Read Kok Borok YAPHANG 25 Bible Online

YAPHANG 25 - Kok Borok bible

YAPHANG 25

¹Abraham tei khoroksa bwrwino káijak kha tei bini mung khe Ketura.

²Bo Simran, Joksan, Medan, Midian, Isbak tei Suano bini bagwi bá kha.

³Joksan khe, Seba bai Dedanni bupha. Dedanni bwsarok khe Asurim, Letusim, Leomim.

⁴Midianni bwsarok wng kha, Epha, Epher, Hanok, Abida tei Elda. Omorok bebak’-no Keturani bwsarok.

⁵Abraham bini tong kwrwi bebakno Isakno rw bai kha.

⁶Bo kwthang tong phuru bini tei kubun bihik kotoisongrok bámani bini bwsaroknobo hilirok rw bai kha. Hakhe bo a bwsarokno bwsla Isak bai hakchal khe salkabaini ha-o rwui rohor kha.

⁷Abraham nokha bisi sarasnichiba thangwi tong lang kha.

⁸Abraham bini umor rá súgwi, umor pái súgwi’-no thwi kha tei bini borokrok bai tongwi kha.

⁹Isak bai Ismael bini bwslasong bono Makpelani hakhoro phob kha, abo wng kha salkabaini haphar Hitisa Joharni bwsla Ephronni ha panthor,

¹⁰Abo khe Abraham Hitisasongni aroni paimani ha; Abraham bai bihik Sara khoroknwi’-no arono phobjago.

¹¹Abraham thwimani yagulo khe Kaitor Isakno hamari rw kha. Tei Isak Bir-Laharoi o tongwi kha.

¹²Omorok wng kha Ijipjwk Hagar, Sarani selengjwk bámani Abrahamni bwsla Ismaelni bosongrok:

¹³Bórokni mungrok khe, mareui swkang achaigranaini simi; Nebaiot khe Ismaelni bwsa okra; teirok khe Kedar, Adbil, Mibsam,

¹⁴Misma, Duma, Massa,

¹⁵Hadad, Tema, Jetur, Naphis tei Kedema.

¹⁶Omorokno Ismaelni bwsarok, bórokni mung rwgwi’-no bórokni kamirokni mungbo pharjago tei bosong thwgwi khorokchinwi bugra chongjak.

¹⁷(Ismael nokha bisi sara tei thamchisni umor phuru-o thwi kha tei bini sandairok bai baksa tongwi kha.)

¹⁸Bini bosongrok Habila bai Surni amchoini kwcharo, Ijipni salkabai-o tei Asiriya thángma lama-o sandairok bai pal khe kami kha lai tong lai kha.

¹⁹Omorok wng kha Abrahamni bwsla Isakni bosongrok; Abraham wng kha Isakni bupha,

²⁰Isakni, Padan-aramni Aramiasa Bethuelni bwsajwkno tei Labanni bahanokno káijak phuru Isakni umor nokha bisi brwichi ká kha.

²¹Rebeka bwsa man yani bagwi, Isak Subraiyungni thani suri kha; hakhe Subraiyung bini surimano khna kha tei bihik Rebeka sakderiya wng kha.

²²Bini ogo bwsa khoroknwirok dundrok lai kha; hakhe bo hai hwnwi sa kha, “Omo hai wng khe, bahai khe ang thangwi tongnai?” Hakhe bo Subraiyungno sẃngnani tháng kha.

²³Hakhe Subraiyung bono hai hwnwi sa kha, “Nini ogo dopha kwnwirok tongo, nwng kwtha lai ya dopha kwnwino bánai, khoroksa tei khoroksani slái raknai; okra kusuno ma monnai.”

²⁴Bini sak keng phuru khe, bo bwsa apher bá kha.

²⁵Swkang achaigranai khe kwchak tei bini bwsak buikhumu gwnang rí hai, abo bai’-no bono Esau[45] hwnwi mung phar kha.

²⁶Aboni ulo khe tei khoroksa Esauni yakoraino kwrak khe romwi nongkhorwi phai kha, hakhe bono Jakob[46] hwnwi mung phar kha. Bórok achai phuru Isakni umor nokha bisi dokchi ká kha.

²⁷A chwrairok tor kha lok kha, Esau khe poluan kaham wng kha, bo phataro tongnano hamjago, Jakob khe kwchang kwchang borok, nogo máng tongo.

²⁸Isak Esauno hamjago, tamni hwn ba bo Esau butharmani muihan thokjago; Rebeka khe Jakobno hamjago.

²⁹Salsa Jakob tha sóngwi tongo, Esau khe mui rwgwi phai-o, bo belai khe ok khuijak.

³⁰Aphuru khe Esau Jakobno hai hwnwi sa kha, “Ang belai ok khui tong kha, ano kisa u tha sóngjakno chá rw ja di.” (Aboni bagwino bono Idom[47] hwnjago.)

³¹Jakob hai hwnwi sa kha, “Swkang nwng ano nini okrani manthaino phalwi rw gra di.”

³²Esau hai hwnwi sa kha, “Ang thw se thwinai kha, okrani manthai ba ani tamo chúk?”

³³Jakob hai hwnwi sa kha, “Swkang ano swmai tangwi kók rw gra di.” Hakhe tei Jakobno bini achaimani manthaino bo phalwi rw kha.

³⁴Hakhe Jakob bono auang kisa tei tha sóngmani bwtwino rw kha. Hakhe Esau cháui nungwi bini achaimani manthaino khibiui rw kha.