Read Kok Borok YAPHANG 13 Bible Online

YAPHANG 13 - Kok Borok bible

YAPHANG 13

¹Hakhe Abram ha Ijipni nongkhorwi tháng kha, bo tei bihik tei bini bebak tongmarokno tei Lotno tlangwi Negebo tháng lai kha.

²Abram merarok, punrok tei mal-matarok bai gwnang wng kha, rangchak rukphaibo wng kha.

³Bo Negebni simi Bethel bwkhak tháng kha, hakhe swkango bo ríni nok tang thani sógwi kha. Abo Bethel bai Aini kwcharo,

⁴bo aro’-no swkang háyá snamo; tei aro’-no Abram Subraiyungno khulumo.

⁵Abram bai baksa thángnai Lotnibo merarok, punrok, mal-matarok tei bini hai’-no sakni núkhung bai selengrok tongo,

⁶aboni bagwi oro khoroknwi kwrẃngsa khe tongnani ha khochor kha; bórokni mal-matarok belai bángmani bagwi thansa khe kwrẃngsa-o tongwi man li ya,

⁷hakhe, Abramni mal-mata mwrwknairok bai Lotni mal-mata mwrwknairok uálai kha, a jora-o Kanansarok bai Peressarok a ha-o tongo.

⁸Hakhe, Abram Lotno hai hwnwi sa kha, “Nwng bai ang le uálaima cha ya tei nini mal-mata mwrwknairok bai ani mal-mata mwrwknairokbo uálaimabo cha ya; tamni hwn khe chwng wng kha sandai se.

⁹O bebak ha nini bwskango ya diba? Nwng ang bai nok juda wng si di. Nwng yaksi bwkhak tháng khe ang yagra bwkhak thángnai; eba nwng yagra bwkhak tháng khe ang yaksi bwkhak thángnai.”

¹⁰Hakhe Lot ayang-uyang nahar kha tei nuk kha Jordan rukung ha kaham, bebago twi nangjak, Subraiyungni tháiblwng[25] hai, ha Ijipni Juar phaisingni ha hai, omo wng kha Subraiyungni mokol bwskango bo sokomorma kamiyung Sodom bai Gomora.

¹¹Hakhe Lot Jordan rukungni bebakno saui na kha tei bo salkabai bwkhak tháng kha, omo hai khe bórok khoroknwi kak lai kha.

¹²Abram Kananni ha-o tong kha, Lot khe harungni kamiyungo tong kha tei Sodomni samo khe ríni nok tang kha.

¹³Sodomni borokrok khe belai’-no hamya tei Subraiyungni thani belai khe sumsok khlai kha.

¹⁴Lot bo bai kagwi tháng khe Subraiyung Abramno hai hwnwi sa kha, “Nwng tabuk tongmani oroni kaham khe nahar di, salgrabai, salsibai tei salkabai phiya salthángbai bwkhak nahar di;

¹⁵tamni hwn khe, nwng tabuk nuhurma-o harokno ang nono tei nini bosongrokno rw phlainai.

¹⁶Ang nini bosongrokno o ha sakani hasingsa hai khe er rwnai; ha sakani hasingsano khoroksa swk lekhaui man khe nini bosongroknobo lekhaui mannai.

¹⁷Bacha di, tabuk o ha tongsak’-no kebeng-kosong himwi nai di, tamni hwn khe ang nono omono rwnai.”

¹⁸Hakhe Abram aroni kutulwi tháng kha tei Mamreni uk buphangrok tongma Hebrono tongwi kha; aro bo Subraiyungni bagwi háyá kaisa snamwi kha.