Read Kodava ಪ್ರಕಟನೆ 7 Bible Online

ಪ್ರಕಟನೆ 7 - Kodava bible

ಪ್ರಕಟನೆ 7

¹ಇದಾನ ಪಿಂಞ ಬೂಮಿರ ನಾಲ್ ಮೂಲೆಲ್ ನಾಲ್ ದೇವದೂತಂಗ ನಿಂದಂಡ್ ಬೂಮಿರ ಮೇಲೆ, ಸಮುದ್ರತ್‍ರ ಮೇಲೆ, ಏದ್ ಮರತ್‍ರ ಮೇಲೆಯು ಗಾಳಿ ಬೀಜುವಾನ ತಡ್‍ತಿತ್, ಬೂಮಿರ ನಾಲ್ ಗಾಳಿನ ತಡ್‍ತನೆಕೆ ಕಂಡತ್.

²ಇದ್‍ಲ್ಲತೆ ಇಂಞೊರ್ ದೂತ ಜೀವವಾಯಿತುಳ್ಳ ದೇವಡ ಮುದ್ರೆರ ಕೋಲ್‍ನ ಎಡ್‍ತಂಡ್ ಕ್‍ೕಕ್ ದಿಕ್ಕ್‌ಂಜ ಪತ್ತಿಯಂಡ್ ಬಪ್ಪದ್‍ನ ಕಂಡತ್. ಅಂವೊ ಜೋರಾನ ಸ್ವರತ್‍ಲ್: ಬೂಮಿನ, ಸಮುದ್ರತ್‍ನ ಪಾಳ್ ಮಾಡ್‌ವಕ್ ಅದಿಕಾರ ಪಡ್ಂದ ನಾಲ್ ದೂತಂಗಳ ನೋಟಿತ್:

³ನಂಗ ನಂಗಡ ದೇವಡ ಸೇವಕಂಗಡ ನೆತ್ತಿರ ಮೇಲೆ ಮುದ್ರೆ ಇಡ್‍ವಕತ್ತನೆ, ಬೂಮಿನ, ಸಮುದ್ರತ್‍ನ, ಮರತ್‍ನ ಪಾಳ್ ಮಾಡತಿ ಎಣ್ಣಿಯಂಡ್ ಬಲ್ಯ ಸದ್ದ್‌ಲ್ ಎಣ್ಣ್‌ಚಿ.

⁴ಮುದ್ರೆ ಇಟ್ಟಯಿಗಂಡ ಲೆಕ್ಕ ನಾಕ್ ಕ್‍ೕಟತ್. ಇಸ್ರಾಯೇಲ್ ಜನತ್‍ರ ಎಲ್ಲಾ ಕುಲತ್‍ಂಜಲು ಮುದ್ರೆ ಇಟ್ಟಯಿಂಗ ಒರ್ ಲಕ್ಷತ್ ನಾಪತ ನಾಲಾಯಿರ ಜನವಾಯಿತ್ಂಜತ್.

⁵ಯೆಹೂದ ಕುಲತ್‍ಲ್ ಮುದ್ರೆ ಇಟ್ಟಯಿಂಗ 12,000, ರೂಬನಂಡ ಕುಲತ್‍ಲ್ 12,000, ಗಾದನಂಡ ಕುಲತ್‍ಲ್ 12,000,

⁶ಆಷೇರಂಡ ಕುಲತ್‍ಲ್ 12,000, ನೆಫ್ತಲೀಂಡ ಕುಲತ್‍ಲ್ 12,000, ಮನಸ್ಸೆಂಡ ಕುಲತ್‍ಲ್ 12,000,

⁷ಸೆಮೆಯೋನಂಡ ಕುಲತ್‍ಲ್ 12,000, ಲೇವಿಯಂಡ ಕುಲತ್‍ಲ್ 12,000, ಇಸ್ಸಾಕಂಡ ಕುಲತ್‍ಲ್ 12,000,

⁸ಜೆಬುಲೋನಂಡ ಕುಲತ್‍ಲ್ 12,000, ಯೋಸೇಫಂಡ ಕುಲತ್‍ಲ್ 12,000, ಬೆನ್ಯಾಮೀನಂಡ ಕುಲತ್‍ಲ್ 12,000.

⁹ಇದಾನ ಪಿಂಞ ನಾನ್ ನೋಟ್‍ವಕ, ದಾರೂ ಲೆಕ್ಕ ಎಡ್‍ಪಕ್ ಕಯ್ಯತನೆಕೆ ಇಂಜ ಸಂಖ್ಯೆತ್‍ರ ಜನ ಸಿಂಹಾಸನತ್‍ರ ಎದ್‍ಕೆ ಪಿಂಞ ಕೊರಿಕುಟ್ಟಿರ ಮಿಂಞತ್ ನಿಂದಂಡಿಂಜತ್. ಈಂಗೆಲ್ಲಾರು, ಎಲ್ಲಾ ಜಾತಿಯಿಂಜ, ಎಲ್ಲಾ ಕುಲತ್ಂಜ, ಎಲ್ಲಾ ಜನತ್‍ಂಜ, ಎಲ್ಲಾ ತಕ್ಕ್‌ಯಿಂಜ ಬಂದಯಿಂಗಳಾಯಿತ್ಂಜತ್. ಅಯಿಂಗ ಎಲ್ಲಾರು ಬೊಳ್‍ತ ಬಟ್ಟೇನ ಇಟ್ಟಂಡ್, ಕೈಯಿಲ್ ಖರ್ಜೂರ ಮರತ್‍ರ ಕೊಂಬ್‍ನ ಪುಡ್‍ಚಂಡ್ ನಿಂದತ್.

¹⁰ಅಯಿಂಗ: ರಕ್ಷಣೆ, ಸಿಂಹಾಸನತ್‍ರ ಮೇಲೆ ಅಳ್‌ತಂಡ್ ಉಳ್ಳ, ನಂಗಡ ದೇವಕು ಕೊರಿಕುಟ್ಟಿಯಾನಂವೊಂಗು ಕೂಡ್‍ನದ್‍ೕಂದ್ ಬಲ್ಯ ಸ್ವರತ್‍ಲ್ ಕೂತ್ ಕೊಡ್‍ತತ್.

¹¹ಅಕ್ಕಣೆಕ್, ದೂತಂಗ ಎಲ್ಲಾರು ಸಿಂಹಾಸನಕ್, ಪೆರಿಯಯಿಂಗಕ್ ಪಿಂಞ ನಾಲ್ ಜೀವ ಪ್ರಾಣಿಯಡ ಸುತ್ತ್‌ಲ್ ನಿಂದಂಡ್, ಸಿಂಹಾಸನತ್‍ರ ಮಿಂಞಕ್ ಅಡ್ಡ ಬುದ್ದಿತ್ ದೇವಕ್ ಆರಾದನೆ ಮಾಡ್‍ಚಿ.

¹²ಆಮೆನ್, ನಂಗಡ ದೇವಕ್ ತುದಿಯು, ಮಹಿಮೆಯು, ಜ್ಞಾನವು, ವಂದನೆಯು, ಗನವು, ಅದಿಕಾರವು, ಶಕ್ತಿಯು ಎಕ್ಕಾಲು ಇಕ್ಕಡ್, ಆಮೆನ್‍ಂದ್ ಎಣ್ಣ್‌ಚಿ.

¹³ಪೆರಿಯಯಿಂಗಡ ಕೂಟ್‌ಲ್ ಇಂಜ ಒಬ್ಬ ನನ್ನ ನೋಟಿತ್: ಬೊಳ್‍ತ ಬಟ್ಟೆ ಇಟ್ಟಂಡ್ ಉಳ್ಳ ಈಂಗ ದಾರ್? ಈಂಗೆಲ್ಲಾ ಎಲ್ಲಿಂಜ ಬಾತ್‍ೕಂದ್ ನನ್ನ ಕ್‍ೕಟತ್.

¹⁴ಅಕ್ಕ ನಾನ್: ಸ್ವಾಮೀ, ನೀಕೇ ಎಲ್ಲಾ ಗೊತ್ತುಂಡ್‍ೕಂದ್ ಎಣ್ಣಿಯೆ. ಅಕ್ಕ ಅಂವೊ: ಈಂಗ ಬಲ್ಯ ಹಿಂಸೆಯಿಂಜ ಬಂದಯಿಂಗ; ಈಂಗ ಅಯಿಂಗಡ ಬಟ್ಟೇನ ಕೊರಿಕುಟ್ಟಿರ ಚೋರೆಲ್ ನೆಲೆಚಿತ್ ಬೊಳ್‍ತದಾಯಿತ್ ಮಾಡ್‍ಚಿ.

¹⁵ಆನಗುಂಡ್, ಈಂಗ, ದೇವಡ ಸಿಂಹಾಸನತ್‍ರ ಮಿಂಞ ಇಂಜಂಡ್, ಬಯಿಟ್ ಪೋಲ್ ಅಂವೊಂಡ ಆಲಯತ್‍ಲ್ ಸೇವೆ ಮಾಡಿಯಂಡುಂಡ್. ಸಿಂಹಾಸನತ್‍ಲ್ ಅಳ್‌ತಂಡ್ ಉಳ್ಳಂವೊ ಅಯಿಂಗಡ ಮದ್ಯತ್‍ಲ್ ವಾಸ ಮಾಡಿಯಂಡ್ ಉಂಡ್.

¹⁶ಅಯಿಂಗಕ್ ಇಂಞು ಮಿಂಞಕ್ ಕೆಲ ಪಯಿಪುಲೆ, ಬಾಯಾರಿಕೆ ಆಪುಲೆ; ಬೆದ್ ಈಂಗಡ ಮೇಲೆ ಮುಟ್ಟುಲೆ ಪಿಂಞ ತಿತ್ತ್ ಈಂಗಳ ಚುಡುಲೆ.

¹⁷ಸಿಂಹಾಸನತ್‍ರ ಮದ್ಯತ್‍ಲ್ ಉಳ್ಳ ಕೊರಿಕುಟ್ಟಯಾನಂವೊನೇ ಈಂಗಳ ಚಾಕಿತ್, ಅಯಿಂಗಳ ಜೀವತ್‍ರ ಜಲ ಉಕ್ಕಿ ಬಪ್ಪ ಜಾಗಕ್ ಕಾಕಿಯಂಡ್ ಪೋಪ; ದೇವ ತಾನೆ ಅಯಿಂಗಡ ಕಣ್ಣ್‌ಂಜ ಕಣ್ಣೀರ್‌ನೆಲ್ಲಾ ತ್‍ೕಟ್‍ವಾಂದ್ ಎಣ್ಣ್‌ಚಿ.