Read Kok Borok YAPHANG 49 Bible Online

YAPHANG 49 - Kok Borok bible

YAPHANG 49

¹Aphuru khe Jakob bwslasongno ringwi hai hwnwi sa kha, “Norok kuthum phai bai di, thinango norokni tamo wngnai ang norokno abono sa anw:

²“O Jakobni bwsarok, kuthum phai bai di tei nwpha Israilni kókrok khna di.

³Ruben nwng ani sajla okra, nwng’-se ani phan tei ani phanni tháikra bwthái, ani swkangni bórom tei phan.

⁴Nwng twi kochokjak hai, tamo khe nini swkang wngmani manmungrok tong glak, tamni hwn ba nwng nwphani thuthai-o tháng kha; tei abono kwthar ya khlai kha, ani thuyamo kasa kha!

⁵“Simion bai Lebi bórok takhuknwirok; tungphlajakni aitalrok khe bórokni sengrok.

⁶O ani bwkha, bórokni kókbiti sa laima-o ta phai di; ani phola bórok bai pal ta gwdal di; tamni hwn khe bórok thamchi tungjagwi borokrokno butharo tei bórok thwng laina bagwi musuk chwlarokni yastwngni sirduk rasu lai-o.

⁷Bórokni jolima-o swraimung nang thung, tamni hwn khe abo panjalwi wngma klai-o; bórokni a jolimung belai khe khairokma kwrwi! Jakobni bisingo ang bórokno baknai tei Israilni bisingo pisa-piring khlainai.

⁸“Juda, nini takhuksong nono lobnai; nwng nini kebengnai arirokno gwdna-o romnai; nwphani bwsarok nono bomwi khulumnai.

⁹Juda wng khe Singho bwsa se; angsla mui romwi kasaui phai kha. Bo singho hai khe achugo tei singho bwrwi hai khe thu-o, bono sabo socha raknai?

¹⁰Judani yakni habugrani a raidang kwma glak, tei bini yakung ká thaini bujni raidang kwma glak, aboni bubagra (Silo) phai ya sak; dopharok bini kók khnaui tongnai.

¹¹Bo angur buphango bini koraino khanai, tei bini hamjakma angur buphango korai chirka bwsano khanai, bo bini rírokno angur bwtwi bai khe sú-o, tei bini kanma-chumma ríno angurrokni thẃi-o khe sú-o;

¹²bini mokolrokbo angur bwtwi nungma bai kwchak wngo, tei bua khe abuktwi nungma bai kuphur wngo.

¹³“Jebulun khe twijlang rukungo tongnai; bini aro rungtorrokni bathakthai kaham kuk wngnai, bini ha ari Sidon jora wngnai.

¹⁴“Isakar khe phan gwnang korai chirka, bo mera bodolrokni kwcharo thu-o;

¹⁵bo nuk kha lenglathai khe kaham, tei a habo kwchang kwchang; hakhe bo poja hornani bo phairukung bom rw kha, tei seleng hai khe samung kwrak tang kha.

¹⁶Dan Israilrokni tei bosongrok hai bini borokrokni buj thumnai wngnai.

¹⁷Dan khe lama gandarni chibuk wngnai, lama gandarni bis gwnang chibuk, bo koraini yakorai-o sugo, hakhe a korai kanai uklogo klaiwi thángo.

¹⁸O Subraiyung ang nini phiyókmano naisingwi tongo

¹⁹“Gadno bodol kaisa swprakjaknai, tamo khe bo’-bo bórokno uphilwi swprak phinai

²⁰“Aserni chámungrok kaham wngnai, tei bo habugrani bagwi nangma chámungrok rwnai.

²¹“Naptali khe dwkhwi kwrwi mwswi bwrwi hai, bini khugo khe kók kwtẃi-kwtẃi máng.

²²“Josep khe bwthái kupulung bedek, twisa rukungni bwthái kupulung bedek, bini bedekrok chok deualno kasaui láiwi thángo.

²³Badukhung chakhla tẃinairok bono belai khe’-no swprak kha, chakhla kogwi bono dobo khiklai kha;

²⁴hai phano bini badukhung ninang li ya, bini yakbo haino srai-srai’-no tongo, Jakobni a Phan kwraksani yak (mwrwknaisa tei a Israilni Holongni mung bai),

²⁵Nini nwphani Kaitor nono chubanai, Phankrak Kaitor nono kuchuk sakani hamari rwnai tei ha bisingni twi chersa rwui hamari rwnai, ogo tei khája-o nono hamari rwnai,

²⁶Nini nwphani aroni hamari abo ang swkango apha chuchusongni aro manmani hamarini slái’-bo ham kugo; abo kusung kusung tongnai hathái jora thángwi sógwi kha; abo Josepni bokhorok saka o klai si thung, bini takhuksong bai swkakjaknaini bokhorokni thani klai thung.

²⁷“Benjamin akarjak swikur hai, phungo khe bo mui romwi uásigwi chá-o, tei sanja-o khe segwi tubuma manwirokno banta khlai-o.”

²⁸Omorok wng kha Israilni bosong Chiknwirok; bórokni bupha hamari rw phuru o kókrokno bosong thwgwini bagwi sa-o. Bo bebakno’-no bórokni manthai hamarirokno gothok rwui rw kha.

²⁹Ulo bo bórokno kók kwchárwi hai hwnwi sa kha, “Ang ani borokrokni thani thángnani bagwi ani jora sók phai kha; aphasongno phob thani anobo bórok bai baksa khe Hitisa Ephronni hapharni a hakhoro phob di,

³⁰abo wng kha Makpela-o, Mamreni salkabai-o tei abo ha Kananno, Abraham o hakhor tei hapharno simalwngni bagwi Hitisa Ephronni yakni paimani.

³¹Aro’-no bórok Abrahamno tei Bihik Sarano phobo; Aro’-no bórok Isak tei bihik Rebekanobo phobo; Ang Leanobo arono phobo.

³²A haphar tei hakhor Hitisarokni yakni pai-o.”

³³Jakob bini bwsarokno kók kwchárwi pái kha, aphuru khe bo bini thuyamo yakung kongnwino bochorop khlai kha tei rangma thagwi thwiwi bini borokrok tong thani tháng kha.