Read Kok Borok YAPHANG 15 Bible Online

YAPHANG 15 - Kok Borok bible

YAPHANG 15

¹Aboni ulo khe, Abramno Subraiyung imang-mukthang khe hai hwnwi samano khna kha, “Ta kiri di, Abram, Ang nini phui; nini sokat belai kotor wngnai.”

²Tamo khe Abram hai hwnwi sa kha, “O Subraiyung Kaitor,[27] nwng ano tamo rwnai, tamni hwn ba ang tabukbo bwsa se kwrwi kho, ani bebakni mannai wngnai le Damaskosni Eliaser se?”

³Abram hai hwnwi sa kha, “Nai di, nwng ano bwsa-bẃtẃi se rw ya kho; tei ani nogo achainai seleng se ani bebakno mannai.”

⁴Nai di hai hwnwi Subraiyungni kók bini thani sók phai kha, “O borok nini bosongni manthaino man glak; nini sakni tei okni bwsa se nini bosongni mannanino mannai.”

⁵Tei bo bono phataro tubu-ui hai hwnwi sa phai kha, “Nwng nokha saka bwkhak naisa di tei nwng athukirirokno lekhaui da man nai di.” Hakhe bo bono hai hwnwi sa kha, “Nini bosongbo abo hai’-no wngnai”.

⁶Abram Subraiyungno bwkha bera kha; tei aboni bagwi Subraiyung bono bwkha phurjak kha tei bono borok kaham hwnwi yachak kha.

⁷Tei bono hai hwnwi sa kha, “Ang’-no Subraiyung, nono Koldiarokni ha Ur hani o hano rwnani tei tongna bagwi ringwi tubunai.”

⁸Tamo khe bo hai hwnwi sẃng kha, “O Subraiyung Kaitor, ang abono mannai hwnwi bahai khe saui mannai?”

⁹Bo bono hai hwnwi sa kha, “Ani thani nokha bisik thamni musuk masa, pun masa tei mera masa, tokthu masa tei pharuk bwsa masa tubu-ui phai di.”

¹⁰Hakhe bo abórokno bebakno tubu-ui phai kha tei kochoknwi khe rathar kha, khaksa khaksano nahar lalai khe beraui rw kha; tamo khe tokrokno le bo kochoknwi khlai li ya.

¹¹A kwthwirokni saka-o sikruk klai phai kha, tamo khe abórokno Abram rwgwi rohor kha.

¹²Sal tháng rw rwk wng kheno, Abram belai khe muktrwi phaijak kha; hakhe bini sago kirima tei mwnakma phai sók phai kha.

¹³Hakhe Subraiyung bono hai hwnwi sa kha, “Nini bwsarok buini ha-o phatarni borok wngwi ma tongwinai; bórok aro seleng wngwi ma tongwinai tei bisibrwira belai khe sátokjagwi ma tongwinai;

¹⁴tamo khe bórokno seleng khati rwnairokno ang majra rwnai tei bórok a hani nongkhorwi phai phuru khe bórok kwbángma rangchak-ríchak tlangwi thángnai.

¹⁵Nwng sakbo umor kolok wngwi tongwi kwchang kwchang khe chakra umoro thwiwi phobjaknai.

¹⁶Nini bosongrok oro kiphilwi phai ya sini aro bosong kusungbrwi kánai; tamni hwn ba, Amorsarok belai borok hamya wng súgwi majra berjakna nang súk ya sak ang bórokno rwkhlai glak.”

¹⁷Sal thángwi, mwnak wng khe, hoku nongkhorjak hórni twk tei hór chẃngjak homchang nukjagwi a ratharjak muini kwchar tẃi láiwi tháng kha.

¹⁸A salo Subraiyung Abram bai hai hwnwi saui swmai tang kha, “Nini bosongrokno ang o hano rw-o; Ijipni twimani simi Uphratis twima jorani harok,

¹⁹Kenini ha, Kenijisasongni ha, Kadmosongni,

²⁰Hitisongni, Peressongni, Rephaimsongni,

²¹Amorsasongni, Kanansasongni, Girgassasongni tei Jebussasongni ha.”