‍ರಗುಂಡ್ ಅಶುದ್ದ ಆಕತ, ಕನ್ನಿ ಮೂಡಿಯರನೆಕೆ ಶುದ್ದವಾಯಿತ್ ಇಂಜಯಿಂಗ. ಕೊರಿಕುಟ್ಟಿಯಾನಂವೊ ಎಲ್ಲಿಯೆಲ್ಲಾ ಪೋಪ, ಅಂವೊಂಡ ಬಯ್ಯಕ್ ಪೋಪಯಿಂಗ ಈಂಗಳೇ. ಅಯಿಂಗ ಜನಡ ಮದ್ಯತ್ಂಜ ದೇವಕಾಯಿತ್ ಪಿಂಞ ಕೊರಿಕುಟ್ಟಿಯಾನವೊಂಗಾಯಿತ್ ಆದ್ಯ ಪಣ್ಣಾಯಿತ್ ವಿಮೋಚನ ಆನಯಿಂಗ.

⁵ಅಯಿಂಗಡ ತಕ್ಕ್‌ಲ್ ಕಪಟತನ ಇಂಜಿತ್ತ್‌ಲ್ಲೆ; ದೇವಡ ಸಿಂಹಾಸನತ್‍ರ ಮಿಂಞತ್ ಒರ್ ಕುತ್ತವು ಇಲ್ಲತಯಿಂಗಳಾಯಿತುಂಡ್.

⁶ಪಿಂಞ ಇಂಞೊರ್ ದೇವದೂತ ಬಾನತ್‍ರ ಮದ್ಯತ್ಂಜ ಪಾರಿತ್ ಬಪ್ಪಾನ ಕಂಡಿಯೆ; ಅಂವೊ ಬೂಮಿಲ್ ವಾಸ ಮಾಡಿಯಂಡುಳ್ಳ ಎಲ್ಲಾ ಜಾತಿಕ್, ಎಲ್ಲಾ ಕುಲಕ್, ಎಲ್ಲಾ ಬಾಷೆ ಪರಿಯುವಯಿಂಗಕ್, ಎಲ್ಲಾ ಜನಕ್ ಅರಿಚಿಡುವಕುಳ್ಳ ದೇವಡ ನಿತ್ಯವಾನ ನಲ್ಲ ಸುದ್ದಿನ ಕೊಂಡ್ ಬಾತ್.

⁷ಅಂವೊ: ನಿಂಗೆಲ್ಲಾರು ದೇವಕ್ ಬೊತ್ತಿತ್, ಅಂವೊಂಗ್ ಮಹಿಮೆ ಕೊಡ್‍ಪಿರ; ಎನ್ನಂಗೆಣ್ಣ್‌ಚೇಂಗಿ ದೇವ ನ್ಯಾಯತೀರ್ಪ್ ಮಾಡ್‌ವ ಸಮಯ ಬಾತ್. ಬಾನತ್‍ನ, ಬೂಲೋಕತ್‍ನ, ಸಮುದ್ರತ್‍ನ ಪಿಂಞ ನೀರ್‌ರ ಬುಗ್ಗೆಯಳ ಸೃಷ್ಟಿ ಮಾಡ್‌ನಂವೊನ ಆರಾದನೆ ಮಾಡ್‌ವಿರಾಂದ್ ಬಲ್ಯ ಸ್ವರತ್‍ಲ್ ಕೂತ್ ಕೊಡ್‍ತತ್.

⁸ದಂಡನೆರ ದೇವದೂತ ಪೋಯಿತ್: ಬಾಬೇಲ್ ಎಣ್ಣುವ ಬಲ್ಯ ಪಟ್ಟಣ ಬುದ್ದತ್! ಬುದ್ದತ್! ತಾಂಡ ವೇಶಿತನವಾಯಿತುಳ್ಳ ಗಟ್ಟಿಯಾನ ಕಳ್ಳ್‌ನ ಎಲ್ಲಾ ಜನಕ್ ಕುಡಿಪಕ್ ಕೊಡ್‍ತತ್ತಲ್ಲಾಂದ್ ಎಣ್ಣ್‌ಚಿ.

⁹ಮೂಂದನೆ ದೇವದೂತ ಪೋಯಿತ್: ಬಲ್ಯ ಸ್ವರತ್‍ಲ್, ಮೃಗತ್‍ನ ಪಿಂಞ ಅಂವೊಂಡ ವಿಗ್ರಹತ್‍ನ ಆರಾದನೆ ಮಾಡಿತ್, ತಾಂಡ ನೆತ್ತಿಲ್ ಅಥವ ಕೈಯಿಲ್ ಅದ್ಂಡ ಮುದ್ರೆನ ಇಟ್ಟಿತುಳ್ಳಂವೊಂಗ್ ಇನ್ನನೆ ಆಪ.

¹⁰ದೇವಡ ಬಲ್ಯ ಚೆಡಿರ ಪಾತ್ರತ್‍ಲ್ ಏದು ಕಲ್‍ಕ್‍ತ ದೇವಡ ಗಟ್ಟಿಯಾನ ಬಲ್ಯ ಚೆಡಿರ ಕಳ್ಳ್‌ನ ಕುಡಿಚಿತ್, ಪವಿತ್ರವಾನ ದೂತಂಗಡ ಮಿಂಞತ್, ಕೊರಿಕುಟ್ಟಿಯಾನವೊಂಡ ಮಿಂಞತ್ ತಿತ್ತ್‌ರ ಜ್ವಾಲತ್‌ರಗುಂಡ್ ಗಂಧಕತ್‍ರಗುಂಡ್ ಕಷ್ಟಪಟ್ಟಂಡ್ ಇಪ್ಪ.

¹¹ಅಯಿಂಗಡ ಪೊಗೆ, ಎಕ್ಕಾಲು ಕೊಡಿಕ್ ಬಂದಂಡಿಪ್ಪ; ಮೃಗತ್‍ನ ಪಿಂಞ ಅಂವೊಂಡ ವಿಗ್ರಹತ್‍ನ ಆರಾದನೆ ಮಾಡ್‌ವಯಿಂಗಳು ಅದ್ಂಡ ಪೆದತ್‍ನ ಇಟ್ಟಿತುಳ್ಳ ದಾರ್‌ಕು ಬಯಿಟ್ ಪೋಲ್ ಆರಾಮ್ ಕ್‍ಟ್ಟುಲೆ.

¹²ದೇವಡ ಆಜ್ಞೆನ ಪಿಂಞ ಯೇಸುರ ಮೇಲೆ ಉಳ್ಳ ನಂಬಿಕೇನ ಕಾತಂಡ್ ಉಳ್ಳ ದೇವಡ ಮಕ್ಕಡ ಪೊರುಮೆ ಇದ್‍ಲ್ ಗೊತ್ತಾಪಾಂದ್ ಎಣ್ಣ್‌ಚಿ.

¹³ಪಿಂಞ ಪರಲೋಕತ್ಂಜ ಬಪ್ಪ ಒರ್ ವಾಣಿ ನಾಕ್ ಕ್‍ೕಟತ್; ಅದ್: ಒಡೆಯಂಡಲ್ಲಿ ಚಾವಯಿಂಗ ಇಕ್ಕಯಿಂಜ ಆಶೀರ್ವಾದ ಪಡ್ಂದಯಿಂಗಾಂದ್ ಒಳ್‌ದ್‍ೕಂದ್ ಎಣ್ಣ್‌ಚಿ; ಅಯಿಂಗ ಅಯಿಂಗಡ ಪ್ರಯತ್ನತ್‌ನೆಲ್ಲ ಬುಟ್ಟಿತ್, ಆರಾಮ್ ಮಾಡ್‌ವ; ಅಯಿಂಗಡ ಕ್ರಿಯೆ ಅಯಿಂಗಡ ಕೂಡೆ ಪೋಪ; ಪವಿತ್ರಾತ್ಮ ಸಹ ಅಕ್ಕೂಂದ್ ಎಣ್ಣಿಯಂಡುಂಡ್.

¹⁴ಪಿಂಞ ನಾನ್ ನೋಟ್‍ವಕ, ಇದಾ, ಬೊಳ್‍ತ ಮೋಡತ್‍ನ, ಆ ಮೋಡತ್‍ರ ಮೇಲೆ ಮನುಷ್ಯಕುಮಾರಂಡನೆಕೆ ತಾಂಡ ಮಂಡೆಲ್ ಪೊನ್ನ್‌ರ ಕಿರೀಟತ್‍ನ ಇಟ್ಟಂಡ್, ತಾಂಡ ಕೈಯಿಲ್ ಚೂಪಾಯಿತುಳ್ಳ ಕೊಯಿಕತ್ತಿನ ಪುಡ್‍ಚಂಡ್ ಅಳ್‍ತಂಡಿಂಜ ಒಬ್ಬನ ಕಂಡಿಯೆ.

¹⁵ಅಕ್ಕ ಇಂಞೊರ್ ದೇವದೂತ ದೇವಾಲಯತ್ಂಜ ಪೊರಟಿತ್ ಬಾತ್. ಅಂವೊ ಮೋಡತ್‍ಲ್ ಅಳ್‍ತಂಡಿಪ್ಪಂವೊನ ನೋಟಿತ್: ಕೊಯ್ಯುವ ಸಮಯ ಬಂದಗುಂಡ್ ನೀಡ ಕೊಯಿಕತ್ತಿನ ನ್‍ೕಟಿತ್ ಕೊಯಿಪಣಿ ಮಾಡ್‍ೕಂದ್ ಬಲ್ಯ ಸ್ವರತ್‍ಲ್ ಎಣ್ಣ್‌ಚಿ.

¹⁶ಅಕ್ಕ, ಮೋಡತ್‍ಲ್ ಅಳ್‍ತಂಡಿಂಜಂವೊ, ತಾಂಡ ಕೊಯಿಕತ್ತಿನ ಬೂಮಿರ ಮೇಲೆ ಬೀಚ್‌ವಕ ಬೂಮಿರ ಕೊಯಿಪಣಿ ತ್‍ೕಂದತ್.

¹⁷ಪಿಂಞ ಇಂಞೊರ್ ದೇವದೂತ ಪರಲೋಕತ್‍ಲ್ ಉಳ್ಳ ದೇವಾಲಯತ್ಂಜ ಪೊರಮೆ ಬಾತ್. ಅಂವೊ ಚೂಪಾಯಿತುಳ್ಳ ಕೊಯಿಕತ್ತಿನ ಪುಡ್‍ಚಂಡ್ ಇಂಜತ್.

¹⁸ತಿತ್ತ್‌ರ ಮೇಲೆ ಅದಿಕಾರ ಉಳ್ಳ ಬೋರೆ ಒರ್ ದೇವದೂತ ಬಲಿಪೀಠತ್‍ರ ಪಕ್ಕತ್ಂಜ ಪೊರಟಿತ್ ಬಂದಿತ್, ಚೂಪಾಯಿತುಳ್ಳ ಕೊಯಿಕತ್ತಿನ ಪುಡ್‌ಚಂಡುಳ್ಳಂವೊನ ನೋಟಿತ್: ಬೂಮಿರ ದ್ರಾಕ್ಷಿ, ಪಣ್ಣಾಯಿ ಪೋಚಿ, ಚೂಪಾಯಿತುಳ್ಳ ನೀಡ ಕೊಯಿಕತ್ತಿನ ನ್‍ೕಟಿತ್, ದ್ರಾಕ್ಷಿ ಕೊಲೆನ ಕೆತ್ತುವಿಯಾಂದ್ ಬಲ್ಯ ಸ್ವರತ್‍ಲ್ ಎಣ್ಣ್‌ಚಿ.

¹⁹ಅಕ್ಕ ಆ ದೂತ, ತಾಂಡ ಕೊಯಿಕತ್ತಿನ ಬೂಮಿರ ಮೇಲೆ ಬೀಚಿತ್, ಬೂಮಿರ ದ್ರಾಕ್ಷಿ ಪಣ್ಣ್‌ನ ಕೊಜ್ಜಿತ್, ದೇವಡ ಬಲ್ಯ ಚೆಡಿರ, ಬಲ್ಯ ದ್ರಾಕ್ಷಿ ಕುಂಡ್‍ಲ್ ಇಟ್ಟತ್.

²⁰ಪಟ್ಟಣತ್‍ರ ಪೊರಮೆ ಉಳ್ಳ ದ್ರಾಕ್ಷಿ ಕುಂಡ್‍ಲ್ ಅದ್‍ನ ಚೌಟ್‌ವಕಿಂಜತ್. ಆ ಕುಂಡಿಂಜ, ಚೋರೆ ಪೊರಟಿತ್, ಕುದ್‍ರೆರ ಕಡಿವಾಣತ್‍ನ ಮುಟ್ಟ್‌ವಚ್ಚಕ್ ಎತ್ತರಕ್ ಪಿಂಞ ಇರ್ ನೂಯಿಟ ಒಯಿಂಬತ್ ಆರ್ ಕಿಲೊ ಮೀಟರ್ ದೂರಕ್ ಉಕ್ಕಿ ಪೋಚಿ.