Read Kok Borok YAPHANG 22 Bible Online

YAPHANG 22 - Kok Borok bible

YAPHANG 22

¹Aboni sal kisa ulo khe Kaitor Abrahamno amjogwi nai kha, bo bono “Abraham” hwnwi ring kha, hakhe Abraham khorang yachagwi “Ang oro se!” hwnwi sa kha.

²Kaitor hai hwnwi sa kha, “Nwslano na di, nini hamjak kukma khoroksa susuk nwsla Isakno tẃiwi ha Moria-o thángwi ang phunukma a hathái-o tlangwi tanwi sógwi ma barogwinai.”

³Hakhe Abraham phung aidrop bacha kha tei bini korai chirka saka-o manwirok boksa kha, bo bai baksa tei khoroknwi chwla siklano tei bwsla Isakno tẃi kha; sógwi barokna bagwi bo bol tẃi kha tei Kaitor bono tháng di hwnwi sama hathái phaising lam rwui tháng kha.

⁴Salthamni salo khe Abraham tháng di hwnjakma a hatháino naisik horwi hakchal khe nuhur kha.

⁵Aphuru khe Abraham bo bai baksa tlangma a sikla khoroknwino hai hwnwi sa kha, “Oro korai chirka bai baksa tong rwk di; ang bai chwraisa simi aro thángwi khulumui norokni thani kiphilwi phai anw.”

⁶Abraham sógwi barokna bagwi tlangma a bolno naui bwsla Isakno tẃi rw kha; tei bo sak khe bini yago hór bai dasano tẃi kha.

⁷Isak bupha Abrahamno hai hwnwi sẃng kha, “Apha,” hakhe bupha hai hwnwi sa kha, “I’n tamo sajla?” Isak hai hwnwi sẃng kha, “Nai di hór bai bol simi se tongo; tamo khe sógwi barokna bagwi mera le buko biyang?”

⁸Abraham hai hwnwi sa kha, “Sajla Kaitor baithang’-no, sógwi barokna bagwi jugaliui rwnai.” Hakhe bórok phasaknwi’-no tháng lai kha.

⁹Kaitor samani hathái-o bórok sók phai khe, Abraham aro háyá kaisa snam kha tei bolrokno jai khe bera kha tei bwsa Isakno khaui háyá-o bolrokni saka-o khe boksa kha.

¹⁰Hakhe Abraham bwslano tanna bagwi dasano kariui har kha.

¹¹Tamo khe Subraiyungni suari chuknohani ringwi bono hai hwnwi sa kha, “Abraham, Abraham!” hakhe bo sa kha, “I’n ang oro se.”

¹²Kaitor hai hwnwi sa kha, “Nwng chwraini saka-o yak ta tisa di, bono mungsa ta khlai di; tamni hwn khe, ang saui man kha nwng Kaitorno kiri’-ono, ang nuk kha nwng nwsla khoroksa susuknobo ano rwnani yak kwcha li ya.”

¹³Abraham bokhorok tisaui naisigwi nai kha, hakhe bini uklogo budukrok bai khe bokorongo kubuljak mera masa nuk kha tei Abraham thángwi a merano romwi tubu-ui bwslani sak slái-o a merano sógwi yaphar kha.

¹⁴Aboni bagwi Abraham a hatháino Subraiyung se Jugaliui rwnai[43] hwnwi mung phar kha; a kók tabuk jorabo sajagwi’-no tongo, “Subraiyungni hathái-o Jugaliui rwjaknai.”

¹⁵Subraiyungni suari chuknohani tei uáisa Abrahamno ringwi sa kha,

¹⁶“Ang baithangni mung bai’-no swmai tangwi sa-o, nwng omo tẃi samung tang kha, nwsla khoroksa susukno narwgwi ton li ya,

¹⁷Ang nono hamari rw sinai’-no, ang nini bosongno nokhani athukiri hai khe tei twijlang rukungni hasing hai khe er rwnai. Tei nini bosongrok bórokni arirokni hapmani duglamno seknai,

¹⁸phiya nini bosongrokni tẃi khe ha sakani bebak dopharok hamari mannai, tamni hwn ba nwng ani kókno khna kha.”

¹⁹Hakhe Abraham bo bai baksa khe tubuma a sikla khoroknwirokno kabuma-o kiphilwi phai kha tei pal khe lam rwui Birseba-o tháng lai kha; tei Abraham Birseba-o kami khaui tongwi kha.

²⁰Aboni sal kisa ulo khe Abraham hai hwnwi sajak kha, “Nai di Milka nini takhuk Nahorni bagwi bwsarok bá kha.

²¹Uj wng kha okra, buphayung khe Buj, Kemuel khe Aramni bupha,

²²tei Kesed, Hajo, Pildas, Jidlap tei Bethuel.”

²³Bethuel khe Rebekani bupha. Milka-o khorokcharno Abrahamni takhuk Nahorni bagwi bá kha.

²⁴Abono karwibo bini hik kotoi Reuma khe, Teba, Goham, Tahas tei Makano bá kha.