Read Kok Borok YAPHANG 46 Bible Online

YAPHANG 46 - Kok Borok bible

YAPHANG 46

¹Hakhe Israil bini tong kwrwi bebak tẃiwi lam rw kha tei Birseba-o thángwi aro bupha Isakni Kaitorni thani ratharwi yaphar kha.

²Kaitor bono horo imang-mukthang khe ringwi “Jakob, Jakob” hwnwi sa kha. Aphuru khe bo, “I’n ang orono tongo” hwnwi sa kha.

³Bono hai hwnwi sa kha, “Ang Kaitor, nini nwphani Kaitor; Ijibo thángna bagwi ta kiri di; tamni hwn ba ang aro nono bosong kotor khlainai.

⁴Ang nwng bai baksa ha Ijibo thángnai tei ang nono aroni kiphilwi’-bo tubu phinai; tei nwng thwi phuru Josep se nini mokolno kholopnai.”

⁵Hakhe Jakob Birsebani lam rw kha; tei Israilni bwsarok bupha Jakobno tei chwrai-khonairokno tei bihiksongno Pharao malkhung rohorma-o kasa rw bai kha.

⁶Bórok ha Kananno ajimani bórokni mal-matarok, manwi-khwnwirok tẃiwi ha Ijibo tháng lai kha, Jakobni logi-o bini bosongni borokrok,

⁷bini bwsarok tei bini bwsarokni bwsarok, bwsajwksong, bwslasongni bwsajwksong bebak bini bosongni borokrokno tẃiwi Ha Ijibo tháng lai kha.

⁸Jakob bai baksa ha Ijibo thángnai bini bosongni borokrok wng kha; Jakob tei bwsarok. Bwsla okra Ruben,

⁹tei Rubenni bwsarok; Hanok, Palu, Hesron tei Karmi.

¹⁰Simion tei bini bwsarok; Jemuel, Jamin, Ohad, Jakhin, Johar tei Saul, bórok khe khoroksa Kananjwkmani bwsarok.

¹¹Lebi tei bini bwsarok; Gerson, Kohat tei Merari.

¹²Juda tei bini bwsarok; Er, Onan, Sela, Peres tei Jera. (Phiya ba Er tei Onan, ha Kanano thwi kha); Peresni bwsarok wng kha, Hesron tei Hamul.

¹³Isakar tei bwsarok; Tola, Puba, Jasub tei Simron.

¹⁴Jebulun tei bini bwsarok; Sered, Elon tei Jalil

¹⁵o bwsarokno tei bwsajwk Dinano khe Lea Jakobni bagwi Padan-aramo tong phuru bámani; bórok bebagwi sajwk-sajlasong khorokthamchitham ká-o.

¹⁶Gad tei bini bwsarok; Jiphion, Hagi, Suni, Ejbon, Eri, Arodi tei Areli.

¹⁷Aser tei bini bwsarok khe; Imna, Isba, Isbi, Beria tei bórokni bukhuk Sera. Beriani bwsarok khe; Heber tei Malkiel

¹⁸(o khorokchi-dokrok wng kha Jakob Jilpa bai manmani bosong, bo wng kha Laban bwsajwk Leano rohormani a selengjwk).

¹⁹Jakobni bihik Rahel bini bagwi bwsa chwla khoroknwi bá kha; bórok wng kha Josep tei Benjamin.

²⁰Ha Ijibo Josep bwsa chwla khoroknwi man kha; bórok wng kha Manase tei Ephraim, bórok Onni ochai Potipherani bwsajwk Asenatni ogo achainairok.

²¹Benjaminni bwsarok khe; Bela, Becher, Asbel, Gera, Naman, Ehi, Ros, Mupim, Hupim tei Ard

²²(O khorok-chibrwirok wng kha Jakob Rahel bai manmani).

²³Danni bwsla Husim.

²⁴Naptali tei bini bwslasong; Jajil, Guni, Jejer tei Silem

²⁵bórok khe Laban bwsajwk Rahelno rwmani selengjwk Bilha Jakob bai manmarok, o khoroksni bosong wng kha; Jakob Bilhani bai manmani bo wng kha selengjwk abo Laban; bórok khoroksni ká-o.

²⁶Jakobni sakni bwsarok ha Ijibo thángnairok bebagwi khorok dokchidok ká-o, abo bini bahamjwksongno karwi se;

²⁷ha Ijibo Josepni bwsa chwla khoroknwi wngmabo tongo; ha Ijibo phainai Jakobni bosongrok bebagwi khoroksnichi ká-o.

²⁸Bo Judano swkang Josep bai malaina bagwi Goseno phai malai phaina bagwi rwui rohor kha; tei bórok Goseno phaiwi sók phai kha.

²⁹Aphuru khe Josep bini korai malkhungo kasaui bini bupha Israil bai malaina bagwi Goseno tháng kha; tei bórok malai lai khe Josep bono gwdna-o kwbagwi tei jora kolokma kap kha.

³⁰Israil Josepno hai hwnwi sa kha, “Ang tabuk le thwiwi man kha, tamni hwn ba ang nini mwkhang nuk kha tei nwng tabukbo kwthang tong kho hwnwi saui man kha.”

³¹Josep bini takhuksongno tei bini nokni borokrokno hai hwnwi sa kha, “Ang Pharaono ahai hwnwi sanai, ‘Ha Kanano tongnai ani aphani tei ani takhuksongni nokni borokrok ani thani phai kha;

³²bórok khe mera mwrwknairok; tei tabuk jora bórok merarokno mwrwgwi tong bai-o; hakhe bórok bórokni tongma musukrok-merarok tubu-ui phai lai kha.’

³³Pharao norokno ringwi ‘Norokni samung tamo?’ Hwnwi sẃng khe

³⁴norok ahai hwnwi sa di, ‘Nini o selengrok khe chwrai phuruni simi tabuk jora musuk-merarokno riui mwrwgwi phai lai ja-o, chwng tei chini aphasong omo tẃi samung’-no khlai-o,’ omo hai khe bo norokno Gusen amchoi-o tongna bagwi rwnai; tamni hwn ba musuk-mera mwrwknairok khe Ijipsarok selengjago.”