Read Kodava ಪ್ರಕಟನೆ 16 Bible Online

ಪ್ರಕಟನೆ 16 - Kodava bible

ಪ್ರಕಟನೆ 16

¹ಆ ಸಮಯತ್‍ಲ್, ದೇವಾಲಯತ್ಂಜ ಒರ್ ಬಲ್ಯ ಸ್ವರ ಆ ಏಳ್ ದೂತಂಗಕ್: ನಿಂಗ ಪೋಯಿತ್ ದೇವಡ ಪಾತ್ರತ್‍ಲ್ ಉಳ್ಳ ಬಲ್ಯ ಚೆಡಿನ ಬೂಮಿರ ಮೇಲೆ ಬೂಕ್‌ವಿರಾಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್.

²ಮೊದಲನೆ ದೂತ ತಾಂಡ ಪಾತ್ರತ್‍ಲ್ ಉಳ್ಳದ್‍ನ ಬೂಮಿರ ಮೇಲೆ ಬೂಕ್‍ಚಿ. ಅಕ್ಕ ಮೃಗತ್‍ರ ಮುದ್ರೆನ ಇಟ್ಟಯಿಂಗಳು ಅದ್ಂಡ ವಿಗ್ರಹತ್‍ನ ಆರಾದನೆ ಮಾಡ್‌ವಯಿಂಗಳು ಆನ ಮನುಷ್ಯಂಗಡ ಮೇಲ್‌ಲ್ ಬಯಂಕರವಾನ ಬಲ್ಯ ನೊಂಬಲ ತಪ್ಪ ಪುಣ್ಣ್ ಉಂಟಾಚಿ.

³ದಂಡನೆ ದೂತ ತಾಂಡ ಪಾತ್ರತ್‍ಲ್ ಉಳ್ಳದ್‍ನ ಸಮುದ್ರತ್‍ಲ್ ಬೂಕ್‍ಚಿ. ಅಕ್ಕ ಸಮುದ್ರತ್‍ರ ನೀರ್ ಚತ್ತ್ ಪೋನಂವೊಂಡ ಚೋರೆರನೆಕೆ ಆಚಿ. ಸಮುದ್ರತ್‍ಲ್ ಉಳ್ಳ ಪ್ರಾಣಿಯ ಎಲ್ಲಾ ಚತ್ತ್ ಪೋಚಿ.

⁴ಮೂಂದನೆ ದೂತ ತಾಂಡ ಪಾತ್ರತ್‍ಲ್ ಉಳ್ಳದ್‍ನ ಪೊಳೆಕ್ ಪಿಂಞ ನೀರ್‌ರ ಬುಗ್ಗೆಕ್ ಬೂಕ್‍ಚಿ. ಅಕ್ಕ ಅದ್ ಚೋರೆಯಾಯಿತ್ ಬದ್‍ಲ್ ಆಚಿ.

⁵ಅಲ್ಲಿಂಜ ನೀರ್‌ರ ದೂತ: ಇಪ್ಪಂವೊನು, ಇಂಜಂವೊನು ಪವಿತ್ರವಾಯಿತುಳ್ಳ ದೇವನೇ, ಇನ್ನನೆ ನ್ಯಾಯತೀರ್ಪ್ ಕೊಡ್‍ಪಕ್ ನೀನ್ ನೀತಿವಂತಂವೊನಾಯಿತುಳ್ಳಿಯ.

⁶ಅಯಿಂಗ ದೇವಡ ಮಕ್ಕಡ ಚೋರೆನ, ಪ್ರವಾದಿಯಡ ಚೋರೆನ ಚೆಲ್ಲ್‌ನಗುಂಡ್, ನೀನ್ ಅಯಿಂಗಕ್ ಕುಡಿಪಕಾಯಿತ್ ಚೋರೆನ ಕೊಡ್‍ತಿಯ; ಅದ್ಂಗ್ ಅಯಿಂಗ ಯೋಗ್ಯವಾಯಿತುಂಡ್‍ೕಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್.

⁷ಬಲಿಪೀಠತ್‍ಲ್ ಇಂಜ ಬೋರೆ ಒಬ್ಬ: ಅಕ್ಕು, ಸರ್ವ ಶಕ್ತಿವಂತಂವೊನಾಯಿತುಳ್ಳ ದೇವಾದಿ ದೇವನೇ, ನೀಡ ನ್ಯಾಯತೀರ್ಪ್ ಸತ್ಯವು ನೀತಿವಂತದೂಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್.

⁸ನಾಲೆನ ದೂತ ತಾಂಡ ಪಾತ್ರತ್‍ಲ್ ಉಳ್ಳದ್‍ನ ಸೂರ್ಯಂಡ ಮೇಲೆ ಬೂಕ್‍ಚಿ. ಅಕ್ಕ, ತಿತ್ತ್‌ರಗುಂಡ್ ಮನುಷ್ಯಂಗಳ ಬೇವಿಚಿಡ್‌ವಕ್ ಅದ್ಂಗ್ ಅದಿಕಾರ ಕ್‍ಟ್ಟ್‌ಚಿ.

⁹ಅಕ್ಕ ಮನುಷ್ಯಂಗ ಬಲ್ಯ ಉರಿಲ್ ಬೆಂಜಿಪೋಪನೆಕೆ ಇಂಜತೇಂಗಿಯು, ಈ ತರ ಬಾದೇನ ಮಾಡ್‌ವಕ್ ಅದಿಕಾರ ಉಳ್ಳ ದೇವಡ ಪೆದಕ್ ದೂಷಣೆ ಎಣ್ಣ್‌ನದಲ್ಲತೆ, ಅಂವೊಂಗ್ ಮಹಿಮೆ ಕೊಡ್‍ಪನೆಕೆ ಪಶ್ಚಾತಾಪ ಪಟ್ಟಿತ್‌ಲ್ಲೆ.

¹⁰ಅಂಜನೆ ದೂತ ತಾಂಡ ಪಾತ್ರತ್‍ಲ್ ಉಳ್ಳದ್‍ನ ಮೃಗತ್‍ರ ಸಿಂಹಾಸನತ್‍ರ ಮೇಲೆ ಬೂಕ್‍ಚಿ. ಅಕ್ಕ ಅದ್ಂಡ ರಾಜ್ಯ ಇರ್‌ಟಾಯಿ ಪೋಚಿ;

¹¹ಅಯಿಂಗ ಕಷ್ಟತ್‍ರಗುಂಡ್ ನಾವ್‌ನ ಕಡಿಚಂಡ್, ಅಯಿಂಗಡ ಪುಣ್ಣ್‌ರ ನೊಂಬಲತ್‍ರಗುಂಡ್ ಅಯಿಂಗಕ್ ಆನ ಕಷ್ಟತ್‍ಲ್, ಪರಲೋಕತ್‍ರ ದೇವನ ದೂಷಣೆ ಮಾಡಿಯಂಡ್ ಇಂಜದಲ್ಲತೆ, ಅಯಿಂಗಡ ಕ್ರಿಯೇನ ಬುಟ್ಟಿತ್ ಪಶ್ಚಾತಾಪ ಪಟ್ಟಿತ್‌ಲ್ಲೆ.

¹²ಆರನೆ ದೂತ ತಾಂಡ ಪಾತ್ರತ್‍ಲ್ ಉಳ್ಳದ್‍ನ ಯೂಫ್ರೇಟೀಸ್ ಎಣ್ಣುವ ಬಲ್ಯ ಪೊಳೆರ ಮೇಲೆ ಬೂಕ್‍ಚಿ. ಅಕ್ಕ ಕ್‍ೕಕ್ ದಿಕ್ಕ್‌ಂಜ ಬಪ್ಪ ರಾಜಂಗಕ್ ಬಟ್ಟೆ ತಯಾರಾಪನೆಕೆ ಪೊಳೇಲ್ ಇಂಜ ನೀರ್ ಬತ್ತಿ ಪೋಚಿ.

¹³ಆ ಸಮಯತ್‍ಲ್, ಘಟಸರ್ಪತ್‍ರ ಬಾಯಿಂಜ, ಮೃಗತ್‍ರ ಬಾಯಿಂಜ, ಪಿಂಞ ಕಳ್ಳ ಪ್ರವಾದಿಯಡ ಬಾಯಿಂಜ ಕಪ್ಪೇರನೆಕೆ ಉಳ್ಳ ಮೂಂದ್ ಕೂಳಿಯ ಪೊರಟಿತ್ ಬಪ್ಪಾನ ಕಂಡಿಯೆ.

¹⁴ಅಯಿಂಗ ಅದ್ಬುದ ಮಾಡ್‌ವ ಕೂಳಿಯಂಗ; ಬೂಲೋಕತ್‍ಲ್ ಉಳ್ಳ ರಾಜಂಗಡ ಪಕ್ಕ ಪೋಯಿತ್ ಸರ್ವ ಶಕ್ತನಾಯಿತ್ ಉಳ್ಳ ದೇವಡ ಮಹಾ ದಿವಸತ್‍ಲ್ ಆಪ ಯುದ್ದಕ್ ಅಯಿಂಗಳ ಕೂಟ್‍ವಕಾಯಿತ್ ಪೊರಟಿತ್ ಪೋಚಿ.

¹⁵ನೋಟಿ! ನಾನ್ ಕಳ್ಳ ಬಪ್ಪನೆಕೆ ಬಪ್ಪಿ. ಞಾಣ ಆಪನೆಕೆ, ಬೆತ್ತಲೆಯಾಯಿತ್ ಇಕ್ಕತೆ, ಎಚ್ಚರತ್‍ಲ್ ಇಂಜಂಡ್ ತಾಂಡ ಬಟ್ಟೇನ ಕಾಪಾಡ್‌ವಂವೊ ಆಶೀರ್ವಾದ ಪಡ್ಂದಂವೊ.

¹⁶ಆ ಕೂಳಿಯ, ರಾಜಂಗಳ ಎಲ್ಲಾ ಕೂಟಿಯಂಡ್, ಇಬ್ರಿಯ ತಕ್ಕ್‌ಲ್ ಹರ್ಮಗೆದೋನ್ ಎಣ್ಣುವ ಜಾಗಕ್ ಕಾಕಿಯಂಡ್ ಪೋಚಿ.

¹⁷ಏಳನೆ ದೂತ ತಾಂಡ ಪಾತ್ರತ್‍ಲ್ ಉಳ್ಳದ್‍ನ ಬಾನತ್‍ರ ಮೇಲೆ ಬೂಕ್‍ಚಿ. ಅಕ್ಕ ಪರಲೋಕತ್‍ಲ್ ಇಂಜ ದೇವಾಲಯತ್‍ರ ಸಿಂಹಾಸನತ್ಂಜ ತ್‍ೕಂದತ್‍ೕಂದ್ ಬಲ್ಯ ಸದ್ದ್ ಪೊರಟಿತ್ ಬಾತ್.

¹⁸ಅದಲ್ಲತೆ ಬಲ್ಯ ವಾಣಿ, ಬಲ್ಯ ಗುಡ್‍ಗ್, ಬಲ್ಯ ಮಿಂಚ್, ಮಹಾ ಬೂಕಂಪ ಉಂಟಾಚಿ. ಮನುಷ್ಯಂಗ ಬೂಮಿಲ್ ವಾಸ ಮಾಡ್‌ವಕ್ ಸುರು ಮಾಡ್‍ನ ಕಾಲತ್ಂಜ ಇನ್ನನೆ ಒರ್ ಬೂಕಂಪವು ಆಯಿತ್‌ಲ್ಲೆ, ಅಚ್ಚಕ್ ಬಲ್ಯ ಬೂಕಂಪವಾಯಿತ್ಂಜತ್.

¹⁹ಅಕ್ಕ, ಮಹಾ ಪಟ್ಟಣ ಮೂಂದ್ ಬಾಗವಾಯಿತ್ ಒಡಂದತ್, ದೇವಡ ಮಕ್ಕ ಅಲ್ಲತಯಿಂಗಡ ಪಟ್ಟಣವೆಲ್ಲ ಬುದ್ದತ್. ದೇವಡ ಬಲ್ಯ ಚೆಡಿರ ಕಳ್ಳ್ ದುಂಬ್‍ನ ಪಾತ್ರತ್‍ನ, ಮಹಾ ಬಾಬೆಲಂಗ್ ಕೊಡ್‍ಪಕ್ ದೇವಡ ಗೇನಕ್ ಕೊಂಡ್ ಬಾತ್.

²⁰ಎಲ್ಲಾ ದ್ವೀಪವು ಕಾಂಗತೆ ಆಯಿಪೋಚಿ; ಕುಂದ್ ಎಲ್ಲಾ ಕಾಂಗತೆ ಆಯಿಪೋಚಿ.

²¹ಬಾನತ್ಂಜ ಮನುಷ್ಯಂಗಡ ಮೇಲೆ ಬಲ್ಯ ಬಲ್ಯ ಆಲಿಕಾಯಿ ಮಳೆ ಪೊಜ್ಜತ್. ಆ ಆಲಿಕಾಯಿರ ತೂಕ ಸುಮಾರ್ ನಾಪತ ಅಂಜ್ ಕಿಲೋಕ್ ಜಾಸ್ತಿಯಾಯಿತ್ ಇಂಜತ್. ಆ ಆಲಿಕಾಯಿರ ಮಳೇರಗುಂಡ್ ಆನ ಬಾದೆ ದುಂಬ ಬಯಂಕರವಾಯಿತ್ಂಜಗುಂಡ್ ಮನುಷ್ಯಂಗ ದೇವಕ್ ದೂಷಣೆ ಎಣ್ಣ್‌ಚಿ.