Read Kok Borok 2 SAMUEL 13 Bible Online

2 SAMUEL 13 - Kok Borok bible

2 SAMUEL 13

¹Daudni bwsla Absalomni khoroksa naithokma bahanok tongo, Amnon bono belai hamjak kha.

²Amnon aswk khe bini bukhuk Tamarno hamjak kha, sak sakno lumui se phunuk si-o. Bo sikla kwthar wngmani bagwi Amnon bono mungsa khlai man li ya.

³Tamo khe Amnonni khoroksa belai siyan kwrwng bikiching tongo, bini mung Jonadab Daudni takhuk Simeani bwsla.

⁴Jonadab Amnonno hai hwnwi sa kha, “Nwng ba habugrani bwsla wng twtwi tamni sal brúm ang nono ba aswk mwkhang mokjak khe máng nuk? Nwng tamo wng ano saui man ya diba?” Amnon bono, “Ani takhuk Absalomni hanok Tamarno ang belai hamjago,” hwnwi sa kha.

⁵Jonadab bono hai hwnwi sa kha, “Nwng lummani hai khe nini thuthai-o klaiwi tong di. Nini nwpha nono nainani phai khe nwng bono sa di, anghanok Tamarno oro rohor di, ano chá rw phai thung, oro ani mokol bwskango ang nukna tẃi khe chámung tiyar khlai phai thung, ulo bini yak bai ano chá rw thung.”

⁶Hakhe Amnon lummani hai khe thuthai-o rokoui tong kha. Habugra bono nainani phai khe bono hai hwnwi sa kha, “Ani hanok Tamarno oro rohor di, bo ani bwskango auan snam phai thung, ulo bini yak bai ano chá rw thung.”

⁷Hakhe Daud Tamarno hai hwnwi sa rw hor kha, “Nini takhuk Amnonni nogo tháng di tei bini banta chámung snamwi di.”

⁸Hakhe Tamar bini bwta Amnon thumani nogo tháng khe, bo kisa auan buljak naui bini bwskango snamwi auan muthung kha.

⁹Bo kaisa manwi naui bini bwskango abono ton kha, tamo khe bo chánani soi li ya. Tei Amnon, “Bebakno’-no oroni tikhlai rohor bai di,” hwnwi sa kha. Hakhe bebak’-no nongkhorwi tháng bai kha.

¹⁰Hakhe Amnon Tamarno hai hwnwi sa kha, “Ani thuthai-o auan tubu di, nini yak bai chá rw phai di.” Tamar auan naui bini gana-o tháng kha.

¹¹Tamar auanno bini gana-o tubu khe bo bini yak romwi bono, “Phai di, bukhuk ang bai thu phai di,” hwnwi sa kha.

¹²Tamar bono hai hwnwi sa kha, “I’nhi, takhuk omo hai samung hamya khlainani ano ta sa di, omo hai samung hamya Israilrokni bisingo khoroksa phano khlai ya kho, abo belai butua tei cha ya samung.

¹³Aswk lachimasingchano ang bahai khe rujunai? Tei nwngbo Israilo mwkhang sókjak wng anw. Ang nono koi-o tabuk habugrano sa di, bo ano nini thani yaphar ya wng glak.”

¹⁴Tamo khe bo Tamarni kók se khna li ya, chwla phankrak kukba bwrwino romwi bo bai thu kha.

¹⁵Hakhe Amnon Tamarno belai khe naisler kha, swkang bwrwino hamjakmani slái se tabuk naisler kuk si-o. Amnon Tamarno, “Nongkhorwi tháng di,” hwnwi sa kha.

¹⁶Tamo khe Tamar bono hai hwnwi sa kha, “I’nhi, nwng ano khlaimani slái ano hai’-no yakarwi rohormani[18] abo teibo cha ya kuk klai-o.” Bo Tamarni kókno kisa phano khna li ya.

¹⁷Amnon bini selengno ringwi, “O bwrwino ani bwskangni tikhlai rohor di, hakhe dugar berebwi rw di,” hwnwi dagi kha.

¹⁸Tamar khe bumul gwnang rí lolang chumjak,[19] abo hai khe’-no a jora-o[20] habugrani bwsajwk siklarok chumo. Hakhe bini seleng Tamarno nokni kariui dugar berebwi rw kha.

¹⁹Tamar bini bokhorogo thapla phul kha, bini kanma ríno sichigwi yak bai mwkhang kholobwi kabwi nongkhorwi tháng kha.

²⁰Tamarni bwta Absalom bono hai hwnwi sẃng kha, “Amnon de nono dera rw lang? Anghanok, aswk bwkha ta nangjak si di. Bo le nwta se, hakhe omono buino ta sa trwng di.” Hakhe Tamar bwta Absalomni nogo saichung susuk khe bwkha nangwi tongwi kha.

²¹Habugra Daud abórokno khna khe belai jolijak kha.

²²Absalomni hanok Tamarno Amnon dera rwmani bagwi belai khe naisler kha, hai phano Amnonno kahambo sa li ya, hamyabo sa li ya.

²³Nokha bisik nwini ulo Absalom Ephraim ganani Balhajoro bini mera buikhumu silmani jora-o Absalom bebak habugrani bwslasongno kobok kha.

²⁴Hakhe Absalom habugrani thani thángwi hai hwnwi sa kha, “Nai di nini seleng merarokni buikhumu raui tongo, ang koi ja-o, habugra tei nini selengrok aro manjak phai ja di.”

²⁵Habugra Absalomno hai hwnwi sa kha, “I’nhi chwng joto tháng lai khe, nwng tong khochor wngjaknai,” Absalom bono kobok phano habugra khna li ya hai phano bono hamari rwui rohor kha.

²⁶Hakhe Absalom, “Wng ya khe takhuk Amnonno chwng bai baksa rohor di,” hwnwi sa kha. Habugra bono, “Tamni bo nwng bai baksa thángna nang?” hwnwi sẃng kha.

²⁷Tamo khe Absalom Amnonno tei bebak habugrarokni bwslasongno rohor ya sak sa máng tong kha.

²⁸Bini selengrokno hai hwnwi dagiui rw kha, “Amnon arak phek suknano naichomwi tong di tei ang, ‘Amnonno swprak di’ hwnwi dagi phuru khe bono pái khibi di. Ta kiri di; ang norokno dagi ya diba? Ta kiri di, bwkha kotor wng di.”

²⁹Hakhe Absalomni selengrok sajakma haino khlaiwi Amnonno buthar kha. Tei bebak habugrani bwslasong korai-o kasaui khárwi tháng bai kha.

³⁰Bórok lama-o thángwi tong phuru Daudni thani hai hwnwi kók sók phai kha, “Absalom habugrani bebak bwslasongno buthar bai kha, khoroksa phano yók li ya.”

³¹Hakhe habugra bachaui, bini rí sichigwi, ha-o pwtapsa khe klai kha, gana-o bachaui tong bainai selengrokbo haino bórokni rí sichik lai kha.

³²Tamo khe Daudni takhuk Simenani bwsla Jonadab sa kha, bórok bebak habugrani bwslasongno buthar li ya. Amnon khoroksa se thwi-o Absalom bini bahanokno Amnon romphre phuruni simi khe’-no omo hai khlainani bagwi ampaui chabo.

³³Hakhe bebak nini nwslasong thwi bai kha hwnwi poito ta chá di, Amnon khoroksa se thwi-o.

³⁴Absalombo khár kha, khoroksa mwrwknai seleng borok kwbángmano hathái sakani nongkhorwi Horonaim[21] lama-o phaimani nuk hor kha.

³⁵Jonadab Daudno, “Nai di, ang nini seleng samani hai’-no habugrani bwslasong sók phai kha,” hwnwi sa kha.

³⁶Bo sa bai khe’-no Daudni bwslasong sók phai kha, hakhe bórok kap lainani cheng lai kha, Daud tei bini selengrok bebak’-no khá nangwi kap lai kha.

³⁷Tamo khe Absalom Gesurni habugra Amihudni bwsla Talmaini thani khárwi tháng kha. Hakhe Daud bwslani bagwi sal kolokma khá hamya wngwi tong kha.

³⁸Hakhe Absalom Gesuro khárwi thángwi nokha bisik tham tongwi kha.

³⁹Tamni hwn ba Amnonno thwi kha hwnwi saui manmani bagwi tabuk habugra khakchangna bagwi Absalomno khátangwi malaina muchungjak kha.