Read Kok Borok YAPHANG 8 Bible Online

YAPHANG 8 - Kok Borok bible

YAPHANG 8

¹Aboni ulo Subraiyung Noano muitu khlai kha tei bo bai baksa tongnai bebak mal-matarokno, musuk-misiprok, toksa-toktẃirokno muitu khlai kha, Kaitor nokbar sip rw kha tei twirok bathak kha.

²Nokhani uatwirok thak kha tei twimuk twirokbo yormani thak kha.

³O ha sakani twirok kechepsana chengsaui tong kha. Nokha sal sara-bachi ká khe’-no twi kechep kha

⁴tei aboni ulo talsnini talo tei sal chisnini salo rungtor Ararat hathái-o thángwi kwchaui kha.

⁵Nokha talchi jora twi ran kha, talchini puilani salo hatháini bokhorok nukjak kha.

⁶Aboni ulo sal brwichini salo Noa bini snammani rungtorni tailamno phiyok kha

⁷tei tokha masa phiyógwi rohor kha; abo ayang-uyang ha kwran naitugwi birwi tong kha.

⁸Aboni ulo khe twi de ran kha nainani bagwi pharuk masano phiyógwi rohor kha;

⁹hai phano o pharuk bájaknai kwrwi wngwi abo hai’-no hai rungtoro kiphilwi phai kha, tamni hwn ba aphuru phano ha sakani twi kechep súk ya kho. Hakhe bo abono yak phologwi rungtor bisingo sitok kha.

¹⁰Aboni ulo bo tei salsni naisigwi tong kha tei hai’-no hai pharukno phiyógwi rohor-u kha;

¹¹o pharuk sarigo bini thani kiphilwi phai kha tei búkhúgo tháistwi buphangni bwlái kwlwi tubu-ui phai kha, abo bai Noa ha sakani twi ran kha hwnwi saui man kha.

¹²Aboni ulo bo tei salsni naisingwi tong phi kha tei hai’-no hai pharukno phiyógwi rohor kha, aphuru khe abo tei bini aro kiphilwi phai li ya.

¹³Nokha bisi dok-rani puilani bisi-o tei puilani talo tei puilani salo bebak twirok hani ran kha; Noa rungtorni núkhúng phiyogwi nahar khe, hani twirok ranjak nuk kha.

¹⁴Talnwi talni sal nwichisnini salo twirok ran bai kha.

¹⁵Aphuru khe Kaitor Noano hai hwnwi sa kha,

¹⁶“Nwng bai nihik tei nwslasong tei bórokni bihiksong bebak’-no rungtorni ongkhorwi phai di.

¹⁷Nini rungtorni bebak langma gwnang mal-matarok tei tokrokno tẃiwi nongkhor si di, bebak malnai tei birnairok bórok ernai; abórok o hayungo erwi pung si thung.”

¹⁸Hakhe Noani bihik bwsa tei bahamjwksong nongkhor lai kha.

¹⁹Joto mal-matarok tei bebak birnairok, malnairok, yóngsa-kuksarok bebak’-no bojro-bojro khe rungtorni phataro nongkhor lai kha.

²⁰Hakhe Noa Subraiyungni bagwi háyá kaisa tang kha; hakhe bebak mal-mata tei tokrokni bere barokna bagwi chúkjak kwtharrokno háyá-o sógwi barok kha.

²¹Hakhe, Subraiyung aboni báhaino belai’-no motomjak kha, hakhe Subraiyung bini khá bisingo hai hwnwi sa kha, “Ang o hano tei swraimung rw li ya, tamni hwn ba borokrok achai phuruni simi’-no cha ya wngwi phai kha. Aboni bagwi omo hai khe hayungni langma gwnangrokno tei sokomor li ya.

²²O hayung tong sak maiphang-khulphang tei muikwthwng-tháikwthwng káinani tei thumnani jora tongnai. Tungmani mol tei kwchangni molbo tongnai, abo hai khe sal tei hor wng máng tongnai.”