Read Kok Borok YAPHANG 23 Bible Online

YAPHANG 23 - Kok Borok bible

YAPHANG 23

¹Sara nokha bisi sara tei nwichisni jora kwthang tong lang kha; Sara omo swk bisi tong lang kha.

²Bo ha Kananni Hebrono thwi-o tei Abraham bini bagwi bwkha khamwi kap kha.

³Abraham a kwthwino klangwi Hitisarokni thani thángwi hai hwnwi saui kha.

⁴“Ang buini hani borok norokni ha-o tong janai se; ani bwskangni mang kwthwino phobna bagwi ano ha kisa rw ja di.”

⁵Hakhe Hitisarok Abrahamno hai hwnwi sa kha,

⁶“Hodasa chini kók khna di; nwng chini bisingo phankrak tẃiphang. Nwng nini muchungma mangkhoro’-no nini mang kwthwi phob di; chini bisingo khoroksa phano bini mangkhoro’-no rw yaui tong glak eba nini kwthwino phob rw yaui tong glak.”

⁷Abraham bachaui a hani borok Hitisongno khulum kha.

⁸Tei bo bórokno hai hwnwi sa kha, “Norok ani mang kwthwino oro phob rwna lon khe, ani kók khna ja di; Joharni bwsla, Ephronni

⁹Makpelani hakhorno ano rwna bagwi saui rw di; abo bini hani páithago. A hano ang a mangkhorno paiwi namani marini bagwi bebak rang norokni bwskango’-no bono rwui páinai.”

¹⁰Ephron Hitirokni bisingo’-no achukjak, kamiyungni duglamo aro thángnai bebak Hitisarokni bwskango Hitisa Ephron Abrahamno sa kha,

¹¹“I’nhi hoda ani kók khna gra di; ang nono a hanobo rw-o tei a hakhornobo rw-o; ang omo ani borokrokni bwskango’-no rw-o; nini mang kwthwino phob di.”

¹²Hakhe Abraham a hani borokrokno khulum kha.

¹³Hakhe bo bebak lukurokno khna rwui Ephronno hai hwnwi sa kha, “Nwng muchung khe ani kók khna ja di, ang ani mang kwthwino oro phobwi manna bagwi ang o hani rang rwmano yachak ja di.”

¹⁴Ephron Abrahamno hai hwnwi sa kha,

¹⁵“Hoda, ani kók khna ja di; ha phalasani rang khe brwi-ra rukphai budul se, abo nini bai ani bisingo ba tamo? Nini kwthwino phob di.”

¹⁶Abraham, Ephron bai lon lai kha; bo Ephronno Hitisarokno sama swk’-no rw kha, abo ra brwi rukphai belep, a jora-o bepar thwngnairokni rwta tẃi khe abono rwta kha.

¹⁷Mamreni salkabai-o Ephronni Makpelani ha tei aro tongma hakhor tei charani buphangrok, bebakno,

¹⁸Hitisarokni bwskango’-no tei bebak kamiyungni duglamo thángnairokni bwskango Abrahamni hwnwi rwjak kha.

¹⁹Aboni ulo khe Abraham bihik Sarano Mamreni salkabaini Makpela-o tongma a hakhoro phob kha, (abo wng kha Hebron) abo Kanan ha-o.

²⁰Aroni ha tei aro tongma hakhor bebak Hitisarokni yakni paiwi Abraham bebakni nokphang wng kha.