Read Kodava ಪ್ರಕಟನೆ 21 Bible Online

ಪ್ರಕಟನೆ 21 - Kodava bible

ಪ್ರಕಟನೆ 21

¹ಅಲ್ಲಿಂಜ ಪುದಿಯ ಬಾನ ಪಿಂಞ ಪುದಿಯ ಬೂಮಿನ ಕಂಡಿಯೆ; ಮಿಂಞತ್‍ರ ಬಾನ ಮಿಂಞತ್‍ರ ಬೂಮಿ ಇಲ್ಲತೆ ಆಯಿಪೋಚಿ; ಸಮುದ್ರ ಸಹ ಇಲ್ಲತೆ ಆಯಿಪೋಚಿ

²ಪಿಂಞ, ಪರಲೋಕತ್ಂಜ ಪವಿತ್ರ ಪಟ್ಟಣವಾನ ಪುದಿಯ ಯೆರೂಸಲೇಮ್ ದೇವಡ ಕಡೇಯಿಂಜ ಇಳಿಂಜಿ ಬಪ್ಪದ್‍ನ ನಾನ್ ಕಂಡಿಯೆ. ಅದ್ ತಾಂಡ ಮಂಗಲಕಾರಂಗಾಯಿತ್ ಅಲಂಕಾರ ಮಾಡಿತ್ಂಜ ಮಂಗಲಕರ್ತಿರನೆಕೆ ಇಂಜತ್.

³ಸಿಂಹಾಸನತ್ಂಜ ಒರ್ ಬಲ್ಯ ಸದ್ದ್ ನಾಕ್ ಕ್‍ೕಟತ್: ನೋಟಿ, ಮನುಷ್ಯಂಡ ಮದ್ಯತ್‍ಲ್ ದೇವ ವಾಸ ಮಾಡ್‌ವ ಜಾಗ ಉಂಡ್, ಅಯಿಂಗಡಲ್ಲಿ ಅಂವೊ ವಾಸ ಮಾಡಿಯಂಡಿಪ್ಪ; ಅಯಿಂಗ ಅಂವೊಂಡ ಜನವಾಯಿತ್‌ಪ್ಪ, ದೇವ ತಾನೆ ಅಯಿಂಗಡ ಕೂಡೆ ಇಂಜಿತ್ ಅಯಿಂಗಡ ದೇವನಾಯಿತ್‌ಪ್ಪ.

⁴ದೇವ ಅಯಿಂಗಡ ಕಣ್ಣೀರ್‌ನೆಲ್ಲಾ ತ್‍ೕ‍ಟ್‍ವ. ಇಂಞು ಮಿಂಞಕ್ ಚಾವ್ ಎಣ್ಣುವದ್ ಇಪ್ಪುಲೆ. ಇಂಞು ದುಃಖ, ಗೋಳಾಟ, ಕಷ್ಟ ಎಣ್ಣುವದ್ ಇಪ್ಪುಲೆ; ಮಿಂಞ ಇಂಜದೆಲ್ಲಾ ಇಲ್ಲತೆ ಆಯಿಪೋಚೀಂದ್ ಎಣ್ಣ್‌ಚಿ.

⁵ಸಿಂಹಾಸನತ್‍ಲ್ ಅಳ್‌ತಿತ್ ಇಂಜಂವೊ: ನೋಟಿ, ನಾನ್ ಎಲ್ಲಾನ ಪುದಿಯದಾಯಿತ್ ಮಾಡಿಯಂಡುಳ್ಳ್‌ಂದ್ ಎಣ್ಣ್‌ಚಿ, ಪುನಃ ಅಂವೊ: ಈ ತಕ್ಕ್ ಎಲ್ಲಾ ಸತ್ಯವು ನೇರಾನದು ಆಯಿತುಳ್ಳಗುಂಡ್ ಒಳ್‌ದ್‍ೕಂದ್ ಎಣ್ಣ್‌ಚಿ.

⁶ಇದ್‍ಲ್ಲತೆ, ಅಂವೊ ನನ್ನ ನೋಟಿತ್: ಎಲ್ಲಾ ತ್‍ೕಂದತ್, ನಾನ್ ಅಲ್ಫಾವಾಯಿತು ಓಮೆಗವಾಯಿತು, ಆದ್ಯವಾಯಿತು ಆಕೀರಾಯಿತು ಉಳ್ಳ. ಬಾಯರಿಕೆಲ್ ಉಳ್ಳಂವೊಂಗ್, ಜೀವತ್‍ರ ಜಲ ನೀರ್‍ಯಿಂಜ ನಾನ್ ಇನಾಮಾಯಿತ್ ನೀರ್‌ನ ಕುಡಿಪಕ್ ತಪ್ಪಿ.

⁷ದಾರೆಲ್ಲಾ ಗೆಲ್ಲುವ ಅಯಿಂಗ, ಎಲ್ಲಾಂಗು ಬಾದ್ಯಕಾರಂಗಳಾಯಿತ್ ಇಪ್ಪ. ನಾನ್ ಅಂವೊಂಡ ದೇವನಾಯಿತಿಪ್ಪಿ ಅಂವೊ ನಾಡ ಮೋಂವೊನಾಯಿತ್‌ಪ್ಪ.

⁸ಆಚೇಂಗಿ, ಬೊತ್ತಿಯಂಡುಳ್ಳಯಿಂಗಳು, ನಂಬಿಕೆ ಇಲ್ಲತಯಿಂಗಳು, ಅಶುದ್ದವಾಯಿತುಳ್ಳಯಿಂಗಳು, ಕೊಲೆ ಮಾಡ್‌ವಯಿಂಗಳು, ವ್ಯಬಿಚಾರ ಮಾಡ್‌ವಯಿಂಗಳು, ಮಾಟಮಂತ್ರ ಮಾಡ್‌ವಯಿಂಗಳು, ವಿಗ್ರಹ ಆರಾದನೆ ಮಾಡ್‌ವಯಿಂಗಳು, ಪೊಟ್ಟ್ ಪರಿಯುವ ಎಲ್ಲಾರು ದಂಡನೆ ಚಾವಾಯಿತುಳ್ಳ ಗಂಧಕತ್‍ಲ್ ತಿತ್ತ್ ಕತ್ತಿಯಂಡಿಪ್ಪ ಕಡಲ್‍ಲ್ ಪಾಲ್‍ದಾರಂಗಳಾಪಾಂದ್ ಎಣ್ಣ್‌ಚಿ.

⁹ಪಿಂಞ ಆಕೀರ್‌ಲ್ ಏಳ್ ಬಾದೆರಗುಂಡ್ ದುಂಬಿತ್ಂಜ ಏಳ್ ಪಾತ್ರತ್‍ನ ಪುಡ್‌ಚಂಡಿಂಜ ಆ ಏಳ್ ದೇವದೂತಂಗಡಲ್ಲಿ ಒಬ್ಬ ನಾಡ ಪಕ್ಕ ಬಂದಿತ್: ಇಲ್ಲಿ ಬಾ! ನಾನ್, ಕೊರಿಕುಟ್ಟಿಯಾನವೊಂಡ ಪೊಣ್ಣಾಪಕುಳ್ಳ ಮಂಗಲಕರ್ತಿನ ನೀಕ್ ಕಾಟಿತಪ್ಪೀಂದ್ ಎಣ್ಣ್‌ಚಿ.

¹⁰ಅಂವೊ ನನ್ನ, ಬಲ್ಯದಾಯಿತ್ಂಜ ಉದ್ದವಾಯಿತ್ಂಜ ಒರ್ ಕುಂದ್‌ಕ್ ಪವಿತ್ರಾತ್ಮತ್‍ಲ್ ಎಡ್‍ತಂಡ್ ಪೋಚಿ. ದೇವಡ ಕಡೇಯಿಂಜ ಇಳಿಂಜಿತ್ ಬಂದಂಡುಳ್ಳ ಮಹಿಮೆ ದುಂಬ್‍ನ ಪವಿತ್ರವಾನ ಯೆರೂಸಲೇಮ್ ಪಟ್ಟಣ ಪರಲೋಕತ್‌ನ ಬುಟ್ಟಿತ್ ಬಪ್ಪದ್‍ನ ನಾಕ್ ಕಾಟಿ ತಾತ್.

¹¹ಅದ್‍ಲ್ ದೇವಡ ಮಹಿಮೆ ಇಂಜತ್. ಆ ಪಟ್ಟಣತ್‍ರ ಬೊಳಿ, ಬಲ್ಯ ಬೆಲೆಯುಳ್ಳ ರತ್ನತ್‍ರ ಬೊಳಿ‍ರನೆಕೆಯು, ಪಳಪಳಾಂದ್ ಉಳ್ಳ ವಜ್ರತ್‍ರನೆಕೆಯು ಇಂಜತ್.

¹²ಆ ಪಟ್ಟಣಕ್ ಬಲ್ಯ ಉದ್ದವಾನ ಗೋಡೆ ಇಂಜತ್. ಅದ್ಂಗ್ ಪನ್ನೆರಂಡ್ ಬಾಯಿಕಂಡಿ ಇಂಜತ್. ಕ್‍ೕಕ್ ದಿಕ್ಕ್‌ಲ್ ಮೂಂದ್, ಬಡಕ್‌ ದಿಕ್ಕ್‌ಲ್ ಮೂಂದ್, ತೆಕ್ಕ್‌ ದಿಕ್ಕ್‌ಲ್ ಮೂಂದ್ ಪಿಂಞ ಪಡ್‍ಞಾರ್ ದಿಕ್ಕ್‌ಲ್ ಮೂಂದ್ ಇಂಜತ್.

¹³ಆ ಬಾಯಿಕಂಡಿರ ಪಕ್ಕ ಪನ್ನೆರಂಡ್ ದೇವದೂತಂಗ ಇಂಜತ್; ಆ ಬಾಯಿಕಂಡಿರ ಮೇಲೆ ಇಸ್ರಾಯೇಲಂಡ ಪನ್ನೆರಂಡ್ ಕುಲತ್‍ರ ಪೆದ ಒಳ್‍ದಿತ್ ಇಂಜತ್.

¹⁴ಆ ಪಟ್ಟಣತ್‍ರ ಗೋಡೆರ ಪನ್ನೆರಂಡ್ ಅಡಿಪಾಯತ್‍ರ ಕಲ್ಲ್ ಇಂಜತ್; ಅದ್ಂಡಮೇಲೆ, ಕೊರಿಕುಟ್ಟಿಯಾನವೊಂಡ ಪನ್ನೆರಂಡ್ ಅಪೊಸ್ತಲಂಗಡ ಪನ್ನೆರಂಡ್ ಪೆದ ಇಂಜತ್.

¹⁵ನಾಡ ಕೂಡೆ ತಕ್ಕ್ ಪರ್‌ದಂಡ್ ಇಂಜಂವೊ, ಆ ಪಟ್ಟಣತ್‍ನ, ಅದ್ಂಡ ಬಾಯಿಕಂಡಿ‍ನ ಅಳ್‌ತೆ ಮಾಡ್‌ವಕಾಯಿತ್ ಪೊನ್ನ್‌ರ ಅಳ್‌ತೆ ಕೋಲ್‍ನ ಕೈಯಿಲ್ ಪುಡ್‍ಚಂಡ್ ಇಂಜತ್.

¹⁶ಆ ಪಟ್ಟಣ ಚದರವಾಯಿತ್ಂಜತ್. ಅದ್ಂಡ ಉದ್ದವೂ ಅಗಲವೂ ಸಮವಾಯಿತ್ಂಜತ್. ಅಂವೊ ಅಂವೊಂಡ ಕೈಯಿಲ್ ಇಂಜ ಕೋಲ್‍ಲ್ ಪಟ್ಟಣತ್‍ನ ಅಳ್‌ತೆ ಮಾಡ್‍ಚಿ. ಅಳ್‌ತೆ ದಂಡಾಯಿರತ ನಾನೂರ್ ಕಿಲೊ ಮೀಟರ್ ಇಂಜತ್. ಅದ್ಂಡ ಉದ್ದ ಅಗಲ ಎತ್ತರವೆಲ್ಲಾ ಸಮವಾಯಿತ್ಂಜತ್.

¹⁷ಅಂವೊ ಅದ್ಂಡ ಗೋಡೆನ ಅಳ್‌ತೆ ಮಾಡ್‌ವಕ, ಮನುಷ್ಯಂಗಡ ಅಳ್‌ತೆರನೆಕೆ ದೇವದೂತ ಅದ್‍ನ ಅಳ್‌ತೆ ಮಾಡ್‌ವಕ ದಂಡ್ ನೂರ ಪದನಾರ್ ಅಡಿ ಇಂಜತ್.

¹⁸ಅಲ್ಲಿಯತ್‍ರ ಗೋಡೆ ಸೂರ್ಯಕಾಂತ ಕಲ್ಲ್‌ಲ್ ಕೆಟ್ಟಿತ್ಂಜತ್. ಆ ಪಟ್ಟಣ ತೆಳ್ಂಗ್‍ನ ಗಾಜಿಕ್ ತಕ್ಕಂತ ಶುದ್ದವಾನ ಪೊನ್ನಾಯಿತ್ಂಜತ್.

¹⁹ಪಟ್ಟಣತ್‍ರ ಗೋಡೆರ ಅಡಿಪಾಯ, ನಾನಾ ತರತ್‍ರ ರತ್ನತ್ಂಜ ಅಲಂಕಾರ ಮಾಡಿತ್ಂಜತ್. ಆದ್ಯತ್‍ರ ಅಡಿಪಾಯ ವಜ್ರವಾಯಿತ್ಂಜತ್. ದಂಡನೆ ಅಡಿಪಾಯ ನೀಲಮಣಿ ಆಯಿತ್ಂಜತ್. ಮೂಂದನೆ ಅಡಿಪಾಯ ಪಟ್ಟೆಕಲ್ಲ್[12] ಆಯಿತ್ಂಜತ್. ನಾಲನೆ ಅಡಿಪಾಯ ಪಚ್ಚೆ ಕಲ್ಲ್[13] ಆಯಿತ್ಂಜತ್.

²⁰ಅಂಜನೆ ಅಡಿಪಾಯ ಗೋಮೇದಿಕ, ಆರೆನ ಅಡಿಪಾಯ ಮಾಣಿಕ್ಯ, ಏಳನೆ ಅಡಿಪಾಯ ಪೀತರತ್ನ, ಎಟ್ಟನೆ ಅಡಿಪಾಯ ಬೇರುಲ್ಲ, ಒಯಿಂಬದನೆ ಅಡಿಪಾಯ ಪುಷ್ಯರಾಗ, ಪತ್ತನೆ ಅಡಿಪಾಯ ಗರುಡಪಚ್ಚೆ, ಪನ್ನಂದನೆ ಅಡಿಪಾಯ ಕೆಂಗಿತ್ತಳೆ, ಪನ್ನೆರಂಡನೆ ಅಡಿಪಾಯ ನೀಲಸ್ಪಟಿಕ ಇನ್ನತಾನಯಿಂಗಳೇ.

²¹ಪನ್ನೆರಂಡ್ ಬಾಯಿಕಂಡಿಯು ಪನ್ನೆರಂಡ್ ಮುತ್ತಾಯಿತ್‍ಂಜತ್. ಓರೋರ್ ಬಾಯಿಕಂಡಿಯು ಓರೋರ್ ಮುತ್ತ್‌ಲ್ ಮಾಡಿತ್ಂಜತ್. ಪಟ್ಟಣತ್‍ರ ಬೀದಿ ತೆಳ್ಂಗ್‍ನ ಗಾಜಿರ ಶುದ್ದವಾನ ಪೊನ್ನ್‌ರನೆಕೆ ಇಂಜತ್.

²²ಆ ಪಟ್ಟಣತ್‍ಲ್ ನಾನ್ ದೇವಾಲಯತ್‍ನ ಕಂಡಿತ್‌ಲ್ಲೆ, ಎನ್ನಂಗೆಣ್ಣ್‌ಚೇಂಗಿ, ಸರ್ವ ಶಕ್ತಿವಂತಂವೊನಾಯಿತುಳ್ಳ ದೇವ ಪಿಂಞ ಕೊರಿಕುಟ್ಟಿಯಾಯಿತುಳ್ಳಂವೊನೇ ಅದ್ಂಗ್ ದೇವಾಲಯವಾಯಿತ್ಂಜತ್.

²³ಆ ಪಟ್ಟಣಕ್ ಬೊಳಿ ಕೊಡ್‍ಪಕ್ ಸೂರ್ಯನಾಡ್ ಚಂದ್ರನಾಡ್ ಬೋಂಡ್‍ವಕಿಂಜ್‍ಲೆ; ದೇವಡ ಮಹಿಮೆಯೇ ಅದ್ಂಗ್ ಬೊಳಿಯಾಯಿತ್ಂಜತ್. ಕೊರಿಕುಟ್ಟಿಯಾನಂವೊನೇ ಅದ್ಂಗ್ ಬೊಳಕಾಯಿತ್ಂಜತ್

²⁴ರಕ್ಷಣೆ ಕ್‍ಟ್ಟ್‌ನ ಜನ ಅದ್ಂಡ ಬೊಳಿಲ್ ನಡ್‍ಪಕಿಂಜತ್. ಬೂಮಿಲ್ ಉಳ್ಳ ರಾಜಂಗ ಅಯಿಂಗಡ ಮಹಿಮೆನ, ಗನತ್‍ನ ಅದ್ಂಡ ಒಳ್‍ಕ್ ಎಡ್‌ತ ಬಪ್ಪಕಿಂಜತ್.

²⁵ಅಲ್ಲಿಕ್ ಬಯಿಟ್ ಎಣ್ಣ್‌ವದೇ ಇಲ್ಲತಗುಂಡ್, ಅದ್ಂಡ ಬಾಯಿಕಂಡಿ‍ನ ಮುಚ್ಚಿತ್ ಬೆಪ್ಪದೇ ಇಲ್ಲೆ, ಎಕ್ಕಾಲು ತೊರ್‌ಂದಿತೇ ಇಪ್ಪ.

²⁶ಲೋಕತ್ ಜನತ್‍ರ ಮಹಿಮೆನ ಗನತ್‍ನ ಅದ್ಂಡ ಒಳ್‍ಕ್ ಕೊಂಡ್ ಬಪ್ಪ.

²⁷ಕೊರಿಕುಟ್ಟಿಯಾನವೊಂಡ ಜೀವ ಪುಸ್ತಕತ್‍ಲ್ ಪೆದ ಒಳ್‍ದಿತುಳ್ಳಯಿಂಗ ಅಲ್ಲತೆ ಬೋರೆ ದಾರೂ ಅದ್ಂಡ ಒಳ್‍ಕ್ ಪೋಪಕ್ ಕಯ್ಯುಲೆ; ಅಶುದ್ದವಾನದ್ ಒಂದು ಅಲ್ಲಿಕ್ ಪೋಪುಲೆ, ಹೇಸಿಗೆಯಾನದ್‌ನ ಅಥವ ಕಳ್ಳತನ ಮಾಡ್‌ವ ದಾರೂ ಅಲ್ಲಿಕ್ ಎತ್ತುಲೆ.