Read Kok Borok YAPHANG 17 Bible Online

YAPHANG 17 - Kok Borok bible

YAPHANG 17

¹Abramni umor nokha bisi chukuchichuku phuru Subraiyung Abram bai nukjak kha tei bono hai hwnwi sa kha, “Ang Kwplaisa Kaitor;[29] Ani kók khna di tei samung cha ya ta khlai di.

²Ang nwng bai swmai tangnai tei nono kwbángma khe er rwnai.”

³Hakhe Abram bono ha-o botok khe klaiwi khulum kha; tei Kaitor bono hai hwnwi sa kha,

⁴“Nai di ang nwng bai swmai tango, nwng kwbángma bosongni bupha wngnai.

⁵Nini mung Abram tong glak kha, tamo khe Abraham[30] se wngnai; tamni hwn ba ang nono dopha kwbángmani bupha snam kha.

⁶Ang nono bwthái gwnang khlainai; tei ang nini aroni dopharok khlainai. Tei nini aroni habugrarok phainai.

⁷“Ang nwng bai ani swmaino narwknai tei mol brúmni bagwi nini bosongrokbo ang ani swmaino tẃinai. Ang nini tei nini bosongni Kaitor wngnai.

⁸Nwng tabuk Kanan ha-o tongwi tongo, o hano ang nono tei nini thinangni bosongno mol brúmni bagwi rwnai tei ang bórokni Kaitor wngnai.”

⁹Kaitor Abramno hai hwnwi sa kha, “Nwngbo hai’-no ani swmaino ma tẃinai, nwng tei nini bosongrok, bórokni ulni bosongrok kusung kusungo bebak tẃi phlaiwi ma thángnai.

¹⁰Omono wng kha ani a swmai, nwng tei nini ulo khe nini bosongrok ma tẃinai; nini bisingni bebak chwla bwsarok’-no sakur ma rajaknai.

¹¹Nini sakurno ma ranai, abo’-no ang nwng bai swmai tang laimani a mari wngnai

¹²Nini bisingni nokha salcharni borok wng khe’-no sakur ma ranai; nini núkhungo achainai, eba nini bosongni ya tamo khe phatarni nini nogo rang bai paiwi tubujaknai seleng bebak chwla bwsarokno,

¹³nini nogo achainai eba rang bai paiwi tubujaknai seleng phano sakur ma rajaknai.

¹⁴Khoroksa swk chwla bwsa sakur rajak ya hwn khe bo bini borokrokni bisingni swkagwi khibijaknai, tamni hwn ba bo ani swmaino tẃi li ya.”

¹⁵Kaitor Abramno hai hwnwi sa kha, “Nwng tei nini nihik Saraino Sarai[31] hwnwi ta ring si di, tamo khe bini mung Sara se wng sinai.

¹⁶Ang bono hamari rwnai tei ang bini tẃi khe nono chwla bwsa khoroksa rwnai; Ang bono hamari rwnai tei bo dopharokni buma wngnai; phiya bini aroni’-no borokrokni habugrarok wngnai.”

¹⁷Hakhe Abraham ha-o botok khe klaiwi khulum kha tei bwkha bising bising mwnwiwi hai hwnwi sa kha, “Umor nokha bisi sarani borok chakra wngwi buda bwsa manno kho? Sarani umor nokha bisi chukuchi wngwi bo bwsa da man sino?”

¹⁸Hakhe Abraham Kaitorno hai hwnwi sa kha, “Ismael nini mokol bwskango tongwi umor kolok wng thung!”

¹⁹Kaitor hai hwnwi sa kha, “I’nhi, kók khe ahai, nini hik Sara bwsa chwla khoroksa mannai tei nwng bono Isak[32] hwnwi mung phar di. Ang bo bai khe tei bini ulni bini bosongrok bai khe mol brúmni bagwi swmai tangnai.

²⁰Nwng Ismaelni bagwi koimano ang khna kha, Ang bono hamari rwnai tei bosong kwbángma er rwnai, Ang bono bosong kotor khlainai tei khorokchinwi bugrarokni bupha wngnai.

²¹Tamo khe ang Isak bai se ani swmaino songchanai, khali omo hai jora’-ono Sara nini bagwi bánai.”

²²Kaitor bo bai kók sa bai khe Abrahamni aroni tháng kha.

²³Hakhe, Kaitor Abramno sama tẃi’-kheno bo bwsa chwla Ismaelno tei bini nogo tongma bebak chwlarokno phiya bini-o achai phaima paiwi tubujaknai selengrokno a salo’-no sakur ra bai kha.

²⁴Abraham sákolomni sakur rajak phuru bini umor nokha bisi chukuchichuku ká kha.

²⁵Tei Ismael sakur rajak phuru bini umor khe nokha bisi chitham ká kha.

²⁶A Sal kaisa’-ono Abraham bai bini bwsla Ismael sakur rajak lai-o;

²⁷bini nokni bebak chwlarokbo tei bini nogo achainairok tei buini hani rang bai khe paiwi tubujaknairokbo bo bai baksa khe’-no sakur rajak bai-o.