Read Kok Borok YAPHANG 11 Bible Online

YAPHANG 11 - Kok Borok bible

YAPHANG 11

¹Yaphango ha gwnangwi’-no borokrokni kókmung-kókrok thansa se tei kóktháirokbo kisa.

²Borokrok salkabaini thángwi bórok Babilonni hapharno nuk kha tei aro’-no kami kha ka.

³Bórok khoroksa tei khoroksano hai hwnwi sa lai kha, “Phai di chwng it tagwi sógwi rak rw lai anw.” Hakhe bórok nok tangna bagwi it tei abono chwrap rwna bagwi belengtwi man kha.

⁴Hakhe bórok hai hwnwi sa lai kha, “Phai di chwng chini bagwi kamiyung tang lai anw tei nokha jora kuchuk khe nok kuchuk khungsa tisa lai anw tei chini mung rw lai anw, omo hai khe chwng ha gwnangwi pisa-piring wng ya tẃi kurum-kuthum khe tongwi man lai anw.”

⁵Hakhe, Subraiyung borokrok tang laimani u kamiyungno tei a nok kuchukno naina bagwi nongkhorwi phai kha.

⁶Subraiyung hai hwnwi sa kha, “Nai di bórok borok kaisa se tei bórokni kókmungbo kaisa; tei omono bórok tamo khlaino aboni cheng grama se, phiya bórok khlaina hwnwi chap laimano tei samung cha rwui man glak kha.

⁷Phai di, chwng nongkhorwi thángwi bórokni kókno gothok lai ya khlaiwi rwui khoroksa bai tei khoroksano tamo sa kha romwi man lai ya khlai rw lai anw.”

⁸Omo hai khe Subraiyung bórokno ha gwnangwi’-no pisarwi rw kha tei bórok o kamiyung tisama yakarwi tháng lai kha.

⁹Aboni bagwi’-no abono Babel[23] hwnwi mung pharjago, tamni hwn ba Subraiyung aro’-no ha gwnangwini borokrokno kók gothok lai ya khlaiwi rw-o tei Subraiyung aroni’-no bórokno ha gwnangwi koproi rwui rw-o.

¹⁰Omorok wng kha Semni bosongrok: twi kotorni nokha bisik nwini ulo Semni umor nokha bisi sara phuru bo Arpaksad hwnwi bwsa chwla khoroksano man kha;

¹¹tei Sembo Arpaksad achaimani ulo nokha bisik bara thangwi tongwi tei kubun chwla tei bwrwi bwsarokno man lang kha.

¹²Arpaksadni umor nokha bisi thamchiba phuru khe bo bwsa chwla Selano man kha;

¹³aboni ulo bo tei nokha bisik brwithamra thangwi tongwi tei kubun bwsarokno man kha.

¹⁴Selani umor nokha bisik thamchi phuru bo bwsa chwla Eberno man kha,

¹⁵aboni ulo Eber achaimani nokha bisi brwiratham kwthang tongwi Sela teibo kubun bwsarokno man kha.

¹⁶Eberni umor nokha bisi thamchibrwi phuru bo bwsa chwla Pelegno man kha;

¹⁷aboni ulo bo teibo nokha bisik brwirathamchi thangwi tongwi tei kubun bwsarokno man kha.

¹⁸Pelegni umor nokha bisi thamchi phuru bo bwsa chwla Reuno man kha,

¹⁹aboni ulo bo teibo nokha bisik nwirachuku thangwi tongwi tei kubun bwsarokno man kha.

²⁰Reuni umor nokha bisi thamchinwi phuru, bo bwsa chwla Serugno man kha;

²¹aboni ulo bo tei nokha bisik nwirasni thangwi tongwi tei kubun bwsarokno man kha.

²²Serugni umor nokha bisi thamchi phuru bo bwsa chwla Nahorno man kha;

²³aboni ulo tei nokha bisi nwira thangwi tongwi tei kubun bwsarokno man kha.

²⁴Nahorni umor nokha bisi nwichichuku phuru, bo bwsa chwla Terano man kha;

²⁵aboni ulo bo tei nokha bisi sarachichuku thangwi tongwi tei kubun bwsarokno man kha.

²⁶Terani umor nokha bisi snichi phuru khe bo Abram, Nahor tei Haranni bupha wng kha.

²⁷Omorok wng kha Terani bosongrok. Tera wng kha Abram, Nahor tei Haranni bupha; tei Haran khe Lotni bupha.

²⁸Haran bupha kwthang tongsani’-no bini achaima ha Kolodiarokni Ur kamiyungo thwi kha.

²⁹Abram Saraino káijak kha tei Nahor khe Haranni bwsajwk Milkano káijak kha, bo wng kha Iskanibo bupha.

³⁰Sarai khe banji; bwsa man ya.

³¹Tera, bwsla Abram tei busuk Haranni bwsla Lotno tei bahamjwk Sarai Abramni bihikno tẃiwi Kolodiarokni hani Ur kamiyungni nongkhorwi Kanan ha-o thángna bagwi lam rwui tháng kha. Bórok kwchalma Haran jora tháng kha tei aro kami khaui lai kha.

³²Tera aro nokha bisik nwiraba wng khe Harano thwi kha.