Read Kodava ಪ್ರಕಟನೆ 4 Bible Online

ಪ್ರಕಟನೆ 4 - Kodava bible

ಪ್ರಕಟನೆ 4

¹ಇದಾನ ಪಿಂಞ ನಾನ್ ನೋಟ್‍ವಕ, ಇದಾ, ಪರಲೋಕತ್‍ಲ್ ತೊರಂದಿತ್ ಬೆಚ್ಚಿತ್ಂಜ ಒರ್ ಪಡಿನ ಕಂಡಿಯೆ. ಮಿಂಞ ವಾಲಗತ್‍ರ ಸದ್ದ್‌ರನೆಕೆ ನಾಡ ಕೂಡೆ ತಕ್ಕ್ ಪರ್ಂದ ವಾಣಿ: ಇಲ್ಲಿಕ್ ಪತ್ತಿತ್ ಬಾ, ಮಿಂಞಕ್ ನಡ್‍ಪಕುಳ್ಳದ್‍ನ ನೀಕ್ ಕಾಟಿತಪ್ಪೀಂದ್ ಎಣ್ಣ್‌ಚಿ.

²ಅಕ್ಕಣೆ ನಾನ್ ಪವಿತ್ರಾತ್ಮತ್‍ರ ಪುಡ್‍ತತ್‍ಲ್ ಆನ; ಅಕ್ಕ, ಇದಾ, ಪರಲೋಕತ್‍ಲ್ ಒರ್ ಸಿಂಹಾಸನ ಬೆಚ್ಚಿತ್ಂಜತ್, ಅದ್‍ಲ್ ಒಬ್ಬ ಅಳ್‍ತಂಡಿಂಜತ್.

³ಅಳ್‍ತಂಡಿಂಜಂವೊ, ಕಾಂಬಕ್ ವಜ್ರ ಪಿಂಞ ಪದ್ಮರಾಗ ಕಲ್ಲ್‌ರನೆಕೆ ಮಿನ್ನಿಯಂಡಿಂಜತ್. ಆ ಸಿಂಹಾಸನತ್‍ರ ಸುತ್ತ್‌ಲ್ ಮಳೆಬಿಲ್ಲ್ ಇಂಜತ್. ಅದ್ ಕಾಂಬಕ್ ಪಚ್ಚೆ ಕಲ್ಲ್‌ರನೆಕೆ[7] ಇಂಜತ್.

⁴ಆ ಸಿಂಹಾಸನತ್‍ರ ಸುತ್ತ್‌ಲ್ ಇರುವತ ನಾಲ್ ಸಿಂಹಾಸನ ಇಂಜತ್. ಇರುವತ ನಾಲ್ ಪೆರಿಯಯಿಂಗ ಬೊಳ್‍ತ ಬಟ್ಟೆ ಇಟ್ಟಂಡ್, ಅಯಿಂಗಡ ಮಂಡೆಲ್ ಪೊನ್ನ್‌ರ ಕಿರೀಟ ಇಟ್ಟಿತ್ ಆ ಸಿಂಹಾಸನತ್‍ಲ್ ಅಳ್‌ತಂಡಿಪ್ಪದ್‍ನ ಕಂಡಿಯೆ.

⁵ಆ ಸಿಂಹಾಸನತ್ಂಜ ದುಂಬ ಮಿನ್ನಲ್, ತೆಡ್ ಪಿಂಞ ಬಲ್ಯ ಸದ್ದ್ ಪೊರಟಿತ್ ಬಾತ್; ದೇವಡ ಏಳ್ ಆತ್ಮತ್‍ರ ಏಳ್ ತಿತ್ತ್‌ರ ಬೊಳ್‍ಚ ಸಿಂಹಾಸನತ್‍ರ ಮಿಂಞ ಕತ್ತಿಯಂಡಿಂಜತ್.

⁶ಆ ಸಿಂಹಾಸನತ್‍ರ ಮಿಂಞ ಶುದ್ದವಾನ ಪಾಕಲ್ಲ್‌ರನೆಕೆ ಗಾಜಿರ ಕಡಲ್ ಇಂಜತ್. ಸಿಂಹಾಸನತ್‍ರ ಮದ್ಯತ್‍ಲ್ ಪಿಂಞ ಸಿಂಹಾಸನತ್‍ರ ಸುತ್ತ್‌ಲ್ ನಾಲ್ ಜೀವ ಪ್ರಾಣಿಯ ಇಂಜತ್; ಜೀವ ಪ್ರಾಣಿಯಕ್ ಮಿಂಞಕು ಬಯ್ಯಕು ಪೂರ್ತಿ ಕಣ್ಣ್ ದುಂಬಿತ್ಂಜತ್.

⁷ಆದ್ಯ ಜೀವ ಪ್ರಾಣಿ ಸಿಂಹತ್‍ರನೆಕೆಯು, ದಂಡನೆ ಜೀವ ಪ್ರಾಣಿ ಎತ್ತ್‌ರನೆಕೆಯು, ಮೂಂದನೆ ಜೀವ ಪ್ರಾಣಿ ಮನುಷ್ಯಂಡ ಮೂಡ್‍ರನೆಕೆಯು, ನಾಲನೆ ಜೀವ ಪ್ರಾಣಿ ಪಾರುವ ಗರುಡ ಪಕ್ಷಿರನೆಕೆಯು ಇಂಜತ್.

⁸ಆ ನಾಲ್ ಜೀವ ಪ್ರಾಣಿಯ ಒಂದೊಂದಂಗು ಆರ್ ಆರ್ ರೆಕ್ಕೆ ಇಂಜತ್. ರೆಕ್ಕೆರ ಸುತ್ತ್‌ಲ್ ಪಿಂಞ ಒಳ್‍ಕ್ ಕಣ್ಣ್ ದುಂಬಿತ್ಂಜತ್. ಆ ಜೀವ ಪ್ರಾಣಿಯ: ಇಂಜಂವೊನು, ಇಪ್ಪಂವೊನು ಬಪ್ಪಂವೊನು ಆಯಿತುಳ್ಳ ಸರ್ವ ಶಕ್ತಿ ಉಳ್ಳ ದೇವನಾನ ಒಡೆಯ, ಪವಿತ್ರವಾನಂವೊ, ಪವಿತ್ರವಾನಂವೊ, ಪವಿತ್ರವಾನಂವೋಂದ್ ಎಡೆಬುಡತೆ ಬಯಿಟ್ ಪೋಲು ಎಣ್ಣಿಯಂಡೇ ಇಂಜತ್.

⁹ಇಂಞು, ಸಿಂಹಾಸನತ್‍ಲ್ ಅಳ್‌ತಂಡ್, ಕಾಲಕಾಲಕು ಬದ್‍ಕ್‍ವಂವೊಂಗ್ ಆ ಜೀವ ಪ್ರಾಣಿಯ ಎಕ್ಕೆಲ್ಲಾ ಮಹಿಮೆನ, ಗನತ್‍ನ, ತುದಿನ ಅರ್ಪಿಚಿಟ್ಟತೋ,

¹⁰ಅಕ್ಕ ಇರುವತ ನಾಲ್ ಪೆರಿಯಯಿಂಗಳು, ಸಿಂಹಾಸನತ್‍ಲ್ ಅಳ್‌ತಂಡ್ ಉಳ್ಳಂವೊಂಡ ಮಿಂಞತ್ ಅಡ್ಡ ಬುದ್ದಿತ್, ಎಕ್ಕಾಲು ಬದ್‍ಕಿಯಂಡುಳ್ಳಂವೊನ ಆರಾದನೆ ಮಾಡಿತ್, ಅಯಿಂಗಡ ಕಿರೀಟತ್‍ನ ಸಿಂಹಾಸನತ್‍ರ ಮಿಂಞ ಬೆಚ್ಚಿತ್,

¹¹ನಂಗಡ ಒಡೆಯನಾನ ದೇವನೇ, ಮಹಿಮೆನ, ಗನತ್‍ನ, ಶಕ್ತಿನ ಪಡೆಯುವಕ್ ಯೋಗ್ಯನಾಯಿತುಳ್ಳಿಯ. ನೀನೇ ಎಲ್ಲಾನ ಸೃಷ್ಟಿ ಮಾಡಿಯ, ನೀಡ ಚಿತ್ತತ್‍ರನೆಕೆ ಎಲ್ಲಾ ಸೃಷ್ಟಿ ಆಯಿತ್ ನಿಂದಂಡುಂಡ್‍ೕಂದ್ ಎಣ್ಣ್‌ಚಿ.