Read Kodava ಪ್ರಕಟನೆ 22 Bible Online

ಪ್ರಕಟನೆ 22 - Kodava bible

ಪ್ರಕಟನೆ 22

¹ಪಿಂಞ, ಶುದ್ದವಾನ ತೆಳ್ಂಗ್‍ನ ಜೀವತ್‍ರ ನೀರ್ ಕ್‍ಟ್ಟ್‌ವ ಪೊಳೆನ ನಾಕ್ ಕಾಟ್‍ಚಿ. ಆ ಪೊಳೆ ದೇವಡ ಪಿಂಞ ಕೊರಿಕುಟ್ಟಿಯಾನವೊಂಡ ಸಿಂಹಾಸನತ್ಂಜ ಪೊರಟಿತ್ ಬಾತ್.

²ಅದ್ ಆ ಪಟ್ಟಣತ್‍ರ ಬೀದಿರ ಮದ್ಯತ್‍ಲ್ ಪೋಯಂಡಿಂಜತ್, ಆ ಪೊಳೆರ ದಂಡ್ ಬರೀಲು ಜೀವ ತಪ್ಪ ಮರ ಇಂಜತ್. ಆ ಮರತ್ಂಜ ಪನ್ನೆರಂಡ್ ತರತ್‍ರ ಪಣ್ಣ್ ಕ್‍ಟ್ಟ್‌ವ. ತಿಂಗ ತಿಂಗಕ್ ಅದ್ ಪಣ್ಣ್ ತಪ್ಪಕಿಂಜತ್; ಆ ಮರತ್‍ರ ಎಲ್‌ಕಂಡ ಜನ ವಾಸಿ ಆಪಕ್ ಪ್ರಯೋಜನವಾಯಿತ್ಂಜತ್.

³ಇಂಞು ಮಿಂಞಕ್ ಒರ್ ಶಾಪವು ಇಪ್ಪುಲೆ. ದೇವಡ ಸಿಂಹಾಸನ ಪಿಂಞ ಕೊರಿಕುಟ್ಟಿಯಾನವೊಂಡ ಸಿಂಹಾಸನ ಅಲ್ಲಿ ಇಪ್ಪ. ಅಂವೊಂಡ ಸೇವಕಂಗ ಅಂವೊಂಗ್ ಸೇವೆ ಮಾಡಿತ್,

⁴ಅಯಿಂಗ ದೇವಡ ಮೂಡ್‍ನ ಕಾಂಬ, ಅಯಿಂಗಡ ನೆತ್ತಿರ ಮೇಲೆ ಅಂವೊಂಡ ಪೆದ ಒಳ್‍ದಿತ್ ಇಪ್ಪ.

⁵ಅಲ್ಲಿ ಬಯಿಟ್ ಎಣ್ಣುವದ್ ಇಪ್ಪದೇ ಇಲ್ಲೆ; ಅಯಿಂಗಕ್ ಬೊಳ್‍ಚತ್‍ರ ಬೊಳಿ ಅಥವ ಸೂರ್ಯಂಡ ಬೊಳಿ ಬೋಂಡ. ಎನ್ನಂಗೆಣ್ಣ್‌ಚೇಂಗಿ, ಒಡೆಯನಾನ ದೇವ ಅಯಿಂಗಕ್ ಬೊಳಿಯಾಯಿತ್‌ಪ್ಪ. ಅಯಿಂಗ ಯುಗ ಯುಗಕ್ ರಾಜ್ಯಬಾರ ಮಾಡ್‌ವ.

⁶ಪಿಂಞ ಆ ದೇವದೂತ ನಾಕ್: ಈ ತಕ್ಕ್ ನೇರಾಯಿತು ಸತ್ಯವಾಯಿತು ಉಂಡ್. ಪವಿತ್ರವಾನ ಪ್ರವಾದಿಯಂಗಡ ಒಡೆಯನಾನ ದೇವ, ಬೆರಿಯ ನಡ್‍ಪಕುಳ್ಳ ಗಟನೆಯನೆಲ್ಲ ತಾಂಡ ಸೇವಕಂಗಕ್ ಕಾಂಬ್‍ಚಿಡುವಕ್ ತಾಂಡ ದೂತನ ಅಯಿಚತ್‍ೕಂದ್ ಎಣ್ಣ್‌ಚಿ.

⁷ನೋಟಿ! ನಾನ್ ಬೆರಿಯ ಬಂದಂಡುಂಡ್; ಈ ಪುಸ್ತಕತ್‍ಲ್ ಉಳ್ಳ ಪ್ರವಾದನೆರ ತಕ್ಕ್‌ಕ್ ತಗ್ಗಿತ್ ನಡ್‍ಪಯಿಂಗ ಆಶೀರ್ವಾದ ಪಡ್ಂದಯಿಂಗ.

⁸ಯೋಹಾನನಾನ ನಾನ್ ಇದ್‍ನ ಕಂಡಂಡ್ ಕ್‍ೕಟಂಡ್ ಇಂಜ. ಇದ್‍ನ ಕ್‍ೕಟಿತ್ ಕಂಡಿತಾನ ಪಿಂಞ, ಇದ್‍ನೆಲ್ಲ ನಾಕ್ ಕಾಟ್‍ನ ದೇವದೂತಂಡ ಕಾಲ್‌ಕ್ ಅಡ್ಡ ಬುದ್ದಿತ್ ಆರಾದನೆ ಮಾಡಿಯೆ.

⁹ಅಕ್ಕ ಆ ದೇವದೂತ: ನಾಕ್ ನೀನ್ ಇನ್ನನೆ ಮಾಡತೆ, ನೀಡ ಕೂಡೆ, ನೀಡ ಅಣ್ಣತಮ್ಮಣಂಗಡ ಕೂಡೆ, ಪ್ರವಾದಿಯಂಗಡ ಕೂಡೆ, ಈ ಪುಸ್ತಕತ್‍ರ ತಕ್ಕ್‌ಕ್ ತಗ್ಗಿತ್ ನಡ್‍ಪಯಿಂಗಡ ಕೂಡೆ ನಾನ್ ಸಹ ಒರ್ ಸೇವಕ ಅಚ್ಚಕೆ. ದೇವನ ಆರಾದನೆ ಮಾಡ್‍ೕಂದ್ ಎಣ್ಣ್‌ಚಿ.

¹⁰ಇದ್‍ಲ್ಲತೆ, ಅಂವೊ ನನ್ನ ನೋಟಿತ್: ಈ ಪುಸ್ತಕತ್‍ಲ್ ಒಳ್‍ದ್‍ನ ಪ್ರವಾದನೆರ ವಾಕ್ಯತ್‍ನ ಮುದ್ರೆ ಮಾಡಂಡ, ಎನ್ನಂಗೆಣ್ಣ್‌ಚೇಂಗಿ ಸಮಯ ಬೆರಿಯ ಬಂದ್‌ರ್‌ತ್.

¹¹ಅನ್ಯಾಯ ಮಾಡ್‌ವಯಿಂಗ ಇಂಞು ಅನ್ಯಾಯ ಮಾಡಿಯಂಡೇ ಇರಡ್, ಅಶುದ್ದವಾಯಿತುಳ್ಳಯಿಂಗ ಇಂಞು ಅಶುದ್ದವಾಯಿತೇ ಇರಡ್, ನೀತಿವಂತಯಿಂಗ ಇಂಞು ನೀತಿರ ಕ್ರಿಯೆ ಮಾಡಡ್, ಪವಿತ್ರವಾನಯಿಂಗ ಇಂಞು ಪವಿತ್ರವಾಯಿತ್ ಆಡ್.

¹²ನೋಟಿ! ನಾನ್ ಬೆರಿಯ ಬಂದಂಡುಳ್ಳ; ನಾನ್ ತಪ್ಪ ಫಲ ನಾಡಲ್ಲಿ ಉಂಡ್. ಒಬ್ಬೊಬ್ಬನು ಮಾಡ್‍ನ ಕ್ರಿಯೇಕ್ ತಕ್ಕಂತ ಫಲತ್‍ನ ನಾನ್ ತಪ್ಪಿ.

¹³ನಾನ್ ಅಲ್ಫಾವಾಯಿತು ಓಮೆಗವಾಯಿತು, ಆದ್ಯವಾಯಿತು ಅಂತ್ಯವಾಯಿತು ಉಳ್ಳ.

¹⁴ಜೀವತ್‍ರ ಮರಕ್ ಅದಿಕಾರ ಉಳ್ಳಯಿಂಗಳಾಯಿತು, ಪಟ್ಟಣತ್‍ರ ಒಳ್‍ಕ್ ಬಾಯಿಕಂಡಿರ ಮೂಲಕ ಪೋಪಕಾಯಿತ್ ತಾಂಡ ಬಟ್ಟೇನ ನೆಲೆಚಿತ್ ಶುದ್ದವಾಯಿತ್ ಬೆಪ್ಪಯಿಂಗ ಆಶೀರ್ವಾದ ಪಡ್ಂದಯಿಂಗ.

¹⁵ನಾಯಿಂಗ,[14] ಮಾಟಮಂತ್ರ ಮಾಡ್‌ವಯಿಂಗ, ವ್ಯಬಿಚಾರ ಮಾಡ್‌ವಯಿಂಗ, ಕೊಲೆಮಾಡ್‍ವಯಿಂಗ, ವಿಗ್ರಹ ಆರಾದನೆ ಮಾಡ್‌ವಯಿಂಗ, ಪೊಟ್ಟ್ ಪರಿಯುವಕ್ ಕುಶಿಪಟ್ಟಿತ್, ಅದ್ಂಡ ಪ್ರಕಾರ ಮಾಡ್‌ವಯಿಂಗ ಎಲ್ಲಾರು ಪಟ್ಟಣತ್‍ರ ಪೊರಮೆ ಇಪ್ಪ.

¹⁶ಯೇಸುವಾನ ನಾನ್, ಸಬೇಕಾಯಿತ್, ನಿಂಗಡ ಕೂಡೆ ಇದ್‍ನೆಲ್ಲಾ ಸಾಕ್ಷಿಯಾಯಿತ್ ಎಣ್ಣುವಕ್, ನಾಡ ದೂತನ ಅಯಿಚಿಯೆ. ನಾನ್ ದಾವೀದಂಡ ಬೇರಾಯಿತು, ಅಂವೊಂಡ ಸಂತಾಕಾರನಾಯಿತು, ಪೊಲಾಕ ಕಾಂಬ ಪ್ರಕಾಶವಾನ ಬಾನತ್‍ರ ಮೀನಾಯಿ‍ತು ಉಳ್ಳ್‌ಂದ್ ಎಣ್ಣ್‌ಚಿ.

¹⁷ಪವಿತ್ರಾತ್ಮನು ಮಂಗಲಕರ್ತಿಯು ಬಾರೀಂದ್ ಎಣ್ಣುವ; ಕ್‍ೕಪಯಿಂಗಳು ಬಾರೀಂದ್ ಎಣ್ಣಡ್; ಬಾಯಾರಿಕೆ ಉಳ್ಳಯಿಂಗ ಬರಡ್; ಕುಶಿಯುಳ್ಳಯಿಂಗ ಜೀವತ್‍ರ ನೀರ್‌ನ ಇನಾಮಾಯಿತ್ ಎಡ್‍ತಂಡ್ ಪೋಡ್.

¹⁸ಈ ಪುಸ್ತಕತ್‍ಲ್ ಉಳ್ಳ ಪ್ರವಾದನೆರ ತಕ್ಕ್‌ನ ಕ್‍ೕಟಂಡುಳ್ಳ ಪ್ರತಿ ಒಬ್ಬಂಗು ನಾನ್ ಎಚ್ಚರವಾಯಿತ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ: ದಾರೇಂಗಿ ಈ ಪುಸ್ತಕತ್‍ಲ್ ಒಳ್‍ದ್‍ನ ವಿಷಯಕಿಂಜ ಬೋರೆ ಎಂತೇಂಗಿ ಕೂಟ್‍ನಕ, ದೇವ ಅಂವೊಂಗ್ ಈ ಪುಸ್ತಕತ್‍ಲ್ ಒಳ್‍ದಿತ್ ಬೆಚ್ಚಿತುಳ್ಳ ಬಾದೇನ ಅಂವೊಂಡ ಮೇಲೆ ಕೂಟ್‌ವ.

¹⁹ದಾರೇಂಗಿ ಈ ಪ್ರವಾದನೆರ ಪುಸ್ತಕತ್‍ಲ್ ಒಳ್‍ದ್‍ನ ವಿಷಯತ್ಂಜ ಎಂತೇಂಗಿ ಎಡ್‍ತ್‍ಚೇಂಗಿ, ದೇವ ಜೀವ ಪುಸ್ತಕತ್ಂಜ, ಪವಿತ್ರವಾನ ಪಟ್ಟಣತ್ಂಜ ಪಿಂಞ ಈ ಪುಸ್ತಕತ್‍ಲ್ ಒಳ್‍ದಿ ಬೆಚ್ಚಿತ್ಂಜ ವಿಷಯತ್ಂಜ ಅಂವೊಂಡ ಬಾದ್ಯತೇನ ಎಡ್‌ತ್‌ರ್‌ವ.

²⁰ಈ ವಿಷಯತ್‍ನ ಸಾಕ್ಷಿಯಾಯಿತ್ ಎಣ್ಣ್‌ವಂವೊ: ನೇರಾಯಿತ್ ನಾನ್ ಬೆರಿಯ ಬಂದಂಡುಳ್ಳ್‌ಂದ್ ಎಣ್ಣಿಯಂಡುಂಡ್. ಆಮೆನ್, ಒಡೆಯನಾನ ಯೇಸುವೇ ಬಾರಿ.

²¹ಒಡೆಯನಾನ ಯೇಸುರ ಕೃಪೆ ನಿಂಗ ಎಲ್ಲಾಡ ಕೂಡೆ ಇಕ್ಕಡ್. ಆಮೆನ್.