Read Kodava ಪ್ರಕಟನೆ 2 Bible Online

ಪ್ರಕಟನೆ 2 - Kodava bible

ಪ್ರಕಟನೆ 2

¹ಎಫೆಸ ಪಟ್ಟಣತ್‍ಲ್ ಉಳ್ಳ ಸಬೆರ ದೂತಂಗ್ ಒಳ್‍ದ್‍ವಕುಳ್ಳದ್ ಎಂತ ಎಣ್ಣ್‌ಚೇಂಗಿ: ಏಳ್ ನಕ್ಷತ್ರತ್‍ನ ತಾಂಡ ಬಲ್‌ತೆ ಕೈಯಿಲ್ ಪುಡ್‍ಚಂಡ್, ಏಳ್ ಕುತ್ತ್ ಬೊಳ್‍ಚತ್‍ರ ಮದ್ಯತ್‍ಲ್ ಸುತ್ತಿಯಂಡ್ ಉಳ್ಳಂವೊ ಇದ್‍ನ ಎಣ್ಣಿಯಂಡುಳ್ಳ.

²ನೀಡ ಕ್ರಿಯೇನ, ನೀಡ ಪ್ರಯತ್ನತ್‍ನ, ನೀಡ ಪೊರುಮೆನ, ಕೊಳ್ಳತಯಿಂಗಳ ನೀನ್ ಸಹಿಸಿಯಂಡ್ ಇಪ್ಪಕ್ ಕಯ್ಯತ ಇಪ್ಪದ್‍ನ, ಪಿಂಞ ಅಪೊಸ್ತಲ ಅಲ್ಲತಯಿಂಗ ನಂಗ ಅಪೊಸ್ತಲಂಗಾಂದ್ ಎಣ್ಣುವದ್‍ನ ಪರೀಕ್ಷೆ ಮಾಡಿತ್ ಅಯಿಂಗ ಪೊಟ್ಟ್ ಪರ್ಂದಂಡ್ ಉಂಡ್‍ೕಂದ್ ನೀನ್ ಗೊತ್ತ್ ಮಾಡ್‍ನದೆಲ್ಲಾ ನಾಕ್ ಗೊತ್ತುಂಡ್.

³ಪಿಂಞ ನೀಡ ಸಹಿಸುವ ಗುಣತ್‍ನ, ಪೊರುಮೆನ ಪಿಂಞ ನಾಡ ಪೆದಕಾಯಿತ್ ಚೋತ್ ಪೋಕತೆ ಪ್ರಯತ್ನ ಪಡ್‍ವದ್ ಸಹ ನಾಕ್ ಗೊತ್ತುಂಡ್.

⁴ಆಚೇಂಗಿಯು, ನೀಡ ಮೇಲೆ ಚೆನ್ನ ವಿಷಯತ್‍ಲ್ ನಾಕ್ ಕುತ್ತ ಪರಿಯುವನೆಕೆ ಉಂಡ್. ಎನ್ನಂಗೆಣ್ಣ್‌ಚೇಂಗಿ, ನಾಡ ಮೇಲೆ ಬೆಚ್ಚಿತ್ಂಜ ಆದ್ಯ ಪ್ರೀತಿನ ನೀನ್ ಬುಟ್ಟಿಯ.

⁵ಆನಗುಂಡ್, ನೀನ್ ಎಲ್ಲಿ ಬುದ್ದ್ ಪೋಯಿತುಳ್ಳಿಯಾಂದ್ ಗೇನ ಮಾಡಿತ್, ಪಶ್ಚಾತಾಪ ಪಟ್ಟಿತ್, ಸುರುಲ್ ಮಾಡಿಯಂಡಿಂಜ ಕ್ರಿಯೇನ ಮಾಡ್; ಇಲ್ಲತೆಪೋಚೇಂಗಿ, ನಾನ್ ಬೆರಿಯ ನೀಡ ಪಕ್ಕ ಬಂದಿತ್, ನೀನ್ ಪಶ್ಚಾತಾಪ ಪಡತೆ ಪೋನಕ, ನೀಡ ಬೊಳ್‍ಚತ್‍ರ ತಂಡ್‍ನ ಆ ಜಾಗತ್ಂಜ ಎಡ್‍ತ್‍ರ್‍ವಿ.

⁶ಆಚೇಂಗಿಯು, ನಾನ್ ದ್ವೇಶ ಮಾಡ್‌ವ ನಿಕೊಲಾಯಿ[4] ಎಣ್ಣುವ ಗುಂಪ್‍ರ ಕ್ರಿಯೇನ ನೀನ್ ದ್ವೇಶ ಮಾಡಿಯಂಡುಂಡ್, ಅದ್ ನೀಡ ನಲ್ಲದಂಗಾಯಿ‍ತೇ, ಅದ್ ನೀಡಲ್ಲಿ ಉಂಡ್.

⁷ಪವಿತ್ರಾತ್ಮ ಸಬೇಕ್ ಎಣ್ಣಿಯಂಡುಳ್ಳದ್‍ನ ಕ್‍ೕಪಕ್ ಕೆಮಿ ಉಳ್ಳಂವೊ ಕ್‍ೕಕಡ್; ದಾರೆಲ್ಲಾ ಗೆಲ್ಲುವ, ಅಂವೊಂಗ್ ದೇವಡ ಪರದೈಸಿರ[5] ಮದ್ಯತ್‍ಲ್ ಉಳ್ಳ ಜೀವತ್‍ರ ಪಣ್ಣ್‌ನ ತಿಂಬಕ್ ಕೊಡ್‍ಪಿ. ಇನ್ನನೆ ಒಳ್‍ದ್.

⁸ಸ್ಮುರ್ನ ಪಟ್ಟಣತ್‍ಲ್ ಉಳ್ಳ ಸಬೆರ ದೂತಂಗ್ ಒಳ್‍ದ್‍ವಕುಳ್ಳದ್ ಎಂತ ಎಣ್ಣ್‌ಚೇಂಗಿ: ಆದ್ಯವಾಯಿತ್ ಉಳ್ಳಂವೊನು, ಆಕೀರ್ ಆಯಿತ್ ಉಳ್ಳಂವೊನು, ಚತ್ತಯಿಂಗಡ ಮದ್ಯತ್ಂಜ ಜೀವತ್‍ಲ್ ಬಂದಿತ್ ಬದ್‍ಕಿಯಂಡ್ ಇಪ್ಪಂವೊನಾಯಿತುಳ್ಳಂವೊ ಎಣ್ಣಿಯಂಡುಳ್ಳ.

⁹ನೀಕುಳ್ಳ ಹಿಂಸೆನ ಪಿಂಞ ನೀನ್ ಐಶ್ವರ್ಯವಂತಂವೊನಾಯಿತ್ ಇಂಜತೇಂಗಿಯು ಗರೀಬನಾಯಿತ್ ಇಪ್ಪದ್ ನಾಕ್ ಗೊತ್ತುಂಡ್. ಪಿಂಞ ಯೆಹೂದ್ಯಂಗಾಂದ್ ಎಣ್ಣ್‌ಚೇಂಗಿಯು ಯೆಹೂದ್ಯ ಅಲ್ಲತಯಿಂಗಳಾಯಿತ್ ಅಯಿಂಗ ಎಣ್ಣುವ ದೂಷಣೆ ನಾಕ್ ಗೊತ್ತುಂಡ್. ಅಯಿಂಗ ಸೈತಾನಂಡ ಸಬಾಮಂದಿರಕ್ ಕೂಡ್‍ನಯಿಂಗಳಾಯಿತುಂಡ್.

¹⁰ನೀಕ್ ಬಪ್ಪಕುಳ್ಳ ಕಷ್ಟತ್‍ರ ವಿಷಯತ್ ನೀಕ್ ಏದ್ ಪೋಡಿಯು ಬೋಂಡ; ಇದಾ, ನಿಂಗಳ ಪರೀಕ್ಷೆ ಮಾಡ್‌ವಕಾಯಿತ್ ಸೈತಾನ ನಿಂಗಡಲ್ಲಿ ಚೆನ್ನ ಜನಳ ಜೈಲ್‌ಕ್ ಇಡ್‌ವ, ಪತ್ತ್ ದಿನ ಹಿಂಸೆ ಪಡ್‌ವಿರ. ಆಚೇಂಗಿ ಚಾವಕತ್ತನೆ ನಂಬಿಕಸ್ತಂಗಳಾಯಿತಿರಿ. ಅಕ್ಕ, ಜೀವತ್‍ರ ಕಿರೀಟತ್‍ನ ನೀಕ್ ತಪ್ಪಿ.

¹¹ಪವಿತ್ರಾತ್ಮ ಸಬೇಕ್ ಎಣ್ಣಿಯಂಡುಳ್ಳದ್‍ನ ಕ್‍ೕಪಕ್ ಕೆಮಿ ಉಳ್ಳಂವೊ ಕ್‍ೕಕಡ್; ದಾರೆಲ್ಲಾ ಗೆಲ್ಲುವ, ಅಯಿಂಗ ದಂಡನೆ ಚಾವ್‍ರಗುಂಡ್ ಪಾಳಾಯಿ ಪೋಪುಲೆ. ಇನ್ನನೆ ಒಳ್‍ದ್.

¹²ಪೆರ್ಗಮ ಪಟ್ಟಣತ್‍ಲ್ ಉಳ್ಳ ಸಬೆರ ದೂತಂಗ್ ಒಳ್‍ದ್‍ವಕುಳ್ಳದ್ ಎಂತ ಎಣ್ಣ್‌ಚೇಂಗಿ: ದಂಡ್ ಪಕ್ಕವು ಚೂಪಾಯಿತುಳ್ಳ ಬಾಳ್ ಕತ್ತಿನ ಪುಡ್‍ಚಂಡ್ ಉಳ್ಳಂವೊ ಎಣ್ಣಿಯಂಡುಳ್ಳ.

¹³ನೀಡ ಕ್ರಿಯೆ, ಸೈತಾನಂಡ ಸಿಂಹಾಸನ ಇಪ್ಪ ಜಾಗತ್‍ಲ್ ನೀನ್ ವಾಸ ಮಾಡಿಯಂಡುಳ್ಳದ್ ಪಿಂಞ ನೀನ್ ನಾಡ ಪೆದತ್‍ನ ಪುಡ್‍ಚಂಡ್ ಇಪ್ಪದೆಲ್ಲ ನಾಕ್ ಗೊತ್ತುಂಡ್. ಅದಲ್ಲತೆ, ಸೈತಾನ ವಾಸಮಾಡಿಯಂಡುಳ್ಳ ಜಾಗತ್‍ಲ್ ನಿಂಗಡಲ್ಲಿ ನಾಡ ನೇರಾನ ಸಾಕ್ಷಿಯಾನ ಅಂತಿಪ ಎಣ್ಣ್‌ವಂವೊ ನಿಂದಗುಂಡ್, ಅಂವೊನ ಕೊಂದ್‍ರ್‌ತ್. ಅಕ್ಕ ನೀನ್ ನಾಡ ಮೇಲೆ ಇಂಜ ನಂಬಿಕೇನ ಬುಡತೆ ಇಂಜ ವಿಷಯವು ನಾಕ್ ಗೊತ್ತುಂಡ್.

¹⁴ಆಚೇಂಗಿಯು, ನೀಡ ಮೇಲೆ ಚೆನ್ನ ವಿಷಯತ್ ನಾಕ್ ಕುತ್ತ ಪರಿಯುವನೆಕೆ ಉಂಡ್; ಇಸ್ರಾಯೇಲ್ ಜನ ವಿಗ್ರಹಕ್ ಅರ್ಪಿಚಿಟ್ಟದ್‍ನ ತಿಂಬಕು, ವ್ಯಬಿಚಾರ ಮಾಡ್‌ವಕು ಕಾರಣವಾಯಿತ್ಂಜ ಬಾಲಾಕ ಎಣ್ಣುವ ರಾಜಂಗ್ ವಂಚನೆರ ಬೋದನೆ ಮಾಡ್‍ನ ಪ್ರವಾದಿಯಾನ ಬಿಳಾಮ ಎಣ್ಣ್‌ವಂವೊಂಡ ಬೋದನೆರ ಪ್ರಕಾರ ನಡ್‍ಪಯಿಂಗಳು ನೀಡ ಕೂಡೆ ಉಂಡ್.

¹⁵ಅನ್ನನೆ ನಿಕೊಲಾಯಿ ಎಣ್ಣುವ ಗುಂಪ್‍ರ ಬೋದನೆರ ಪ್ರಕಾರ ನಡ್‍ಪಯಿಂಗಳು ನೀಡ ಕೂಡೆ ಉಂಡ್; ಅದ್‍ನ ನಾನ್ ವಿರೋದಿಚಿಡುವಿ.

¹⁶ಆನಗುಂಡ್, ಇಕ್ಕ ನೀನ್ ಪಶ್ಚಾತಾಪ ಪಡ್, ಇಲ್ಲತೆಪೋಚೇಂಗಿ ನಾನ್ ನೀಡ ಪಕ್ಕ ಬೆರಿಯ ಬಂದಿತ್, ನಾಡ ಬಾಯಿಂಜ ಬಪ್ಪ ಬಾಳ್‍ರಗುಂಡ್ ಅಯಿಂಗಡ ಕೂಡೆ ಯುದ್ದ ಮಾಡ್‌ವಿ.

¹⁷ಪವಿತ್ರಾತ್ಮ ಸಬೇಕ್ ಎಣ್ಣಿಯಂಡುಳ್ಳದ್‍ನ ಕ್‍ೕಪಕ್ ಕೆಮಿ ಉಳ್ಳಂವೊ ಕ್‍ೕಕಡ್; ದಾರೆಲ್ಲಾ ಗೆಲ್ಲುವ, ಅಯಿಂಗಕ್, ನಾನ್ ಮುಚ್ಚಿತ್ ಬೆಚ್ಚಿತುಳ್ಳ ಮನ್ನಾನ ತಿಂಬಕ್ ಕೊಡ್‌ತಿತ್, ಅಂವೊಂಗ್ ಬೊಳ್‍ತ ಗುರ್‍ತ್‍ರ ಕಲ್ಲ್‌ನ ಕೊಡ್‍ಪಿ. ಆ ಕಲ್ಲ್‌ಲ್ ಒಳ್‍ದಿತುಳ್ಳದ್‍ನ, ಆ ಕಲ್ಲ್ ಕ್‍ಟ್ಟ್‌ನಂವೊಂಗ್ ಅಲ್ಲತೆ ಬೋರೆ ಒಬ್ಬಂಗು ಗೊತ್ತಾಪಕ್ಕಾಗತ ಪುದಿಯ ಪೆದತ್‍ನ ಅಂವೊಂಗ್ ಕೊಡ್‍ಪಿ. ಇನ್ನನೆ ಒಳ್‍ದ್.

¹⁸ಥುವತೈರ ಪಟ್ಟಣತ್‍ಲ್ ಉಳ್ಳ ಸಬೆರ ದೂತಂಗ್ ಒಳ್‍ದ್‍ವಕುಳ್ಳದ್ ಎಂತ ಎಣ್ಣ್‌ಚೇಂಗಿ: ತಿತ್ತ್‌ರ ಜ್ವಾಲತ್‌ರನೆಕೆ ಕಣ್ಣ್ ಪಿಂಞ ಮಿನ್ನುವ ಬೊಳಿಯುಳ್ಳ ಪಿಚ್ಚೋಳೆರನೆಕೆ ಉಳ್ಳ ಕಾಲ್‍ರ ಅಡಿಯುಳ್ಳ ದೇವಡ ಮೋಂವೊ ಎಣ್ಣಿಯಂಡುಳ್ಳ.

¹⁹ನೀಡ ಕ್ರಿಯೇನ, ನೀಡ ಪ್ರೀತಿನ, ನೀಡ ಸೇವೇನ, ನೀಡ ನಂಬಿಕೇನ, ನೀಡ ಪೊರುಮೆನ, ನೀನ್ ಮಿಂಞ ಮಾಡಿಯಂಡಿಂಜ ಕ್ರಿಯೇಕಿಂಜ ಇಕ್ಕ ಮಾಡ್‍ನ ಕ್ರಿಯೆ ದುಂಬ ಉಂಡ್‍ೕಂದ್ ನಾಕ್ ಗೊತ್ತುಂಡ್.

²⁰ಆಚೇಂಗಿಯು, ನೀಡ ಮೇಲೆ ಚೆನ್ನ ವಿಷಯತ್ ನಾಕ್ ಕುತ್ತ ಪರಿಯುವನೆಕೆ ಉಂಡ್; ಅದ್ ಎಂತ ಎಣ್ಣ್‌ಚೇಂಗಿ, ಯೆಜೆಬೇಲಾಂದ್[6] ಎಣ್ಣುವ ಒರ್ ಪೊಣ್ಣಾಳ್, ನಾನೇ ಪ್ರವಾದೀಂದ್ ಎಣ್ಣಿಯಂಡ್, ನಾಡ ಸೇವಕಂಗ ವ್ಯಬಿಚಾರ ಪಾಪ ಮಾಡ್‌ವಕು, ವಿಗ್ರಹಕ್ ಅರ್ಪಿಚಿಟ್ಟದ್‍ನ ತಿಂಬಕು ಬೋದನೆ ಮಾಡಿತ್, ಅಯಿಂಗಳ ವಂಚನೆ ಮಾಡ್‌ವಕ್ ನೀನ್ ಜಾಗ ಕೊಡ್‍ತಂಡುಂಡ್.

²¹ಅವ ಪಶ್ಚಾತಾಪ ಪಟ್ಟಿತ್ ಮನಸ್ಸ್ ತಿರ್‌ಗ್‌ವಕ್ ನಾನ್ ಅವಕ್ ಅವಕಾಶ ಕೊಡ್‌ತಿಯೆ; ಆಚೇಂಗಿ, ತಾಂಡ ವ್ಯಬಿಚಾರತ್‍ನ ಬುಟ್ಟಿತ್ ಪಶ್ಚಾತಾಪ ಪಟ್ಟಿತ್ ಮನಸ್ಸ್ ತಿರ್‌ಗ್‌ವಕ್ ಅವಕ್ ಕುಶಿಯಿಲ್ಲೆ.

²²ಇದಾ, ನಾನ್ ಅವಳ ಕಾಯಿಲೆಕಾರಳಾಯಿತ್ ಮಾಡ್‌ವಿ. ಅವಡ ಕೂಡೆ ವ್ಯಬಿಚಾರ ಮಾಡ್‌ವಯಿಂಗ ಅಯಿಂಗಡ ಕ್ರಿಯೇನ ಬುಟ್ಟಿತ್ ಪಶ್ಚಾತಾಪ ಪಡತೆ ಪೋನಕ, ಅಯಿಂಗಳ ಸಹ ದುಂಬ ಬಲ್ಯ ಕಷ್ಟತ್‍ಲ್ ಇಡ್‌ವಿ.

²³ಅವಡ ಮಕ್ಕಳ ಚಾವನೆಕೆ ಕೊಲ್ಲುವಿ; ಅಕ್ಕ ನಾನ್ ಮಾತ್ರ ಹೃದಯತ್‍ರ ಪಿಂಞ ಮನಸ್ಸ್‌ರ ಆಳತ್‍ನ ಚಾಯಿ ಪರೀಕ್ಷೆ ಮಾಡ್‌ವಂವೊನಾಯಿತ್ ಉಳ್ಳ್‌ಂದ್ ಎಲ್ಲಾ ಸಬೇಕು ಗೊತ್ತಾಪ. ಅದಲ್ಲತೆ ನಿಂಗಡಲ್ಲಿ ಒಬ್ಬೊಬ್ಬಂಗು ಅಯಿಂಗಯಿಂಗಡ ಕ್ರಿಯೇಕ್ ತಕ್ಕಂತ ಫಲತ್‍ನ ತಪ್ಪಿ.

²⁴ಥುವತೈರ ಸಬೇಲ್ ಉಳ್ಳ ಬೋರೆಯಿಂಗಕ್ ನಾನ್ ಎಣ್ಣುವದ್ ಎಂತ ಎಣ್ಣ್‌ಚೇಂಗಿ: ನಿಂಗ ಅವಡ ಬೋದನೆರ ಪ್ರಕಾರ ನಡ್‍ಕತೆ, ಸೈತಾನಂಡ ಆಳತ್‍ರ ಗುಟ್ಟ್‍ೕಂದ್ ಎಣ್ಣಿಯಂಡುಳ್ಳದ್‍ನ ಪಡಿಕತೆ ಉಳ್ಳಿರಲ್ಲ. ನಿಂಗಡ ಮೇಲೆ ಬೋರೆ ಏದ್ ಬಾರತ್‍ನ ನಾನ್ ಇಡುಲೆ.

²⁵ನಿಂಗ ಎಂತ ನಲ್ಲದ್‍ನ ಮಾಡಿಯಂಡ್ ಉಂಡೋ ಅದ್‍ನ ನಾನ್ ಬಪ್ಪಕತ್ತನೆ ಗಟ್ಟಿಯಾಯಿತ್ ಪುಡ್‍ಚೊಳಿ.

²⁶ದಾರೆಲ್ಲಾ ಗೆಲ್ಲುವ ಪಿಂಞ ಆಕೀರ್‌ಕತ್ತನೆ ನಾಡ ಕ್ರಿಯೇಲ್ ನಡ್‍ಪ, ಅಯಿಂಗಕ್ ಎಲ್ಲಾ ಜನಡಮೇಲೆ ಅದಿಕಾರ ತಪ್ಪಿ.

²⁷ಅಂವೊ ಅಯಿಂಗಳ ಇರ್‍ಂಬ್‍ರ ಕೋಲ್‍ರಗುಂಡ್ ರಾಜ್ಯಬಾರ ಮಾಡ್‌ವ; ಮಣ್ಣ್‌ರ ಪಾತ್ರತ್‍ರನೆಕೆ ಜನ ಒಡಂದ್ ಪೋಪ.

²⁸ನಾನ್ ನಾಡ ಅಪ್ಪನಾನ ದೇವಡ ಕಡೇಯಿಂಜ ಅದಿಕಾರ ಪಡ್ಂದನೆಕೆ, ಅಂವೊಂಗ್ ಅದಿಕಾರ ಕೊಡ್‌ತಿತ್, ಪೊಲಾಕತ್‍ರ ನಕ್ಷತ್ರತ್‍ನ ಸಹ ತಪ್ಪಿ.

²⁹ಪವಿತ್ರಾತ್ಮ ಸಬೇಕ್ ಎಣ್ಣಿಯಂಡುಳ್ಳದ್‍ನ ಕ್‍ೕಪಕ್ ಕೆಮಿ ಉಳ್ಳಂವೊ ಕ್‍ೕಕಡ್. ಇನ್ನನೆ ಒಳ್‍ದ್.