Read Kok Borok YAPHANG 16 Bible Online

YAPHANG 16 - Kok Borok bible

YAPHANG 16

¹Tabuk Abramni bihik khe Sarai bwsa man ya. Bini khoroksa Ijipjwk seleng tongo bini mung khe Hagar;

²hakhe Sarai Abramno hai hwnwi sa kha, “Subraiyung ano bwsa man ya khe ton kha; nwng ani selengjwkni thani tháng di, abo hai khe ang bini bising tẃi khe bwsa manẃi mano.” Tei Abram Sarai samani kókno khna kha.

³Hakhe Abram Kanan ha-o nokha bisi chi jora tong kha, Abramni bihik Sarai Ijipni bwrwi selengjwk Hagarno bwsai Abramno hik na di hwnwi rwui rw kha.

⁴Hakhe bo Hagarni thani tháng kha tei bo sakderiya wng kha; Hagar sakderiya wngma bai, bo bini nokphangjwkno sak nangjak ya wng kha.

⁵Hakhe Sarai Abramno hai hwnwi sa kha, “Ano hamya khlaima nini sago nang thung! Ang ani selengjwkno nini khuri-o rw kha tei bo sakno sakderiya wngma nugwi, bo ano naislerjak kha Subraiyung nono bai ano buj thum thung!”

⁶Tamo khe Abram Saraino hai hwnwi sa kha, “Nai di nini selengjwk le nini yapha-o se; nwng bono nini muchung tẃi’-no khlai di.” Hakhe Sarai bono tekto rw kha hakhe bo Saraini aroni khár kha.

⁷Subraiyungni suari Hagarno hasingkhongni kwrẃngsa twimuk tongma-o nuk kha, a twimuk Surni lama-o klai-o.

⁸Hakhe bo hai hwnwi sa kha, “Hagar, Saraini selengjwk, nwng buroni phaiwi buro thángna naiwi tong?” Hagar hai hwnwi sa kha, “Ang ani bugrajwk Saraini aroni khárma se.”

⁹Hakhe Subraiyungni suari bono hai hwnwi sa kha, “Nini bugrani thani kiphilwi thángwi bini thani nwng Sakno yapharwi di.”

¹⁰Subraiyungni suari bono hai hwnwi sa kha, “Ang nini bosongno aswk kwbáng khe er rwnai abórokno lekhaui pái man glak.”

¹¹Subraiyungni suari bono hai hwnwi sa kha, “Nai di nini ogo tabuk bwsa tongo, nwng bwsa chwla bánai, nwng bono Ismael[28] hwnwi mung phar di; tamni hwn ba Subraiyung nini tektono nuk kha,

¹²Bo borokrokni bisingo bolongni korai hai wngnai, bini yak bebakno’-no kebengnai tei bebak borokrokbo bono kebengnai; tei bo bebak bini borokrok bai kebengwi tongnai.”

¹³Hakhe Hagar bini thani kók sanai Subraiyungno suriui hai hwnwi sa kha, “Nwng wng kha nuknaisa Kaitor”; phiya Hagar hai hwnwi sa kha, “Ang kubui’-no da Kaitorno nuk kha tei bono nugwibuda thangwi tong kho?”

¹⁴Aboni bagwi a twikhor Bir-Lahairoi hwnjago; abo Kades bai Beredni kwcharo.

¹⁵Hagar Abramni bagwi bwsa chwla khoroksa bá kha; Abram, Hagar bámani bini bwslano Ismael hwnwi mung phar kha.

¹⁶Hagar Ismaelno bá phuru Abramni umor bisicharchidok wng kha.