Read Kok Borok YAPHANG 50 Bible Online

YAPHANG 50 - Kok Borok bible

YAPHANG 50

¹Aphuru khe Josep buphani mwkhango motom su-ui kap kha.

²Hakhe Josep bini buphani mango molom phulna bagwi bithi-kwrwngrokno thol kha. Bithi kwrwngrok Israilno molom phul lai kha;

³abo khlainani sal brwichi nang kha, Ijipsarok bini bagwi salsnichi bwkha kham lai kha.

⁴Bini bwkha khamma sal lái khe, Josep Pharaoni nokni borokrokno hai hwnwi sa kha, “Tumung ang norokni mokolo bwkha phurjak khe Pharaono kisa hai hwnwi saui ja di hwnwi ma koi-o;

⁵apha thwinani swkang ano hai hwnwi swmai tang rwui kók kwchár lang kha, ‘Ani thwinani jora wng kha: Ha Kanano ani mangkhor khurjak tongma’-ono nwng ano phob di’ aboni bagwi ano kisa aphano phobnani rwui rohor ja di, hakhe ang bono phobwi kiphilwi phai anw.”

⁶Pharao hai hwnwi sa kha, “Tháng di tei nwphano nwng kók rwma tẃi phobwi di.”

⁷Hakhe Josep buphano phobna bagwi tháng kha; bo bai baksa ha Ijipni habugrani nokni okrarok, tangphangrok, tẃiphangrok, sebukrok tháng lai kha,

⁸Josepni nokni borokrok, bini takhuksong tei buphani nokni tei tongnai borokrok bo bai baksa tháng bai kha; chwrai bwsarok tei bórokni merarok, punrok tei musuk-toknokrok simi se Goseno tong rwk si-o.

⁹Korai malkhung kanairok tei korai saka kanairokbo bo bai baksa tháng kha; abo belai’-no bodol kotorma wng kha.

¹⁰Bórok Jordanni ayang nar Atado mai nakma jidolo sók phai kheno, bórok bwkha báiwi chirigwi kap lai kha; tei Josep salsni buphani bagwi kap kha.

¹¹Kannani borokrok bórokno a mai nakma jidoloni Atado kap laima nuk khe bórok hai hwnwi sa lai kha, “Ijipsarok belai khe bwkha báijagwi kap lai kha.” Aboni bagwi abono Abel-Mijraim[81] hwnwi mung pharjak kha; abo khe Jordanni ayang naro.

¹²Hakhe bini bwslasongno bo dagima hai khe’-no bórok khlai kha;

¹³bwslasong bini mangno ha Kanano tlang lai kha tei Makpelani hagurungo phobwi lai kha, abo khe Mamreni salkabai-o, abono Abraham simalwng khlaina bagwi Hitisa Ephronni aroni paimani.

¹⁴Josep buphano phobwi pái khe, bo ha Ijibo bini takhuksong bai tei bo bai pal khe buphano phobna bagwi simalwngo thángnairok khe kiphil kha.

¹⁵Bórokni bupha thwimani ulo, Josepni takhuksong hai hwnwi sa kha, “Tabuk khe Josep chwng bini hamya khlaima bagwi chwngno yagul su-ui mano.”

¹⁶Hakhe bórok Josepni thani borok rohorwi hai hwnwi sa kha, “Nwpha thwi ya sini hai hwnwi dagi lang kha,

¹⁷‘Josepno hai hwnwi sa di ang koi ja-o, nini takhukrok nono hamya khlaimano nakar ja di.’ Phiya, tabuk nini o nwphani Kaitorni selengrokno nakar di.” Hakhe Josepno o kók sajak kheno kap kha.

¹⁸Hakhe bini takhuksong baithang phaiwi bono botok khe klai khulumui hai hwnwi sa lai kha, “Nai di chwng le nini selengrok se.”

¹⁹Tamo khe Josep bórokno hai hwnwi sa kha, “Ta kiri di, ang ba Kaitor diba?

²⁰Norok khe ani bagwi hamya chapmani; tamo khe Kaitor khe abono kaham khlai kha; kwbángma borokrokni langmano mwthangwi narwkna bagwi, tabuk kwthang tongmarok abo swkango a wngmarokni bising tẃi se wngo.

²¹Aboni bagwi ta kiri di; ang norokni tei norokni bwsarokni nangmano rwnai.” Hakhe bo bórokno bwkha kwchang rwmung kók saui kók rw phi kha.

²²Hakhe Josep ha Ijibo bini buphani núkhungni borokrok bai khe tong lai kha; Josep nokha bisi sarachi kwthang tong lang kha.

²³Bo Ephraimni bwsarokni busuksongno nuk lang kha; Manaseni bwsla Makirni bwsaroknobo bo bini khuri-o khe bam lang kha.

²⁴Hakhe Josep bini takhuksongno hai hwnwi sa kha, “Ang thwinani kasu laha, tamo khe Kaitor norokno nainai tei bo norokno o hani kariui tlangwi Abraham, Isak tei Jakobno rwna hwnwi swmai tangmani a ha-o tlangwi thángnai.”

²⁵Hakhe Josep Israilsarokno hai hwnwi swmai tang rw kha “Kaitor norokno naiwi tongnai, norok ani bekrengno oroni tlangwi ma thángnai.”

²⁶Hakhe Josep ha Ijibo nokha bisi sarachi-o khe thwi kha; tei bórok bini mango molom sil lai kha tei buphangni bokhogo daui ton kha.