Read Kok Borok YAPHANG 38 Bible Online

YAPHANG 38 - Kok Borok bible

YAPHANG 38

¹A jora-o Juda bini takhuksong bai kagwi thángwi Hira hwnwi Adulamni borok khoroksa bai tongnani bagwi tháng kha.

²Aro Juda Kananjwk khoroksa bai malai kha, a bwrwini mung wng kha Sua; bo a bwrwino káijak kha tei bo bai thu kha-chá kha

³hakhe bo ogo bwsa wngwi bwsa chwla khoroksa man kha, bo a bwsano Er hwnwi mung phar kha.

⁴Haino hai bo ogo bwsa wngwi tei khoroksa bwsa chwla man phi kha, abono khe Onam hwnwi mung phar kha.

⁵Hakhe bo tei khoroksa chwla bwsa man phi kha, bo bono Sela hwnwi mung phar kha. Chejibo tong phuru bo a bwsano mano.

⁶Bwsla okra Erni bagwi bo hamjwk khoroksa tubu kha. Bini mung khe Tamar.

⁷Phiya Subraiyungni mokolo Judani bwsla okra Erni tongmung khe hamya; hakhe Subraiyung bono buthar kha.

⁸Hakhe Juda Onamno hai hwnwi sa kha, “Nwng nwbachwini aro tháng di, nwng buprang ba nini khlaithai tongmano khlai si di, nwtani bagwi bwsa wng rw di.”

⁹Tamo khe Onam saui mano a bwsa le bini wng glak, hakhe bo bubachwini aro thángwi bo bai pal thu lai phuru khe bwtani bwsa wngwi man ya tẃi khe ha-o se sákolom bwtwi khiklai rw si-o.

¹⁰Hakhe Subraiyung bini a samungno chajak li ya tei bo bonobo buthar kha.

¹¹Hakhe Juda bahamjwk Tamarno hai hwnwi sa kha, “Nwng randi wngwi’-no nwphani nogo thángwi tongwi gra di, ani sajla Sela tor gra si thung”—tamni hwn ba bo bono bini takhuksong hai khe thwina kirijak kha. Hakhe Tamar buphani nogo thángwi tongwi kha.

¹²Salsa khe Suani bwsajwk Judani bihik thwi kha; Juda bihik thwimani kókno kisa pogwi bwkha kwchang phuru khe bo bini merarokni buikhumu ranairokni thani Timna-o tháng kha, bikiching Adulamsa Hirabo bo bai baksa tháng kha.

¹³Aphuru khe Tamarno, “nwkra bini merarokni buikhumu rana bagwi Timna-o thángwi tongo” hwnwi sajak khe,

¹⁴bo bini randijwkrokni kanmungrokno khibiui, kubun rí kanwi rí hungklaiwi Timna-o thángma lamani Enaimo hapma lampra-o tong kha; tamni hwn ba Sela torwi suda se bwkra bono bo bai káiwi rw li ya abono bo romwi man kha.

¹⁵Juda bono nuk kheno sak phalnaijwk hwnwi chong kha, tamni hwn khe bini mwkhang rí hungjak.

¹⁶Bo lama gandaro bini thani tháng kha tei hai hwnwi sa kha, “Ang nono sak tangnai,” tamni hwn khe bo bono bahamjwk hwnwi saui man ya. Tamar hai hwnwi sa kha, “Nwng ani sak tang khe nwng ano tamo rwnai ba?”

¹⁷Hakhe Juda hai hwnwi sa kha, “Ang nono mera bwsa masa rwui rohornai.” Tamar hai hwnwi sa kha, “Nwng abo rohor ya sini swkang sakni bagwi ano manwi mungsa swk klang grana diba?”

¹⁸Juda hai hwnwi sa kha, “Ang nono tamo manwi klangnai ba?” Tamar hai hwnwi sa kha, “Nini mari dwkhwi tei nini yakni raidangno klang di.” Hakhe bo a manwirokno rwui Tamarni sak tang kha, hakhe bo, bo bai khe ogo bwsa wng kha.

¹⁹Hakhe Tamar aroni bachaui tháng kha tei bini rí chummarokno, hungmarok khibiui randijwkni rírokno kan phi kha.

²⁰Juda bikiching Adulamsani yak tẃi khe mera bwsa a bwrwini thani rwui rohorwi a kók rw phuru kabuma manwirokno na rw horna hwnwi rohor khe a bwrwino aro manẃi li ya.

²¹Hakhe bo aroni borokrokno hai hwnwi sẃng kha, “O Enaimni lama gandaro tongnai a sak phalnaijwk le biyang tháng kha sla?” hakhe bórok, “Oro khoroksa phano sak phalnaijwk kwrwi bla,” hwnwi sa kha.

²²Hakhe bo Judani thani kiphilwi thángwi hai hwnwi saui kha, “Ang a bwrwino malai li ya; tei aroni borokrok, ‘oro khoroksa phano sak phalnai kwrwi’ ” hwnwi sa-o.

²³Juda hai hwnwi sa kha, “A bwrwi a manwirokno bini’-no khlai si thung, wng ya khe chwng mwnwijaknai; nai di ang o manwirokno nono rwui rohor kha, nwng bono ma se manẃi li ya.”

²⁴Taltham lái twtwi hwn kheno Juda hai hwnwi sajak kha, “Nahamjwk Tamar sak phalnai wng kha; tei abo hai khe tabuk ogo bwsa chu kha.” Hakhe Juda hai hwnwi sa kha, “Bono phataro tikhlai tubu-ui hór bai khe sógwi pái di.”

²⁵Bono phataro tikhlai tubu khe, bo bwkrano hai hwnwi kók kwchárwi rohor kha, “O manwirokni bugra bai se ang sak kupulung wngo.” Tei bo hai hwnwi sa kha, “O buduk, raidang tei marino nai di, omo saboni?”

²⁶Hakhe Juda abórokno siniui gosiui hai hwnwi sa kha, “Bo ani slái se borok sói kuk, ang bono angsajla Selano rwjak li ya.” Phiya bo tei bini sak tang phi li ya.

²⁷Bini sak kengna jora wng kheno, apher hwnwi sijak kha.

²⁸Bo sanchwgwi tong phuru, yak kongsa ongkhor kha; hakhe lomojwk a yago khutwng kwchak khaui rwui hai hwnwi sa kha, “Omono swkang phai kha.”

²⁹Tamo khe bo yak bisingo tlangwi tháng phi kha; phiya bini takhuk nongkhorwi phai kha; hakhe bo hai hwnwi sa kha, “Nwng bahai khe sakni bagwi lama phiyogwi phai man kha!” Aboni bagwi bono Peres[75] hwnwi mung phar kha.

³⁰Kisa ulo khe bini takhuk yago khutwng kwchak khajak khe nongkhorwi phai kha; tei bono Jera[76] hwnwi mung phar kha.