Read Kok Borok YAPHANG 34 Bible Online

YAPHANG 34 - Kok Borok bible

YAPHANG 34

¹Salsa Jakob bai Leani bwsajwk Dina, a hani bwrwirok bai malaina bagwi tháng kha.

²Aphuru khe Hamorni bwsla Sekem Hibisa, a hani bugrani bwsla bono nuk khe tlangwi thángwi bono romphreui thu kha.

³Bo Jakobni bwsajwkno bwkha phurjak kha tei hamjak kha; bini bwkha manna bagwi bo kók kwtẃi kwtẃi sa kha.

⁴Hakhe Sekem bupha Hamorno “Nwng ano o bwrwi bai ma káinai” hwnwi sa kha.

⁵Jakob, Sekem bwsajwkno mung hamya man rwmano khna kha; tamo khe bwsarok aphuru mal-matarok mwrwgwi tongwi-o aboni bagwi bórok kiphil yasakno kwchang kwchang kheno tong gra kha.

⁶Hakhe Sekemni bupha Hamor Jakob bai kók sa laina bagwi tháng kha.

⁷Jakobni bwsarok abono khnaui mal-mata mwrwkmani kiphilwi phai lai kha; bórok bwkha hamjak li ya tei belai khe jolijak bai kha, tamni hwn khe bo Jakobni bwsajwkno romphreui bo bai thu-ui Israilrokno lachi rw kha.

⁸Phiya ba Hamor bono hai hwnwi sa kha, “Angsla Sekemni bwkha le nwsajwkno khátang súgwi tong kha, bono bo bai kái si di.

⁹Phai di chwng bai kái lai si di; nwsajwksongno chini bwsa chwlarok bai kái lai anw tei chini sajwksong baibo nwslasongno kái si di.

¹⁰Norok chwng bai’-no thansa khe tong di, norok tongna muchung thani’-no tong di, pabo pai di, phabo phal di, sak sakni bagwibo aji di.”

¹¹Sekem Dinani bupha tei bini takhuksongrokno hai hwnwi sa kha, “Norok ano lon bai di, hakhe ang norok sanmani tẃi’-no rwnani.

¹²Norok tamo hili nai sa di, bwrwini bagwi kái laimungni hilibo norok ano sanma swk’-no rwnai. Norok ano bo bai simi kái di.”

¹³Sekem bórokni bukhuk Dinano dera rwmani bagwi, Jakobni bwsarok bwsla Sekem bai bupha Hamorno bandiui sa kha.

¹⁴Bórok bórokno hai hwnwi sa kha, “Chwng o samung khlaiwi man ya, chwng sakur rajak yarokni thani chini bukhukno rwui man ya, abo hai khe chini lachimung wngnai se.

¹⁵Omo hai hwn khe simi se wngwi mano, norokbo chwng hai ma wngnai bebak chwlarok sakur ma rajaknai.

¹⁶Abo hai khe se chwng norok bai kái laiwi tei káijak laiwi mannai tei chwng orono tong phlaiwi norok bai bosong kaisa wngnai.

¹⁷Phiya norok chwng samano lon yaui sakur rajak ya khe chwng bono tlangwi thángwi páinai.”

¹⁸Bórokni kókno Hamor bai bwsla Sekem chajak lai kha.

¹⁹A siklasa dodro a samungno khlai kha, tamni hwn khe bo Jakobni bwsajwkno belai kheno hamjago. Tabuk bo khe bini nokni bórijak kuknai.

²⁰Hakhe Hamor bai bwsla Sekem kamiyungni duglamo phaiwi bórokni kamiyungni borokrokno hai hwnwi sa phai kha,

²¹“O borokrok chwng bai kwthaui tongnai máng se; bórok chini ha-ono tong thung, manwirokbo pai thung phal thung, nai di o habo torma ba bórokni bagwi tongna khochor glak. Chwngbo bórokni bwrwi bwsarok bai káijaknai, chini bwrwi bwsaroknobo bórok bai kái lainai.

²²Tamo khe o borokrok chwng bai thansa dopha kaisa wngna khe, chwng bórok sakur rajakma hai’-no chwngbo sakur ma rajaknai.

²³Omo hai khe bórokni mal-matarok, rang-rírok chini wng glak diba? Phai di bórokbo chwng bai tongwi manna tẃi khe chwng bebakno lon lai anw.”

²⁴Kamiyungni bebak borokrok Hamor bai Sekem samano soi lai kha tei kamiyungni duglamni phataro thángnai bebak chwla bwsarok sakur rajak bai kha.

²⁵Salthamni salo, bórokni bebak chwlarok sakur rajagwi kwsa manjak máng, aphuru Jakobni bwslasong khoroknwi Simion bai Lebi Dinani takhuksong, bórokni seng naui tepsa khe kamiyungo habwi kha tei bebak chwlarokno butharwi pái kha.

²⁶Bórok Hamor bai bwsla Sekemnobo seng bai tantharwi pái kha. Hakhe bórok Dinano Sekemni nokni tikhlaiwi nongkhorwi tháng kha.

²⁷Hakhe Jakobni bwslasong kwthwi tong thani phaiwi kamiyungni manwi-khwnwirok sekproui tlangwi tháng kha; tamni hwnma le bórok bahanokno dera rw kha.

²⁸Bórok mal-matarok, pun merarok, korai chirkarok kamiyungo tei hapharo tongma bebakno naui pái kha,

²⁹bórokni bebak rang-puisarok, bórokni chwrai khonairok tei bwrwirok, romwi nokni tong kwrwi bebakno romwi tlangwi tháng kha.

³⁰Aphuru khe Jakob Simion bai Lebino hai hwnwi sa kha, “Norok oro ani saka-o digi-sigi tubu kha; tabuk Kanansong Peressong tei ha-o tongnai bebakno ano hamya sanai kha. Ani borokrokbo báng tha ya; Bórok bebakno ano thansa khe swprak khe chini bebak núkhung se komornai.”

³¹Tamo khe bórok hai hwnwi sa kha, “Bo chini hanokno le sak phalnaijwkrok hai da ma tong?”