Read Kok Borok YAPHANG 35 Bible Online

YAPHANG 35 - Kok Borok bible

YAPHANG 35

¹Kaitor Jakobno hai hwnwi sa kha, “Bacha di, Bethelo thángwi tongwi si di; tei nwng nini takhuk Esauni aroni khárwi tháng phuru nwng bai nukjaknai a Kaitorni bagwi háyá snam di.”

²Hakhe Jakob bini nokni borokrokno tei bo bai tongnai bebak borokrokno hai hwnwi sa kha, “Norokni bisingo tongma buini mwtairokno khibi bai di tei sak sak kwthar wng bai di tei norokni rírok slái bai di;

³chwng oroni nongkhorwi Bethelo thángnai tei aro thángwi ang tong kesebo tong phuru ano chubanai tei ang tháng thani ang bai baksa thángnai a Kaitorni háyá kaisa snamnai.”

⁴Hakhe bórok Jakobni yago bebak buini mwtairokno tei bórokni khunju kanma manwirokno yapharwi rw bai kha; Jakob abórokno Sekem gandarni uk buphang yaphango khe phob bai kha.

⁵Bórok thángwi tong phuru bórokni gana-gini tongma kamiyungrogo Kaitorni kirima bórokni thani hap kha, hakhe bórok Jakobni bwsarokno riphrik rak li ya.

⁶Hakhe Jakob bini bororokno tubu-ui Lujo sók phai kha, (abono’-no Bethel hwno), omo wng kha ha Kanano,

⁷bo aro háyá kaisa snam kha tei El-Bethel hwnwi mung phar kha, tamni hwn khe bo bini takhukni aroni khárwi tháng phuru Kaitor bo bai aro nukjak kha.

⁸Rebekano nainaijwkma Debora aro thwi kha hakhe Bethelni salsibaini uk buphang yaphango bono phob kha. Hakhe abono Alon-bakut hwnwi mung phar kha.

⁹Jakob Padan-aramni kiphil phuru Kaitor haino hai nukjak phirwi bono hamari rw kha.

¹⁰Hakhe Kaitor bono hai hwnwi sa kha, “Nini mung wng kha Jakob, nwng tei Jakob hwnwi nungjak glak kha, nini mung Israil hwnjak sinai.” Hakhe bini mung Israil wng kha.

¹¹Kaitor bono hai hwnwi sa kha, “Ang Kwplaisa Kaitor nwng ham di tei er di; dopha kaisa tei dopharok nini aroni nongkhornai, habugrarok nini aroni nongkhornai.

¹²Abraham bai Isakno rwma a hano ang nono tei nini yakchu-o nini bosongrokno rwnai.”

¹³Aboni ulo khe Kaitor bo bai kók sa laimani aroni thángwi pái kha.

¹⁴Hakhe Jakob, Kaitor bo bai kók sama jidolo kaisa holongni thongla kái kha; aboni saka-o khe nungmung bai thok lukhlai rwui yaphar kha.

¹⁵Hakhe Jakob, Kaitor bo bai malaiwi kók sa phaima jagano Bethel hwnwi mung phar kha.

¹⁶Abo pái khe bórok Bethelni lam rwui tháng lai kha; Ephrato sógwinani kisa chalwi tong kho, aphuru Rahel sak kengnani ok sajak kha, bo belai kheno bohok sajak kha.

¹⁷Bo belai khe bohok sajagwi tong phuru, kumajwk bono hai hwnwi sa kha, “Ta kiri di; nwng tabuk tei khoroksa chwla bwsa mannai.”

¹⁸Bini rangma chona naiwi tong phuru bo a bwsano Benoni[72] hwnwi mung phar kha; tamo khe absani bupha khe bono Benjamin[73] hwnwi mung phar kha.

¹⁹Hakhe Rahel thwi kha tei Ephratni lama-o phobjak kha (abono Betlehem hwno),

²⁰Jakob, bini a mangkhoro thongla kaisa kái kha; abo tabukbo Rahelni simalwng hwnjago.

²¹Israil aroni kutulwi Edarni nok kuchukni ayang naro ríni nok songchaui kha.

²²Israil a ha-o tong phuru, Ruben buphani khoroksa hik kotoi Bilha bai thu lai-chá lai kha; hakhe Israil a kókno khna kha. Jakobni khe bwsla khorokchinwi tongo.

²³Leani bwsarok khe: Ruben (Jakobni bwsla okra) Simion, Lebi, Juda, Isakar tei Jebulun.

²⁴Rahelni bwsarok khe: Josep tei Benjamin.

²⁵Rahelni selengjwk Bilhani bwsarok khe: Dan tei Naptali.

²⁶Leani selengjwk Jilpani bwsarok khe: Gad tei Aser. Omorokno Jakobni bwsarok, bórok Padan-aramo achainairok.

²⁷Jakob, Abraham bai Isak tong langma Mamre eba Kiriat-arba-o (abo khe Hebron) sók phai kha, arono Abraham tei Isak tong lango.

²⁸Aphuru Isakni umor nokha bisi sara tei charchi wng kha.

²⁹Isak chakrasuk khe thwi kha; tei bini borokrokni thani tlangjak kha, bwsarok Esau bai Jakob bono hakhoro phob kha.