Read Kok Borok YAPHANG 1 Bible Online

YAPHANG 1 - Kok Borok bible

YAPHANG 1

¹Yaphango Kaitor nokharok tei hayungno snam kha.[1]

²Hayung mungsa goron kwrwi bukcha tongma se, hakhe twi kuthuk khe mwnak koboljak; tei twirokni saka-o khe Kaitorni Phola[2] birkitingwi tongmani.

³Hakhe Kaitor “Pohor wng di” hwnwi sa kha, hakhe pohor wng kha.

⁴Tei Kaitor nuk kha a pohor kaham. Hakhe Kaitor pohor bai mwnakno swkak kha.

⁵Kaitor pohorno sal tei mwnakno khe hor hwnwi mung phar kha. Omo hai khe hor wng kha tei phung ai kha. Omo hai khe salsa wng kha.

⁶Hakhe Kaitor hai hwnwi sa kha, “Twirokno khakna bagwi twirokni kwcharo kaisa bukcha wng thung.”

⁷Hakhe Kaitor twirokno swkagwi o bukchani saka-o kaisa tei kháma-o kaisa khlai kha. Hakhe abo hai’-no wng kha.

⁸Kaitor o bukchano khe nokha hwnwi mung rw kha. Sal thángwi phung ai kha tei salnwini sal wng kha.

⁹Hakhe Kaitor hai hwnwi sa kha, “Nokharokni twirok kwrẃngsa-o khe thumjak thung tei hakung nukjak thung.” Hakhe ahai’-no wng kha.

¹⁰Kaitor o ha kwranno khe Hakung tei twi thumjakrokno khe Twijlangrok hwnwi mung phar kha. Hakhe Kaitor nuk kha, abo kaham.

¹¹Hakhe Kaitor hai hwnwi sa kha, “O ha-o bebak samrok, bwchlwi gwnang samphangrok tei bwthái tháinai buphangrok achai thung.” Hakhe abo hai’-no wng kha.

¹²Hakhe o hayungo dal-bidal samrok, bwchlwi gwnangrok tei bwthái tháinai buphangrok wng kha tei sak sakni mangduk na kha. Hakhe Kaitor abórokno kaham nuk kha.

¹³Hakhe hor wngwi phung ai kha tei salthamni sal wng kha.

¹⁴Hakhe Kaitor hai hwnwi sa kha, “Nokhani bukcha-o sal bai horno swkakna bagwi pohor kaisa wng thung tei marini bagwi jorarokni bagwi salrok tei bisirokni bagwi

¹⁵tei ha saka-o pohor rwna bagwi nokha-o pohor wng thung.” Hakhe abo hai’-no wng kha.

¹⁶Hakhe Kaitor pohor kotor kainwino snam kha. Pohor kotor kaisa khe salni bagwi tei kaisa lem pohor khe horni bagwi; bo athukiriroknobo snam kha.

¹⁷Bo a pohorrokno ha saka-o pohor wngna bagwi tei nokha saka-o khe ton kha,

¹⁸tei abórokno sal tei horno tẃina bagwi tei pohor bai mwnakno swkakna bagwi ton kha, hakhe Kaitor abórokno kaham nuk kha.

¹⁹Hor thángwi phung ai kha tei salbrwi sal wng kha.

²⁰Hakhe Kaitor hai hwnwi sa kha, “Twi-o hámung sini ya langma gwnang malrok bai kupulung wng thung tei nokha-o khe birnai tokrok kupulung wng thung.”

²¹Hakhe Kaitor twijlangni mal kotorrokno tei bebak twi-o tongnai langma gwnangrokno snam kha tei hámung sini ya birnai tokrokno snam kha. Hakhe Kaitor abórokno kaham nuk kha.

²²Hakhe Kaitor bórokno hamari rwui hai hwnwi sa kha, “Er di tei bángwi twijlangni twirogo supung di tei tokrokbo ha saka-o er thung.”

²³Hakhe hor wngwi phung ai kha tei salbani sal wng kha.

²⁴Hakhe Kaitor hai hwnwi sa kha, “O ha saka-o bebak juda juda langma gwnang mal-matarok: Yabrwirok, ha-o malwi himnairok wng thung” hakhe abo hai’-no wng kha.

²⁵Kaitor hayungni yabrwi mal-matarokno sak sakni sak-mang rwui bebak ha-o tongnairokno tei malwi himnairokno snam kha. Kaitor nuk kha abo kaham.

²⁶Hakhe Kaitor hai hwnwi sa kha, “Phai di chwng bai kosol khe borokno snamnai. Chwng omo hai khe snamnai; twini árok, nokha-o birnai tokrok tei nokni, bolongni[3] bebak yabrwi mal-matarok tei malwi himnairokni saka-o bórokni suar tongnai.”

²⁷Hakhe Kaitor borokno bono kosol khe snam kha, chwla tei bwrwi khe bórokno snam kha.

²⁸Tei Kaitor hamari rwui bórokno hai hwnwi sa kha, “Er di tei báng di, ha-o kupulung khlai di tei bórokno yapha-o ton di; phiya twijlangni árok tei nokhani toksa-toktẃirok tei ha saka-o tongnai langma gwnangrokno kók khna rwui ton di.”

²⁹Hakhe Kaitor hai hwnwi sa kha, “Nai di ang o ha saka-o tongma bebak bwchlwi gwnang buphang-uáphangrok tei bwthái tháinai bebak buphangrokno, nini chámungni bagwi rw kha, abórokno nwng chá di.

³⁰Ha sakani bebak malrok nokhani bebak toksa-toktẃirok, ha sakani bebak malnairok tei bebak rangma gwnangrokno ang bórokni chámungni bagwi bebak sam kwkhrangrokno rw kha.” Hakhe abo hai’-no wng kha.

³¹Hakhe Kaitor bo snamma bebak manwirokno naisigwi nai kha tei abórokno belai’-no kaham nuk kha. Hakhe sal tháng kha tei phung ai kha tei saldokni sal wng kha.