Read Kodava ಪ್ರಕಟನೆ 3 Bible Online

ಪ್ರಕಟನೆ 3 - Kodava bible

ಪ್ರಕಟನೆ 3

¹ಸಾರ್ದಿಸಿ ಪಟ್ಟಣತ್‍ಲ್ ಉಳ್ಳ ಸಬೆರ ದೂತಂಗ್ ಒಳ್‍ದ್‍ವಕುಳ್ಳದ್ ಎಂತ ಎಣ್ಣ್‌ಚೇಂಗಿ: ದೇವಡ ಏಳ್ ಆತ್ಮತ್‌ನ ಪಿಂಞ ಏಳ್ ನಕ್ಷತ್ರತ್‍ನ ಪುಡ್‌ಚಂಡುಳ್ಳಂವೊ ಇದ್‍ನ ಎಣ್ಣಿಯಂಡುಳ್ಳ. ನೀಡ ಕ್ರಿಯೆ ನಾಕ್ ಗೊತ್ತುಂಡ್, ನೀನ್ ಬದ್‍ಕಿಯಂಡ್ ಉಂಡ್‍ೕಂದ್‌ ಎಲ್ಲಾರು ಎಣ್ಣಿಯಂಡಿಂಜತೇಂಗಿಯು ನೀನ್ ಚತ್ತ್ ಪೋನಂವೊಂಡನೆಕೆ ಉಳ್ಳಿಯ.

²ನೀನ್ ಎಚ್ಚರ ಎಡ್‍ತಂಡ್, ನೀಡಲ್ಲಿ ಇಂಞು ಬದ್‍ಕಿಯಂಡುಳ್ಳದ್‍ನ ಚಾವಕ್ ಬುಡತೆ ಸ್ತಿರಪಡ್‍ತ್; ನೀಡ ಕ್ರಿಯೆ ದೇವಡ ಮಿಂಞತ್ ಪೂರ್ತಿಯಾನನೆಕೆ ನಾನ್ ಕಂಡಂಡಿಲ್ಲೆ.

³ಆನಗುಂಡ್, ನೀನ್ ನನ್ನಿಂಜ ಎಂತದ್‍ನ ಪಡ್ಂದಿತುಳ್ಳಿಯ, ಎಂತಾನ ಕ್‍ೕಟಿತುಳ್ಳಿಯ ಅದ್‍ನ ಗೇನ ಮಾಡ್. ಅದ್ಂಗ್ ತಗ್ಗಿತ್ ನಡ್‌ಂದಿತ್, ಪಶ್ಚಾತಾಪ ಪಡ್. ನೀನ್ ಎಚ್ಚರ ಎಡ್‍ಕತೆ ಪೋನಕ, ಒರ್ ಕಳ್ಳ ಬಪ್ಪನೆಕೆ ನಾನ್ ನೀಡ ಮೇಲೆ ಬಪ್ಪಿ; ನಾನ್ ಬಪ್ಪ ಸಮಯ ನೀಕ್ ಗೊತ್ತಾಪುಲೆ.

⁴ಆಚೇಂಗಿಯು, ತಂಗಡ ಬಟ್ಟೇನ ಅಶುದ್ದ ಮಾಡತ ಇಂಞು ಚೆನ್ನ ಜನ ಸಾರ್ದಿಸಿಲ್ ನೀಕ್ ಉಂಡ್; ಅಯಿಂಗ ಯೋಗ್ಯವಾನಗುಂಡ್, ಬೊಳ್‍ತ ಬಟ್ಟೆ ಇಟ್ಟಿತ್ ನಾಡ ಕೂಡೆ ನಡ್‍ಪ.

⁵ದಾರೆಲ್ಲ ಗೆಲ್ಲುವ, ಅಂವೊಂಗ್ ಬೊಳ್‍ತ ಬಟ್ಟೆ ಇಡ್‍ವನೆಕೆ ಆಪ; ಅಂವೊಂಡ ಪೆದತ್‍ನ ಜೀವ ಪುಸ್ತಕತ್ಂಜ ಮಾಜ್ ಪೋಪಕ್ ನಾನ್ ಬುಡುಲೆ. ನಾನ್ ನಾಡ ಅಪ್ಪಂಡ ಮಿಂಞತ್ ಪಿಂಞ ಅಂವೊಂಡ ದೂತಂಗಡ ಮಿಂಞತ್ ಅಂವೊ ನಾಡಂವೋಂದ್ ಅರಿಚಿಡುವಿ.

⁶ಪವಿತ್ರಾತ್ಮ ಸಬೇಕ್ ಎಣ್ಣಿಯಂಡುಳ್ಳದ್‍ನ ಕ್‍ೕಪಕ್ ಕೆಮಿ ಉಳ್ಳಂವೊ ಕ್‍ೕಕಡ್. ಇನ್ನನೆ ಒಳ್‍ದ್.

⁷ಫಿಲದೆಲ್ಫಿಯ ಪಟ್ಟಣತ್‍ಲ್ ಉಳ್ಳ ಸಬೆರ ದೂತಂಗ್ ಒಳ್‍ದ್‍ವಕುಳ್ಳದ್ ಎಂತ ಎಣ್ಣ್‌ಚೇಂಗಿ: ಪವಿತ್ರವಾನಂವೊನು, ನೇರಾನಂವೊನು, ದಾವೀದಂಡ ಬೀತ್‍ಕೈ ಉಳ್ಳಂವೊನು, ಏದು ಒರ್ ಮನುಷ್ಯನು ಮುಚ್ಚ್‌ವಕ್ ಕಯ್ಯತನೆಕೆ ತೊರ್‌ಪಂವೊನು, ಏದು ಒರ್ ಮನುಷ್ಯನು ತೊರ್‌ಪಕ್ ಕಯ್ಯತನೆಕೆ ಬೀಗ ಇಡ್‌ವಂವೊನು ಎಣ್ಣಿಯಂಡುಳ್ಳ.

⁸ನೀಡ ಕ್ರಿಯೆ ನಾಕ್ ಗೊತ್ತುಂಡ್. ಇದಾ, ನಾನ್ ನೀಡ ಮಿಂಞತ್ ದಾರೂ ಮುಚ್ಚ್‌ವಕ್ ಕಯ್ಯತೆ ಒರ್ ತೊರ್‌ಂದ ಪಡಿನ ಬೆಚ್ಚಿತುಳ್ಳ. ಎನ್ನಂಗೆಣ್ಣ್‌ಚೇಂಗಿ, ನೀಕ್ ಚೆನ್ನಂಗೇ ಬಲ ಇಂಜತೇಂಗಿಯು, ನೀನ್ ನಾಡ ತಕ್ಕ್‌ಕ್ ಬಗ್ಗಿತ್, ನನ್ನ ಅಲ್ಲಗೆಳೆಯತೆ ಇಂಜಿಯ.

⁹ಇದಾ, ಯೆಹೂದ್ಯ ಅಲ್ಲತಯಿಂಗಳಾಯಿತ್ ಇಂಜತೇಂಗಿಯು ಯೆಹೂದ್ಯಂಗಾಂದ್ ಪೊಟ್ಟ್ ಪರ್ಂದಂಡುಳ್ಳ ಸೈತಾನಂಡ ಸಬಾಮಂದಿರಕ್ ಕೂಡ್‍ನ ಚೆನ್ನ ಜನಳ ನೀಕ್ ತಪ್ಪಿ; ಇದಾ, ಅಯಿಂಗ ನೀಡ ಕಾಲ್‌ಕ್ ಬೂವನೆಕೆ ನಾನ್ ಮಾಡ್‌ವಿ. ನಾನ್ ನಿನ್ನ ಪ್ರೀತಿ ಮಾಡಿಯಂಡುಳ್ಳ್‍ೕಂದ್ ಗೊತ್ತಾಪನೆಕೆ ಇನ್ನನೆ ಮಾಡ್‌ವಿ.

¹⁰ನಾನ್ ಎಣ್ಣ್‌ನ ಆಜ್ಞೇರಗುಂಡ್ ಬಂದ ಕಷ್ಟತ್‍ನ ಪೊರುಮೇಲ್ ಸಹಿಸಿಯಂಡ್ ಕಾಪಾಡಿತುಳ್ಳಿಯ. ಆನಗುಂಡ್, ಈ ಲೋಕತ್‍ಲ್ ವಾಸಮಾಡಿಯಂಡುಳ್ಳಯಿಂಗಳ ಸೋದನೆ ಮಾಡ್‌ವಕಾಯಿತ್ ಈ ಬೂಮಿಲ್ ಎಲ್ಲಾ ಜಾಗತ್‍ಲು ಬಪ್ಪಕುಳ್ಳ ಸೋದನೆರ ಕಾಲತ್‍ಲ್ ನಾನ್ ನಿನ್ನ ಕಾಪಾಡ್‍ವಿ.

¹¹ಇದಾ, ನಾನ್ ಬೆರಿಯ ಬಂದಂಡುಂಡ್; ದಾರೂ ನೀಡ ಕಿರೀಟತ್‍ನ ಎಡ್‌ಕತನೆಕೆ ನೀಕ್ ಉಳ್ಳದ್‍ನ ಗಟ್ಟಿಯಾಯಿತ್ ಪುಡ್‌ಚ.

¹²ದಾರ್ ಗೆಲ್ಲುವ, ಅಂವೊನ ನಾನ್ ದೇವಾಲಯತ್‍ಲ್ ಕಂಬವಾಯಿತ್ ಮಾಡ್‌ವಿ, ಅದ್‍ಂಜ ಅಂವೊ ಎಕ್ಕಲೂ ಪೋಪದೇಯಿಲ್ಲೆ; ನಾಡ ದೇವಡ ಪೆದತ್‍ನ, ನಾಡ ದೇವನಗುಂಡ್ ಪರಲೋಕತ್ಂಜ ಇಳಿಂಜಿ ಬಪ್ಪ ಪುದಿಯ ಯೆರೂಸಲೇಮ್‍ೕಂದ್ ಎಣ್ಣುವ ನಾಡ ದೇವಡ ಪಟ್ಟಣತ್‍ರ ಪೆದತ್‍ನ ಪಿಂಞ ನಾಡ ಪುದಿಯ ಪೆದತ್‍ನ ಅಂವೊಂಡ ಮೇಲೆ ಒಳ್‍ದ್‍ವಿ.

¹³ಪವಿತ್ರಾತ್ಮ ಸಬೇಕ್ ಎಣ್ಣಿಯಂಡುಳ್ಳದ್‍ನ ಕ್‍ೕಪಕ್ ಕೆಮಿ ಉಳ್ಳಂವೊ ಕ್‍ೕಕಡ್. ಇನ್ನನೆ ಒಳ್‍ದ್.

¹⁴ಲವೊದಿಕೀಯ ಪಟ್ಟಣತ್‍ಲ್ ಉಳ್ಳ ಸಬೆರ ದೂತಂಗ್ ಒಳ್‍ದ್‍ವಕುಳ್ಳದ್ ಎಂತ ಎಣ್ಣ್‌ಚೇಂಗಿ: ನಂಬಿಕಸ್ತನು, ಸತ್ಯವಂತನು, ದೇವಡ ಸೃಷ್ಟಿಕ್ ಆದ್ಯವಾಯಿತು ಉಳ್ಳ ಆಮೆನ್ ಎಣ್ಣ್‌ವಂವೊ ಎಣ್ಣಿಯಂಡುಳ್ಳ.

¹⁵ನೀಡ ಕ್ರಿಯೆ ನಾಕ್ ಗೊತ್ತುಂಡ್; ನೀನ್ ತಂಪಾಯಿತು ಇಲ್ಲೆ, ಬಿಸಿಯಾಯಿತು ಇಲ್ಲೆ; ನೀನ್ ತಂಪಾಯಿತ್ ಇಕ್ಕಂಡು ಅಲ್ಲತಪೋಚೇಂಗಿ ಬಿಸಿಯಾಯಿತ್ ಇಕ್ಕಂಡು, ಅದ್ ನಲ್ಲದಾಯಿತ್‌ಪ್ಪ.

¹⁶ಇನ್ನನೆ ನೀನ್ ತಂಪೂ ಇಲ್ಲತೆ ಬಿಸಿಯು ಇಲ್ಲತೆ ಎಳೆಬೆಕ್ಕೆಯಾಯಿತ್ ಉಳ್ಳಗುಂಡ್, ನಾನ್ ನಿನ್ನ ನಾಡ ಬಾಯಿಯಿಂಜ ಕಕ್ಕಿರುವಿ.

¹⁷ನಾನ್ ಐಶ್ವರ್ಯವಂತಂವೊ, ನಾಕ್ ದುಂಬ ಸೊತ್ತ್ ಕೂಟಿ ಬೆಚ್ಚಿಯೆ, ನಾಕ್ ಒಂದು ಕಮ್ಮಿಯಿಲ್ಲೇಂದ್ ನೀನ್ ಎಣ್ಣಿಯಂಡುಳ್ಳಿಯ. ಆಚೇಂಗಿ, ನೇರಾಯಿತ್ ನೀನ್ ಒರ್ ಗತಿಯು ಇಲ್ಲತಂವೊನಾಯಿತು, ವ್ಯಸನಕಾರನಾಯಿತು, ಗರೀಬನಾಯಿತು, ಕುರ್‌ಡನಾಯಿತು, ಬೆತ್ತಲೆಯಾಯಿತು ಉಳ್ಳಿಯಾಂದ್ ನೀಕ್ ಅರ್ಥ ಆಯಂಡಿಲ್ಲೆ.

¹⁸ನೀನ್ ಐಶ್ವರ್ಯವಂತನಾಪಕ್, ತಿತ್ತ್‌ಲ್ ಇಟ್ಟಿತ್ ಎಡ್‌ತ ಪೊನ್ನ್‌ನ ಪಿಂಞ ನೀಡ ಅವಮಾನವಾಯಿತುಳ್ಳ ಬೆತ್ತಲೇನ ಮುಚ್ಚ್‌ವಕ್ ಬೊಳ್‍ತ ಬಟ್ಟೇನ ನಾಡ ಕೈಯಿಂಜ ಕ್ರಯಕ್ ಎಡ್‌ತ ಪಿಂಞ ನೀಡ ಕಣ್ಣ್ ಕಾಂಬನೆಕೆ, ಕಣ್ಣ್‌ಕ್ ಮದ್ದ್ ಇಡ್‍ೕಂದ್ ನಾನ್ ನೀಕ್ ಬುದ್ದಿ ಎಣ್ಣ್‌ವಿ.

¹⁹ನಾಕ್ ದಾಡ ಮೇಲೆ ಕುಶಿ ಉಂಡೋ, ಅಯಿಂಗಕ್ ಜೋರ್ ಮಾಡಿತ್, ಅಯಿಂಗಕ್ ಶಿಕ್ಷೆ ತಪ್ಪಿ. ಆನಗುಂಡ್ ನೀನ್ ಎಚ್ಚರತ್‍ಲ್ ಇಂಜಿತ್ ದೇವಡ ಪಕ್ಕ ತಿರಿತ್ ಪಶ್ಚಾತಾಪ ಪಡ್‌ವಿಯ.

²⁰ಇದಾ, ನಾನ್ ಪಡಿರ ಪಕ್ಕ ನಿಂದಂಡ್ ತಟ್ಟಿಯಂಡುಳ್ಳ, ದಾರೇಂಗಿ ನಾಡ ಸದ್ದ್‌ನ ಕ್‍ೕಟಿತ್, ಪಡಿನ ತೊರ್‌ಂದ್‍ತೇಂಗಿ, ನಾನ್ ಒಳ್‍ಕ್ ಬಂದಿತ್, ಅಂವೊಂಡ ಕೂಡೆ ಅಳ್‌ತಿತ್ ಉಂಬಿ, ಅಂವೊನು ನಾಡ ಕೂಡೆ ಅಳ್‌ತಿತ್ ಉಂಬ.

²¹ನಾನ್ ಗೆದ್ದಿತ್ ನಾಡ ಅಪ್ಪಂಡ ಸಿಂಹಾಸನತ್‍ಲ್ ಅಳ್‍ತಂಡುಳ್ಳನೆಕೆ, ದಾರ್ ಗೆಲ್ಲುವ ಅಂವೊನು ಸಹ ನಾಡ ಸಿಂಹಾಸನತ್‍ಲ್ ಅಳ್‌ಪಕ್ ನಾನ್ ಅದಿಕಾರ ತಪ್ಪಿ.

²²ಪವಿತ್ರಾತ್ಮ ಸಬೇಕ್ ಎಣ್ಣಿಯಂಡುಳ್ಳದ್‍ನ ಕ್‍ೕಪಕ್ ಕೆಮಿ ಉಳ್ಳಂವೊ ಕ್‍ೕಕಡ್. ಇನ್ನನೆ ಒಳ್‍ದ್.