Read Kodava ಪ್ರಕಟನೆ 5 Bible Online

ಪ್ರಕಟನೆ 5 - Kodava bible

ಪ್ರಕಟನೆ 5

¹ಪಿಂಞ ಸಿಂಹಾಸನತ್‍ಲ್ ಅಳ್‍ತಂಡುಳ್ಳಂವೊಂಡ ಬಲ್‌ತೆ ಕೈಯಿಲ್ ಒರ್ ಪುಸ್ತಕತ್‍ನ ನಾನ್ ಕಂಡಿಯೆ. ಅದ್ಂಡ ಒಳ್‍ಕ್ ಪಿಂಞ ಪೊರಮೆ ಒಳ್‍ದಿತ್ಂಜತ್. ಅದ್‍ನ ಏಳ್ ಮುದ್ರೆನಗುಂಡ್ ಮುದ್ರೆ ಇಟ್ಟಿತ್ಂಜತ್.

²ಪಿಂಞ, ಪುಸ್ತಕತ್‍ನ ತೊರ್‌ಪಕು ಅದ್ಂಡ ಮುದ್ರೆಯಳ ಪೊಳಿಪಕು ಯೋಗ್ಯವಾನಂವೊ ದಾರ್‍ೕಂದ್ ಬಲ್ಯ ಸದ್ದ್‌ಲ್ ಕೂತ್ ಕೊಡ್‍ತಂಡಿಂಜ ಒರ್ ಶಕ್ತಿವಂತಂವೊನಾನ ದೇವದೂತನ ಸಹ ನಾನ್ ಕಂಡಿಯೆ.

³ಆ ಪುಸ್ತಕತ್‍ನ ತೊರ್‌ಪಕು, ನೋಟ್‍ವಕು, ಪರಲೋಕತ್‍ಲಾಡ್, ಬೂಮಿಯಿಲಾಡ್, ಅಲ್ಲತೆ ಬೂಮಿರ ಅಡಿಲಾಡ್ ದಾರ್‌ಕು ಕಯಿಂಜಿತ್‌ಲ್ಲೆ.

⁴ಆ ಪುಸ್ತಕತ್‍ನ ತೊರ್‌ಪಕು, ನೋಟ್‍ವಕು, ಯೋಗ್ಯನಾಯಿತ್ ಒಬ್ಬ ಸಹ ಇಲ್ಲತದ್‍ನ ಕಂಡಿತ್, ನಾನ್ ದುಂಬ ಮೊರಟಿಯೆ.

⁵ಅಕ್ಕ, ಪೆರಿಯಯಿಂಗಡಲ್ಲಿ ಒಬ್ಬ, ನನ್ನ ನೋಟಿತ್: ನೀನ್ ಮೊರಡತೆ, ಯೆಹೂದ್ಯ ಕುಲತ್‍ರ ಸಿಂಹವೂ, ದಾವೀದ ರಾಜಂಡ ಬೇರಾಯಿತ್ ಉಳ್ಳಂವೊ ಈ ಪುಸ್ತಕತ್‍ನ ತೊರ್‌ಪಕು ಅದ್ಂಡ ಏಳ್ ಮುದ್ರೆಯಳ ಪೊಳಿಪಕು ಗೆದ್ದಿತುಂಡ್‍ೕಂದ್ ಎಣ್ಣ್‌ಚಿ.

⁶ಸಿಂಹಾಸನತ್‍ರ, ನಾಲ್ ಜೀವ ಪ್ರಾಣಿಯಡ ಪಿಂಞ ಪೆರಿಯಯಿಂಗಡ ಮದ್ಯತ್‍ಲ್, ಮಿಂಞಲೇ ಬಲಿಯಾಯಿತ್ಂಜ ಕೊರಿ ಕುಟ್ಟಿರನೆಕೆ ಉಳ್ಳ ಒಬ್ಬನ ನಾನ್ ಕಂಡಿಯೆ; ಅದ್ಂಗ್ ಏಳ್ ಕೊಂಬ್ ಪಿಂಞ ಏಳ್ ಕಣ್ಣ್ ಇಂಜತ್. ಈ ಲೋಕತ್‍ರ ಎಲ್ಲಾ ಜಾಗಕು ಅಯಿಪಕಾಯಿತ್ ಉಳ್ಳ ದೇವಡ ಏಳ್ ಆತ್ಮವೇ ಈ ಏಳ್ ಕಣ್ಣ್.

⁷ಕೊರಿಕುಟ್ಟಿಯಾನಂವೊ ಬಂದಿತ್, ಸಿಂಹಾಸನತ್‍ಲ್ ಅಳ್‌ತಂಡಿಂಜವೊಂಡ ಬಲ್‌ತೆ ಕೈಯಿಲ್ ಇಂಜ ಪುಸ್ತಕತ್‍ನ ಎಡ್‍ತತ್.

⁸ಆ ಪುಸ್ತಕತ್‍ನ ಅಂವೊ ಎಡ್‍ಪಕ, ನಾಲ್ ಜೀವ ಪ್ರಾಣಿಯಳು, ಇರುವತ ನಾಲ್ ಪೆರಿಯಯಿಂಗಳು, ಕೊರಿಕುಟ್ಟಿರ ಮಿಂಞಕ್ ಅಡ್ಡ ಬುದ್ದತ್. ಅಯಿಂಗ ಒಬ್ಬೊಬ್ಬನು ಅಯಿಂಗಯಿಂಗಡ ವೀಣೇನ ಪಿಂಞ ದೇವಡ ಮಕ್ಕಡ ಪ್ರಾರ್ಥನೆಯಾಯಿತುಳ್ಳ ಸುಗಂದ ದೂಪತ್‍ರಗುಂಡ್ ದುಂಬ್‍ನ ಪೊನ್ನ್‌ರ ಪಾತ್ರತ್‍ನ ಪುಡ್‍ಚಂಡ್ ಅಯಿಂಗ:

⁹ನೀನ್ ಈ ಪುಸ್ತಕತ್‍ನ ಎಡ್‍ಪಕು, ಅದ್ಂಡ ಮುದ್ರೆಯಳ ಪೊಳಿಪಕು ಯೋಗ್ಯನಾಯಿತುಳ್ಳಿಯ; ಎನ್ನಂಗೆಣ್ಣ್‌ಚೇಂಗಿ, ನೀನ್ ಮಿಂಞಲೇ ಬಲಿಯಾಯಿತ್, ಎಲ್ಲಾ ಕುಲತ್ಂಜ, ಎಲ್ಲಾ ತಕ್ಕ್‌ಯಿಂಜ, ಎಲ್ಲಾ ಜನತ್‍ಂಜ, ಎಲ್ಲಾ ಜಾತಿಯಿಂಜ ಜನಳ ದೇವಕಾಯಿತ್ ನೀಡ ಚೋರೆನಗುಂಡ್ ಬುಡ್‍ಗಡೆ ಮಾಡಿತ್,

¹⁰ನಂಗಡ ದೇವಡ ಮಿಂಞತ್, ಅಯಿಂಗಳ ರಾಜಂಗಳಾಯಿತು, ಯಾಜಕಂಗಳಾಯಿತು ಮಾಡಿತ್: ಅಯಿಂಗ ಬೂಮಿಲ್ ರಾಜ್ಯಬಾರ ಮಾಡ್‌ವಾಂದ್, ಒರ್ ಪುದಿಯ ಪಾಟ್ ಪಾಡ್‌ಚಿ.

¹¹ಇಂಞು ಮಿಂಞಕ್ ನಾನ್ ನೋಟ್‍ವಕ: ಸಿಂಹಾಸನತ್‍ರ, ನಾಲ್ ಜೀವ ಪ್ರಾಣಿಯಳ ಪಿಂಞ ಪೆರಿಯಯಿಂಗಳ ಸುತ್ತ್‌ಲ್ ದುಂಬಿತ್ಂಜ ಬಲ್ಯ ಗುಂಪ್‍ರ ದೂತಂಗಡ ಸದ್ದ್ ನಾಕ್ ಕ್‍ೕಟತ್. ಅಯಿಂಗಡ ಲೆಕ್ಕ ಕೋಟಿಕೋಟಿಯಾಯಿತ್‌ಂಜತ್.

¹²ಅಯಿಂಗಳು ಸಹ, ಬಲ್ಯ ಸ್ವರತ್‍ಲ್: ಮಿಂಞಲೇ ಬಲಿಯಾಯಿತ್ಂಜ ಕೊರಿಕುಟ್ಟಿಯಾನಂವೊ, ಶಕ್ತಿಯು, ಐಶ್ವರ್ಯವು, ಜ್ಞಾನವು, ಬಲವು, ಗನವು, ಮಹಿಮೆಯು, ತುದಿಯು ಪಡೆಯುವಕ್, ಯೋಗ್ಯನಾಯಿತುಂಡ್‍ೕಂದ್ ಪಾಟ್ ಪಾಡ್‌ಚಿ.

¹³ಅದಲ್ಲತೆ, ಪರಲೋಕತ್‍ಲ್, ಬೂಮಿಲ್, ಬೂಮಿರ ಅಡಿಲ್ ಉಳ್ಳ ಸೃಷ್ಟಿಯ, ಸಮುದ್ರತ್‍ಲ್ ಪಿಂಞ ಅದ್‍ಲ್ ಉಳ್ಳ ಸೃಷ್ಟಯ ಎಲ್ಲಾ: ಸಿಂಹಾಸನತ್‍ಲ್ ಅಳ್‌ತಂಡುಳ್ಳವೊಂಗ್ ಪಿಂಞ ಕೊರಿಕುಟ್ಟಿಯಾನಂವೊಂಗ್, ತುದಿಯು ಗನವು ಮಹಿಮೆಯು ಶಕ್ತಿಯು, ಎಕ್ಕಾಲು ಕ್‍ಟ್ಟಡ್‍ೕಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್.

¹⁴ಅಕ್ಕ ನಾಲ್ ಜೀವ ಪ್ರಾಣಿಯಳು ಆಮೆನ್‍ಂದ್ ಎಣ್ಣ್‌ಚಿ. ಇರುವತ ನಾಲ್ ಪೆರಿಯಯಿಂಗಳು ಪುನಃ ಅಡ್ಡ ಬುದ್ದಿತ್ ಎಕ್ಕಾಲು ಜೀವವಾಯಿತ್ ಇಪ್ಪಂವೊನ ಆರಾದನೆ ಮಾಡ್‍ಚಿ.