Read Kok Borok YAPHANG 20 Bible Online

YAPHANG 20 - Kok Borok bible

YAPHANG 20

¹Abraham aroni Negeb amchoi bwkhak tháng kha tei Kades bai Surni kwcharo tongwi kha; ulo khe Geraro tongwi kha.

²Abraham bini bihik Sarano “Bo ani bukhuk se” hwnwi sa kha. Hakhe Gerarni habugra Abimelek Sarano bini thani tubu rw kha.

³Tamo khe Kaitor horsa Abimelekni thani imango nukjak phaiwi hai hwnwi sa kha, “Nai di nwng thwinai tamni hwn ba nwng tubumani o bwrwi wng kha tei khoroksani bihik se.”

⁴Hai phano Abimelek a bwrwini thani tháng ya kho; hakhe bo hai hwnwi sa kha, “Subraiyung, nwng borok kahamno hai’-no butharnai hai da?

⁵‘Bo ani bukhuk se’ hwnwi bo se ano sa ya diba? O bwrwi bo sakno ‘Bo ani takhuk se’ hwnwi sa bla. Ang omo sói bwkha srai-srai khe se khlai-o tei ang mungsabo cha ya khlai ya.”

⁶Hakhe Kaitor bono imango hai hwnwi sa kha, “I’n ang saui mano, nwng omo bwkha srai-srai kheno khlai-o tei ang se nono sumsok samungni kati rwui tono; abo bai’-no ang nono bini sak tang rw yaui tono.

⁷Tabuk nwng bihikno kiphilwi rw di; bo wng kha diyari, hakhe bo nini bagwi suri khe nwng thangnai. Nwng bono kiphilwi rw ya khe si di nwng thwinai’-no thwinai tei nini borokrokbo bebakno thwinai.”

⁸Hakhe Abimelek phung aidrobo bacha kha tei bini bebak selengrokno ringwi a bebak kókrokno sa kha; tei borokrok bebakno belai khe kirijak lai kha.

⁹Hakhe Abimelek Abrahamno ringwi hai hwnwi sa kha, “Nwng chwngno tamo khlai lang? Ang bahai nini thani cha ya khlaiwi nwng ani bagwi tei ani hani bagwi aswk hamya sumsokno tubu rw lang? Khlaithai kwrwino nwng ani thani khlai kha.”

¹⁰Phiya Abimelek Abrahamno hai hwnwi sa kha, “Nwng twma khákaui omo hai khlai lang?”

¹¹Abraham hai hwnwi sa kha, “Omo hai ma khlaima le, ang oro Kaitorno kirinai se kwrwina tei ani hikni bagwi bórok ano butharnai hwnwi se ma khlai-o.

¹²Abono karwi bo ani bukhuk’-no kwbo klai-o, bo ani aphani bwsajwk, tamo khe amani bwsajwk ya; tei ang bono káijak kha.

¹³Phiya Kaitor ano aphani nokni rwi rohor phuru, ang bono sa kha, ‘Nwng kháirogwi ano omo hai ma khlainai; chini bebak tháng thani’-no ano nwng ‘Bo ani takhuk se’ hwnwi ma sanai.”

¹⁴Hakhe Abimelek, musukrok, merarok selengrok tei selengjwkrokno tubu-ui Abrahamno rw kha, phiya Sarano kiphilwi rw kha.

¹⁵Abimelek hai hwnwi sa kha, “Naisik di o nini mokol bwskangni harok bebak ani máng; nwng muchungma’-ono tong di.”

¹⁶Bo Sarano hai hwnwi sa kha, “Nai di ang nini takhukno rukphai budul dulsaisa rw kha; abo norok bai tongnai bebak borokni thani nini mungsa majra kwrwi hwnwi sijak rwna mari se; bebakno sinai nwng mungsa cha ya khlai ya.”

¹⁷Hakhe Abraham Kaitorni thani suri kha; tei Kaitor Abimelekno, bihikno tei selengjwkrokno ham rw kha bórok bwsarokbo man bai kha.

¹⁸Tamni hwnma le Abrahamni bihik Sarani bagwi bini nokni bebak bwrwirokno Subraiyung bwsa man ya khlai rw kha.