Read Kok Borok YAPHANG 42 Bible Online

YAPHANG 42 - Kok Borok bible

YAPHANG 42

¹Jakob ha Ijibo chámung tongo hwnwi saui man kheno bo bwsarokno hai hwnwi sa kha, “Tamo norok khoroksa tei khoroksani bumkhang simi nai lai tong?”

²Bo hai hwnwibo sa kha, “Nai di ang ha Ijibo chámung tongo hwnwi khna-o; chwngno ma chá yaui thwinani yakni phiyókna bagwi kisa aro thángwi chámung paiwi naharwi phai di.”

³Hakhe Josepni takhuk khorokchirok ha Ijibo chámung paina tháng lai kha.

⁴Tamo Jakob, Josepni achaisong buphayung Benjaminno khe bórok bai baksa rohor li ya, tamni hwn khe bini mungsa swk da wngno hwnwi bo kirijago.

⁵Ha Kanano asari nangma bagwi Israilni bwsarokbo tei bui bai baksa chámung paina bagwi tháng lai kha.

⁶Aphuru Josep khe hani tang dagiphang; bo ha gwnangwini borokrokni thani chámung phalwi tongo. Hakhe Josepni takhuksong phai lai kha tei bini bwskango phaiwi ha-o bolokhógwi khulum lai kha.

⁷Josep bini takhuksongno nuk kheno bórok bebakno’-no siniui man kha, tamo khe bo bórokno sini ya hai khe tong kha tei “Norok buroni phai?” hwnwi khorang sokromwi sẃng kha. Aphuru khe bórok hai hwnwi sa kha: “Chwng ha Kananni se chámung paina hwnwi phai-o.”

⁸Josep bini takhuksongno siniui man phano, bórok bono siniui man li ya.

⁹Aphuru khe Josep bórokno tẃi imang nukmani kókno muitu manjak kha; tei bo bórokno hai hwnwi sa kha, “Norok naichomnairok se, norok chini hani buro tamo kebel tong naina phaimani se.”

¹⁰Bórok bono hai hwnwi sa lai kha, “I’nhi bugrasa nini o selengrok le chámung paina hwnwi phaijamani se.

¹¹Chwng bebakno ok kaisani takhukrok se, chwng naichomnairok ya, chwng nini o selengrok borok kosong gwja se.”

¹²Bo bórokno hai hwnwi sa kha, “I’nhi, norok chini hani buro tamo kebel tong naina phaima se.”

¹³Bórok hai hwnwi sa kha, “Chwng nini selengrok bebagwi takhuk chinwi ká-o, Kanan ha-o tongnai borok khoroksani’-no bwsa. Takhuk khoroksa khe thwi kha tei kusu kuk khe tabuk aphani aro.”

¹⁴Tamo khe Josep bórokno hai hwnwi sa kha, “Norok ang sama hai’-no naichomnairok se.

¹⁵Norokno omo hai khe se potalinai: ang Pharaoni rangmani mungwi swmai tangwi sa-o, norokni takhuk kusu oro phai ya sak norok oroni kutulwi thángwi man glak.

¹⁶Norokni bere khoroksa thángwi bono tubu-ui ma phainai, teirok khe bebakno oro chopjagwi ma tongnai, omo tẃi khe se norok samani kók kubui de ereng ma phunuknai; wng ya khe Pharaoni rangmani mungwi swmai tangwi sa-o kubu kubui’-no norok naichomnairok se.”

¹⁷Hakhe bo bórokno saltham alongo chobwi ton kha.

¹⁸Salthamni salo khe Josep bórokno hai hwnwi sa kha, “Ang Kaitorno kirinai borok, ang norokno omo hai khe le phiyógwi mano:

¹⁹tumung norok borok kaham’-no hwnwi sijakna hwn khe, norokni bere khoroksano alongo klangwi tei kubunrok khe norokni ma chá yaui tongnai núkhungni borokrokni thani a chámung tlangwi tháng di

²⁰tei norokni bere kusu kuk takhukno ani thani tubu-ui phai di; ahai khe se norok kók kubui sa-o hwnwi saui mannai tei norokno butharjak glak.” Hakhe bórokbo abo hai’-no khlai lai kha.

²¹Aphuru khe bórok khoroksa tei khoroksano hai hwnwi sa lai kha, “Kubui’-no tabuk chwng manjakmani le chini takhukni bati nangma se; bo tekto nangjak phuru bwswk se chwngno chubana bagwi koi kha phiya ba chwng aphuru khna lai li ya, aboni bagwino chini saka-o omo tẃi birman klai si-o.”

²²Hakhe Ruben bórokno hai hwnwi sa kha, “Ang norokno a chwraino ta dera rw di hwnwi sa ya da? Hai phano norok khunju kan ya gwja. Hakhe tabuk chwng bini thẃini yagul se sujagwi tongo.”

²³Bórok Josepno bórokni kók buchi-o hwnwi si li ya, tamni hwn ba khoroksa kók slái sanai bai khe se bo bórok bai kók sa-o.

²⁴Josep bórokni aroni kutulwi thángwi kabwi tongwi kha; ulo khe bo bórokni aro kiphil phi kha tei bórok bai kók sa lai kha, hakhe bo Simionno bórokni bisingni khagwi bórokni mokol bwskango kha ka.

²⁵Josep bini takhuksongni kholjango chámung supungwi da di hwnwi dagi kha tei bórokni a kholjango bórokni a rangrokni solanobo daui rw di hwnwi dagi kha, phiya lamani bagwi bórokni chámungbo rohor di hwnwi sa kha. Hakhe sama hai kheno khlaijak kha.

²⁶Hakhe bórok chámungrokno korai chirka saka-o boksa laiwi lam rw lai kha.

²⁷Bórok kwrẃngsa bathakthai-o bathagwi kha tei bórokni bere khoroksa kholjang khengwi korai chirkano chá rwna hwnwi nai khe bini a rang búchúno kholjangni búkhúgo khe nuk kha;

²⁸aphuru khe bo bini takhuksongno hai hwnwi sa kha “Ani rang ano kiphilwi rohorjak kha; iko oro ani o rang búchú!” Aphuru khe bórokni bwkha báijak kha, hakhe khoroksa tei khoroksa kwlwibrajak khe hai hwnwi sa lai kha, “Kaitorba omo chwngno tamo khlai lang?”

²⁹Bórok ha Kanano bupha Jakobni thani phai sók phai khe, bórok bono aro wngmani bebak kókrok hai hwnwi saui khna rw kha,

³⁰“ha Ijipni tangdagiphang kotor chwng bai sokromwi se kók sa-o tei chwngno a hano naichomna bagwi thángo hwnwi majra ber kha.

³¹Chwng naichomnai ya hwnwi bono sa phi kha, ‘chwng borok kaham se;

³²chwng bebagwi takhuk chiknwi tei bupha kaisani’-no bwsa, takhuk khoroksa khe thwi kha tei kusu kuk khe tabuk ha Kanano apha bai.’

³³Hakhe a hani tang dagiphang hai hwnwi sa phi kha, ‘Omo hai khe se ang norokno borok kosong hwnwi hwnnai: norokni bere khoroksano oro ang bai klang di, teirok khe norokni núkhungni ma chá ya tongnairokni bagwi chámung tlangwi tháng di.

³⁴Hakhe norokni takhuk kusuno ani thani tubu-ui phai di; ahai khe se ang norokno kubui’-no naichomnairok ya tamo khe borok kaham hwnwi ang hwnnai tei ang norokni takhukno phiyóknai tei norokbo omo hai khe oro pai-phalrok khlaiwi mannai.’ ”

³⁵Hakhe bórok bórokni sak sakni kholjang kheng khe bebakno kholjango khe bórokni rang búchu man lai kha; tei a rangno nuk lai khe bórok tei bupha abono nuk khe kiri lai kha.

³⁶Aphuru khe bórokni bupha Jakob bórokno hai hwnwi sa kha, “Norok ani bwsarokno kwma rw bai kha: Josep kwrwi kha; Simionbo kwrwi kha; hakhe norok tabuk Benjaminnobo tlangna nai tong-u kha; ang’-no manjaknai le wng si-o!”

³⁷Hakhe Ruben buphano hai hwnwi sa kha, “Ang bono nini oro kiphilwi tubu ya khe ani sajla khoroknwino butharwi pái di; tabuk bono se ani yago yapharwi rohor di ang bono nini thani kiphilwi tubu anw.”

³⁸Tamo khe bo hai hwnwi sa kha, “Ani sajla nwng bai thángwi man glak; bwtabo thwi kha, tabuk bo simi se khoroksa tong si-o. Lamarogo bini mungsa swk wng khe ani bwkhnai phurwi thwina jora-o nwng ano bwkha-o teibo nang rwui se ano mangkhoro[79] hapson rw sinai.”