Read Kok Borok YAPHANG 41 Bible Online

YAPHANG 41 - Kok Borok bible

YAPHANG 41

¹Bisiknwini ulo khe Pharao imang nuk kha, a imang Pharao bo Nil twima rukungo bachaui tongo,

²nai ba mak sni musuk kuphung tei naithok twimani kasaui phaiwi jabra chá lai tongjak.

³Hakhe tei musuk mak sni twimani kasaui phai khua; abórok khe keram tei bekreng sijak máng. Bórok phaiwi tei kubunrok bai baksa Nil twima rukungo bacha phai kha.

⁴Tei a keram musuk mak snirok a musuk kuphung mak snirokno cháui pái kha. Hakhe Pharao sicha kha.

⁵Bo haino hai muktrwi tháng kha hakhe tei kaisa imang nuk kha; maitang tángsni, abo kupulung tei kumun, abórok kwrẃngsa-o’-no torwi tongo.

⁶Aboni ulo nuk kha tei maitang tángsni nongkhorjak abo salkabaini nokbar bujak bukcha bwkrai kwrwi.

⁷Tei maitang bukcha a bwtang kupulungrokno monogwi pái kha. Hakhe Pharao thuma sicha kha tei bo imang nugwi tongmano saui man kha.

⁸Hakhe phung ai khe bo uanajak kha; hakhe bo ha Ijipni bebak elem kwrwngrokno tei kók mwtai kwrwngrokno na rwhorwi bo bini imangni kókno bórokno saui khna rw kha, tamo khe khoroksa phano Pharaoni imangni kókno swbaiwi saui man li ya.

⁹Hakhe a khuri tẃinaisa bokhorok Pharaono hai hwnwi sa kha, “Ang cha ya khlaimano ang tini muitu man kha.

¹⁰Nwng nini seleng auang snamnai bokhorok tei ano jolijagwi chwngno along mwrwknai bokhorokni nogo ton phuru,

¹¹horsa khe chwng khoroknwino imang nuk lai kha tei a imangni gujok juda juda.

¹²Aro chwng bai baksa khoroksa Hibru chwla sikla tongmani, bo wng kha a along mwrwknai bokhorokni seleng, chwng bono chini imangni kókrokno sa kha tei chwngno bo abono swbaiwi saui khna rw kha.

¹³Bo sama hai’-no chini bebakno wng kha; nwng ano ani samungno rw phi kha, tamo khe a auang snamnaini bokhorokno khe kotok soro rwui buthar kha.”

¹⁴Aphuru khe Pharao Josepno ring rwui na rw hor kha, hakhe aphuru’-no bono alongni doui tubujak kha; bini khwnairok ra bai khe tei rí kwtalrok kan bai khe Pharaoni bwskango tháng kha.

¹⁵Hakhe Pharao Josepno hai hwnwi sa kha, “Ang imang kaisa nukmani, abono khoroksa phano swbaiwi saui man li ya; nwng imangni kókno swbaiwi saui mano hwnwi ang khna kha.”

¹⁶Josep Pharaono hai hwnwi sa kha, “Ang le man ja ya; Kaitor se sói nangmani gujokno buchi rwnai.”

¹⁷Hakhe Pharao Josepno hai hwnwi sa kha, “A imango ang Nil twimani rukungo bachaui tongmani;

¹⁸aphuru musuk mak sni kuphung tei milik twini kasaui phaiwi jabra chá laiwi tong lai kha;

¹⁹hakhe tei musuk mak sni kasaui phai kha abórok khe keram tei bekreng máng, ang abórok hai ha Ijibo nu se nuk ya kho.

²⁰A musuk keramrok swkangni a musuk kuphungrokno cháui pái kha,

²¹tamo khe bórok abono chá phano khoroksa phano abono saui man li ya, tamni hwn khe abórok swkangni hai’-no keram wngwi tong kha. Hakhe ang sicha kha.

²²Ang omo hai imangbo nuk kha; maikong kongsa-o maitang tángsni abo bokol kupulung tei kaham kaham;

²³hakhe aboni yagulo khe tei maitang tángsni nongkhor kha, abórok khe kohoi tei abo salkabaini nokbar nangwi ramprajak tei bukubuk,

²⁴a maitang kohoirok a kaham maitang bwtangno monogwi pái kha. Hakhe ang danda-baji phunuknairokno ani imangni kókno sa kha, tamo khe khoroksa phano ano abono sukhrubwi saui man li ya.”

²⁵Aphuru khe Josep Pharaono hai hwnwi sa kha, “Pharaoni a imang kainwini gujok le kaisa se; Kaitor Pharaono bo tamo khlaina naiwi tong abono sa kha.

²⁶A musuk kuphung mak sni wng kha abo nokha bisi sni tei a bokol kupulung maitang abobo nokha bisi sni’-no; abórokni gujokbo kaisa’-no.

²⁷Tei ulni a mak sni musuk keram kasaui phaima bai salkabaini nokbar bujak a maitang kohoi abo wng kha nokha bisi sni asarini kók se sa-o.

²⁸Omo ang Pharaono sama hai Kaitor Pharaono bo tamo khlaina naiwi tong abono phunukma se.

²⁹Nai di, nokha bisi sni ha Ijibo belai’-no mai-khul tháinai,

³⁰aboni ulo khe nokha bisi sni belai kheno asari nangnai tei ha Ijibo aswkni mai-khul hammani kókrokno pogwi tháng anw; asari hano khrang-khrang khe ransa rwnai,

³¹aro aswk kirimasingcha asari nangma bai a ha-o chámung-nungmung asuda tong langma kókrokno poknai, tamni hwn ba a asari belai khe belai kotor wngnai.

³²Hakhe Pharao a imangno uáinwi nukmani gujok wng kha; abo hai khe Kaitor khlai súknai hwnwi samani kók se tei Kaitor abono dakti’-no khlainai hwnma se.

³³Aboni bagwi Pharao ha Ijipni tangphangni bagwi sinai nuknaini naikolphang khoroksa chong thung.

³⁴Aboni bagwi nwng Pharao, ha gwnangwi naikolnai borokrokno chong di, hakhe ha Ijibo a nokha bisi sni kwbáng khe mai-khul tháima jorani bebakni khakbano narwk di.

³⁵Tei bórokno a phainai bisi kaham jorani bebak chámungrok thumwi narwk thung tei bebak kamiyungo bórokni chámungni bagwi abórokno rúngnani suar rwui mwrwkna dagiui rw di.

³⁶A chámung khe ha Ijibo nokha bisi sni asari nangna hwnma jorani chámung wngnai, hakhe hani borokrok ma chá yaui komor glak.”

³⁷O kókbitino Pharao tei bini tangphangrok chajak kha.

³⁸Tei Pharao bini selengrokno hai hwnwi sa kha, “O borokni slái chúkjak Kaitorni Phola bai kupulung borok chwng tei buro mannai?”

³⁹Hakhe Pharao Josepno hai hwnwi sa kha, “Kaitor nono omorok bebakno phunuk kha, aboni bagwi nini tei buini slái simung tei nukmung kwbáng le tei kwrwi;

⁴⁰nwng ani hani tei ani bebak borokrok nini dagima kókrokno khnanai; achukthayungo achukna simi se ani suar kwbáng wngnai.”

⁴¹Hakhe Pharao Josepno hai hwnwi sa kha, “Nai di ang nono bebak ha Ijipni saka-o tang Dagiphang kotor chongo.”

⁴²Pharao bini yasini bugrani mari bujak yasitemno sokok kha tei abono Josepni yasi-o kan rwui rw kha, bono lilonni rí kaham chum rwui rw kha tei kotogo khe rangchakni bwtang soraui rw kha;

⁴³bono kasa rwna bagwi bugrani uldrop kaisa korai malkhungno kasana bagwi rw kha; tei bini bwskang bwskang khe bono bórom khlainai bodolrok bono tolwi tẃi lai kha tei, “Yáskú sung bai di!” Hwnwi chirik lai kha. Hakhe bo bono bebak ha Ijipni barja yaphar kha.

⁴⁴Pharao Josepno hai hwnwibo sa kha, “Ang Pharao, o ha Ijibo nono si rw yaui khoroksa phano mungsa swk yapribo séui man glak tei yakbo tisaui man glak.”

⁴⁵Hakhe Pharao Josepno Japhenat-panea hwnwi mung kwtal phar kha; tei On kamiyungni ochai Potipherani bwsajwk Asenat bai kái kha. Aboni ulo khe Josep bebak ha Ijibo kitingwi phaina bagwi nongkhor kha.

⁴⁶Josep Ijipni habugra Pharao bai samung berjak phuru bini umor nokha bisi thamchi wng kha. Bo ha Pharaoni aroni nongkhorwi thángwi bebak ha Ijip gwnangwi kitingwi nai kha.

⁴⁷A nokha bisi sni hamchama jora-o ha-o belaino kwbáng khe mai-khul thái kha,

⁴⁸Hakhe bo a bisini tháimani chámungrokno Ijip hani kamiyungrokni mayamnokrogo rúng bai kha; bo kamiyung gana-ginini huk-habarokni chámungrokno kamiyungrogo rúng bai kha.

⁴⁹Omo hai kheno Josep aro kwbángma mairok rúng kha, abo twijlangni hasing báng tẃi wng kha, bo rwtaui man ya sak jora rúng kha, tamni hwn ba abono rwtaui manna kók kwrwi kha.

⁵⁰Asari nangnani swkang Josep Onni ochai Potipherani bwsajwk Asenat bai bwsa khoroknwi man kha.

⁵¹Bo okrano khe Manase[77] hwnwi mung phar kha, tamni hwnma le bo hai hwnwi sa kha, “Kaitor ano aswkni lengpromarokno tei aphani nokni bebakno pok rw kha”

⁵²Aboni yakorai károno khe Ephraim[78] hwnwi mung phar kha, tamni hwn ba, “Kaitor ano ang birman manmani ha-o bwthái thái rw kha.”

⁵³Ha Ijibo kwbángma khe manmani a nokha bisi snini jora páima bwkhak sók phai kha;

⁵⁴tei Josep samani hai’-no a bisisnini asari cheng kha. Tei bebak kubun ha-obo asari nang kha; tamo khe ha Ijip gwnangwi khe chámung kupulung’-no tong kha.

⁵⁵Ha Ijipni borokrok ma chá ya wngna cheng kheno, bórok Pharaoni thani chámungni bagwi chirik lai kha; hakhe Pharao bebak Ijipsarokno hai hwnwi sa kha, “Josepni thani tháng di; tei bo samani tẃi’-no norok khlai di.”

⁵⁶Asari belai khe nang kha tei abo ha gwnangwi’-no pírjak kha, hakhe Josep bebak mayam nokrokno phiyogwi rw kha tei Ijipsarokni thani mai phal kha.

⁵⁷Hayung gwnangwini borokrok Josepni thani chámung paina bagwi phai lai kha, tamni hwn khe ha gwnangwi’-no belai khe asari nang kha.