Read Kok Borok YAPHANG 47 Bible Online

YAPHANG 47 - Kok Borok bible

YAPHANG 47

¹Hakhe Josep Pharaoni thani thángwi hai hwnwi sa kha, “Ani apha tei ani takhuksong ha Kananni bórokni mal-matarok tei bórokni tong-kwrwi bebak manwirok tubu-ui phai lai kha; bórok tabuk Gusen amchoi-o.”

²Bo bini takhuk khorokbano Pharaoni thani tlang kha.

³Pharao bórokno hai hwnwi sẃng kha, “Norok tamo samungrok khlai?” “Nini o selengrok khe chini chuchusong hai’-no mera mwrwknai se bugra” hwnwi bórok sa kha.

⁴Bórok Pharaono hai hwnwi sa kha, “Ha Kanano belai khe asari nang kha tei chini mal-matarokno chá rwna bagwi jabrarok kwrwi kha; hakhe o ha o tongnani hwnwi chwng ma phai kha, chwngno Gosen amchoi-o tongna bagwi kisa rw ja di.”

⁵Hakhe Pharao Josepno hai hwnwi sa kha, “Nini nwpha tei nini takhuksongrok nini thani phai kha.

⁶Ha Ijip ba nini bwskango’-no, nini takhuksongno tei nwphano o hani kaham kuk amchoino’-no rw di; bórokno Gosen amchoi-o tong thung; bórokni bisingo chúknai borokrok tong khe bono ani mal-matani naikolna barja rw di.”

⁷Hakhe Josep bupha Jakobno Pharaoni bwskango tubu-ui phai kha tei Jakob Pharaono hamari rw kha.

⁸Hakhe Pharao Jakobno hai hwnwi sẃng kha, “Nini umor bisi bwswk wng kha?”

⁹Jakob Pharaono hai hwnwi sa kha, “Ang beraiwi kitingwi tongmani khe tabuk nokha bisi sarathamchi ká kha. A lái thángma bisirok khe báng ya tamo khe tong kesep se báng kugo. Ani tei chuchusongrokni bórokni beraiwi kitingwi thangsungo tong langma swk báng ya.”

¹⁰Jakob Pharaono hamari rwui bini aroni ongkhorwi tháng kha.

¹¹Hakhe Josep Pharao dagima hai khe’-no buphano tei bini takhukrokno ha Ijipni kaham kuk hano rw kha, bórokno ha Ijipni kaham kuk ha-o ton kha, abo wng kha Ramase ha-o.

¹²Josep buphano tei bini takhuksongno tei bini bebak buphani núkhungni borokrokno tei chwrai khonairokno bórok bángma swk tei nangma swk chámung rw kha.

¹³Asari aswk khe wng kha, kwrẃngsa-o phano chámung kwrwi kha; ha Ijipni borokrok tei Kananni borokrok ma chá ya wngwi belai khe lengpro bai kha.

¹⁴Ijip tei Kanan hani bebak rangrokno bórok chámung páina bagwi ma tubu kha tei Josep bebak rangno thumwi naui Pharaoni noyungo tubu-ui phai kha.

¹⁵Ulo ha Ijipni tei ha Kananni rang pái bai khe, bebak Ijipsarok Josepni thani phaiwi hai hwnwi sa phai kha, “Chwngno chámung rw di; nini mokol bwskango chwng tamni thwinai? Chini rangrok thung pái bai kha.”

¹⁶Josep hai hwnwi sa kha, “Tumung norokni rangrok pái kheba norokni mal-matarokno tubu di, abórokni sak slái-o ang norokno chámung rw anw.”

¹⁷Hakhe bórok Josepni thani bórokni mal-matarok tubu-ui phai kha; tei Josep bórokni bebak korairok, merarok, punrok tei musuk-toknokrok tei korai chirkarokni sak slái-o bórokno a bisini chámung rw kha.

¹⁸A bisini ulo bórok bini thani phaiwi hai hwnwi sa lai phai kha, “Chwng nini thani huiwi sa yaui ton li ya, Hodasa chini bebak rangrokbo pái kha tei chini bebak mal-matarokbo nini’-no wngwi pái kha; tabuk chini bwsak tei chini harok simi se tong si-o.

¹⁹Chwng tamni chini harokno tẃiwi nini mokol bwskango thwinai? Chwngno chámung rwui chini harok bai baksa khe páiwi pái si di hakhe chwng Pharaoni paijak seleng wngwi pái sinai; chwngno bwchlwibo kisa rw di hakhe chwngbo thwi glak tei harok bo chúk ya khibijak wng glak.”

²⁰Hakhe Josep ha Ijipni bebak hano Pharaoni banta paiwi na kha; tamni hwn ba Ijipsarok tong kwrwi harokno asari nangma bagwi ma phal kha. Hakhe bebak ha’-no Pharaoni wng kha;

²¹tei ha Ijipni yaphangni simi buchuk jorani bebak borokrok sak sakno seleng ma snam bai kha.

²²Bo ochairokni ha simi se pai li ya; bórok Pharaoni thani rang manma bai cháui tongo; aboni bagwi bórok bórokni harokno phalna nang li ya.

²³Josep borokrokno hai hwnwi sa kha, “Nai di, ang tabuk norokno tei norokni hano Pharaoni bagwi pai kha. Iko norokni bagwi norokni kheto-o sarnani bwchlwi.

²⁴Norok ra bai pái khe banta kaibani kaisa Pharaono ma rwnai, bakbani bakbrwi khe nini wngnai, abo bwchlwini bagwi tei nini núkhungni chwrai-khonairokni bagwi chámung wngnai.”

²⁵Bórok hai hwnwi sa kha, “Nwng chini langmarokno mwthang kha; nwng naima tẃi’-no chwng Pharaoni seleng wng sinai.”

²⁶Hakhe Josep ha Ijipni bagwi raida kaisa snam kha, abo tabukbo rákhokjago, ochairokni harok simi Pharaoni wng li ya.

²⁷Omo tẃi khe Israil ha Ijipni Gosen amchoi-o tong kha; bórok aro gwnang kha ka tei kwbángma bwsa-bẃtẃirok man kha.

²⁸Jakob ha Ijibo nokha bisi chisni tong kha; bo umor nokha bisi sara tei brwichisni ká kha.

²⁹Bini thwinani jora samphaui phai khe, bo bini bwsla Josepno ringwi hai hwnwi sa kha, “Tumung nwng ano hamjak khe, nini yakno ani yaphungo beraui kubui khe swmai tang di. Nwng ano ha Ijibo ta phob di,

³⁰tamo khe o ha Ijipni kariui tlangwi aphasong bai pal khe bórok phobjakthani se ano phobwi di.” Bo hai hwnwi sa kha, “Ang nwng sama tẃi’-no khlainai.”

³¹Hakhe bo hai hwnwi sa kha, “Ani thani swmai tang di”; hakhe bo swmai tang kha. Abo pái khe Israil bini thuyamo bokhorok bomwi tong kha.