Read Kok Borok YAPHANG 9 Bible Online

YAPHANG 9 - Kok Borok bible

YAPHANG 9

¹Kaitor Noa bai bwsarokno hamari rwui hai hwnwi sa kha, “Bwsa kwbáng man di, er di tei hano kupulung khlai di.

²Ha sakani bebak mal-matarok, malnairok tei toksa toktẃirok, twini árok nono ma kirinai, abórok bebak’-no nini yago yapharjak kha.

³Bebak langma gwnangrokno; tei dalo-samprarok bebak’-no nini chámung wngnai, ang nono abórok bebak’-no rw kha.

⁴Tamo khe nwng thẃi gwnang kwthang manwi simi ta chá di, tamni hwn ba thẃi-o se langma tongo.

⁵Khoroksa swk nini thẃino kochok rw khe ang abono muitu tonnai. Mal-matarok phano eba borok phano bini takhukno buthar khe ang aboni bagwi butharwi yagul sunai.

⁶Khoroksa swk borok buthar khe bo tei kubun borok bai butharjaknai; tamni hwn ba borok Kaitorno kosol khe snamjak.

⁷“Hakhe, nwng bwsa kwbángma man di tei ha gwnangwi erwi o hano kupulung khlai di.”

⁸Hakhe Kaitor Noa tei bo bai baksa tongnai bini bwsarokno hai hwnwi sa kha,

⁹“Nai di, ang nwng bai tei nini ulni bosongrok bai swmai tang kha,

¹⁰nwng bai baksa tongnai langma gwnang bebak mal-matarok bai, toksa-toktẃirok bai musuk-misiprok tei nwng bai baksa rungtorni ha-o nongkhornai bebak bai’-no swmai tango.

¹¹Ang nwng bai swmai tango, ang tei bebak langma gwnangrokno twi kotor bai khe ha sakani sokomor li ya tei o hano ang twi kotor bai tei sokomor glak kha.”

¹²Tei Kaitor hai hwnwi sa phi kha, “Omo nwng bai ani bisingo tei nini logini bebak langma gwnangrokni bisingo tei thinangni bosongrokni bagwi o swmaini mari rw kha:

¹³Ang ani chokhrengno nokha-o ton kha, omo’-no ang swngchar bai swmai tangmani mari wngnai.

¹⁴Ang nokha-o chumui kasa rw phuru, o chokhreng nukjak khe,

¹⁵Ang nwng bai tei o ha saka-o tongma bebak langma gwnangrok bai swmai tangmano muitu khlainai, hakhe bebak langma gwnangrokno sokomorna bagwi twi tor rw glak.

¹⁶Chumui-o chokhreng wng khe ang abono naisigwi Kaitor bai bebak ha saka-o kwthang tongnairok swmai tangmano muitu khlainai.”

¹⁷Kaitor Noano hai hwnwi sa kha, “Omo’-no ha saka-o tongma bebak langma gwnangrok bai ang swmai tangmani mari.”

¹⁸Rungtorni nongkhornai Noani bwsarok wng kha Sem, Ham tei Japhet. Ham wng kha Kananni bupha.

¹⁹O khorok thamrok khe Noani bwsarok; Bórokni bising tẃi’-no o ha saka-o borok kupulung wngo.

²⁰Noa wng kha swkang ha muphunwi núkhung khlainaisa. Bo’-no swkang angur phang lwng khlai gra-o;

²¹bo angur bwtwi nung kha, hakhe phek kha tei ríni nogo sago rí kwrwi khe thu-ui tong kha.

²²Kananni bupha Ham buphano sago rí kwrwi nuk kha, hakhe phataro thángwi bini tei khoroknwi takhuksongno saui kha.

²³Hakhe, Sem bai Japhet rí kangsa naui khoroknwini phairukungo boksaui uklok khe him laiwi thángwi buphano rí bólwi rw lai kha; bórokni bumkhang uphiljak wngwi bórok buphani rí kwrwino mokol bai nuk li ya.

²⁴Noa angur bwtwi phekmani swra khe bwsla kusu bono tamo khlai kha saui manẃi hai hwnwi sa kha;

²⁵“Kanan swraimung nangnai; bo bini takhuksongni selengni seleng wngnai.”

²⁶Bo hai hwnwibo sa kha, “Sem ani Subraiyung Kaitor bai hamcha rwjak thung; tei Kanan khe bini seleng ma wng thung.

²⁷Kaitor Japhetno[21] hamcha rw thung, tei bo Semni nogo ma tong thung; tei Kanan Japhetni seleng ma wngnai.”

²⁸Twi kotorni ulo Noa teibo nokha bisi thamrabachi thangwi tong lang kha.

²⁹Tei bini umor nokha bisi chukurabachi-o khe thwi kha.