Read Kok Borok 2 SAMUEL 2 Bible Online

2 SAMUEL 2 - Kok Borok bible

2 SAMUEL 2

¹Aboni ulo Daud Subraiyungno, “Ang Judani kamiyung khungsa swgo thángnai de?” hwnwi sẃng kha. Subraiyung bono, “Tháng di,” hwnwi sa kha. Daud, “Ang buro thángnai?” hwnwi sẃng kha. Hakhe bo hai hwnwi sa kha, “Hebrono.”

²Hakhe Daud aro tháng kha, bihik khoroknwi Jejrilni Ahinoam tei Karmelo tongnai Nabalni randijwk Abigailno tlang kha.

³Daud bini bororokno tei bórokni núkhungni bebak borokno bo tubu-ui Hebrono tong lai kha.

⁴Hakhe Judani borok Hebrono phaiwi Daudno bórok Judani habugra chong lai kha. Bórok “Giliado tong bainai Jabesni bororok Solno phob kha,” hwnwi Daudno sa kha.

⁵Daud borok rohorwi bórokno hai hwnwi sa hor kha, “Norokni habugra Solno norok phobwi bórom khlaimani bagwi Subraiyung norokno hamari rw thung.”

⁶Tabuk Subraiyung norokno khairogwi hamjak thung tei kók narwgwi tong thung. Norok abo hai khlaimani bagwi ang norokni kaham khlainai.

⁷Tabuk norok kwrak wng di, kiri ya wng di, norokni habugra Sol thwi kha, Judani borok ano bórokni habugra chong kha.

⁸Nerni bwsla Abner tei Solni sengkrak bokhorok Solni bwsla Isbosetno Mahanaimo tlangwi tháng kha.

⁹Tei aro bo Isbosetno Giliad Aser[2] Jejril, Ephraim, Benjamin tei bebak Israilni habugra chong kha.

¹⁰Solni bwsla Isboset Israilo habugra chá phuru bini umor bisi bwrwichi wng kha tei bo bisiknwi se habugra ma chá si-o. Phiya ba Judani bororok khe Daudno’-no chajak lai tong lai kha.

¹¹Hakhe Daud Hebrono Juda bosongni bugra cháui tongma khe nokha bisi sni tei nokha taldok jora ká kha.

¹²Nerni bwsla Abner tei Solni bwsla Isbosetni selengrok Mahanaimni Gibeono tháng lai kha.

¹³Tei Jeruiani bwsla Joab tei Daudni selengrok ongkhorwi thángwi Gibeonni pukhiri gana-o malai lai kha tei bórok aro baksa khe pukhirini khaksa achuk lai kha tei baksa khe pukhirini tei khaksa-o achuk lai kha.

¹⁴Hakhe Abner Joabno, “Phai di, babainwini siklarokno chini bwskango nang lai si thung,” hwnwi sa kha. Hakhe Joab, “Bórok nang lai si thung,” hwnwi sa kha.

¹⁵Hakhe khorok lekhaui baksa baksa kheno bachaui nang lai kha, Solni bwsla Isboset bai Benjamin bosongni borok khorok chinwi tei Daudni selengrokni bere khorok chinwirok bai choba nang lai kha.

¹⁶Hakhe borok thwgwi’-no khoroksa tei khoroksa bini arini bokhorogo romwi bini seng bai bara-o yór lai kha, bórok bebak’-no aro’-no thwi bai kha. Aboni bagwi aboni mung Helkat-hajurim. Omo wng kha Gibeono.

¹⁷A salni choba belaino kirimasingcha wng kha; Abner bai Israilni bororok Daudni selengrok bai mechenjak bai kha.

¹⁸Jeruiani bwsla khorokthamrok bo aro tong bai-o Joab, Abisai tei Asahel. Asahel khe bolongni mwswi hai khe doui khachigwi mano.

¹⁹Bo Abnerno yaksi yagra tei uklok naisik yaui’-no riphrigwi tháng kha.

²⁰Hakhe Abner uklogo uphilwi bono hai hwnwi sa kha, “Nwng Asahel da?” Bo hai hwnwi sa kha, “I’n ang’-no.”

²¹Abner bono hai hwnwi sa kha, “Ano ta riphrik si di, nini bwskangni khoroksa sengkrakno se riphrigwi romwi bini yakni tongmarokno segwi na si di.” Tamo khe Asahel bono kiphil yaui bono riphrigwi tháng kha.

²²Abner tei uáisa Asahelno hai hwnwi sa kha, “Ano ta rwkthar yaui kiphil si di; nono ang tamni swpragwi ha-o khiklainai? Hakhe bahai khe ba ang ani mwkhangno nini takhukno phunuknai?”

²³Hai phano Asahel abono khna li ya, hakhe Abner bini olonga bai bohogo yórwi rw kha, bini phikung tẃi[3] olonga nongkhorwi phai kha. Asahel ha-o klaiwi thwi kha, bebak borok Asahel klaiwi thwima-o phaiwi sók phaiwi thóng-thóng bachaui tong lai bai kha.

²⁴Tamo khe Joab bai Abisai Abnerno riphrik lai kha. Sal hap twtwi-o khe bórok Amma hathái-o sók phai kha, abo Giani salka babai tei Gibeon hasing panthoro thángma lama-o klai-o.

²⁵Benjaminsarok Abnerni thani kuthum laiwi hathái saka-o tei uáisa chobani bagwi tiyar wng lai phi kha.

²⁶Hakhe Abner Joabno ringwi hai hwnwi sa kha, “Chwng mol brúm choba nang lai máng de ma tong lai sinai?” Páithago hamya simi se wng anw nwng saui man ya de? Tei bwswk kwdwk nini takhukrok nono bororok riphrigwi tong sinai?

²⁷Hakhe Joab hai hwnwi sa kha, “Kaitorni mung bai swmai tangwi sa-o, nwng sa ya wngma te ani bororok khwna phung jora riphrigwi máng tong kha mun.”

²⁸Hakhe Joab totro sup kha, bebak bororok Israilrokno riphrikma thak lai kha tei chobabo nang lai li ya.

²⁹Tei Abner bai bini bororok hopung Araba tẃi tháng lai kha, bórok Jordan bárwi tháng laiwi teini phungo Mahanaimo sók phai lai kha.

³⁰Joab Abnerno riphrikmani thagwi bini bororokno thumwi nai ba Daudni selengrok khorok chichuku kwma kha tei Asahelbo kwrwi kha.

³¹Tamo khe Daudni selengrok Benjamin bosongni khorok thamra tei Abnerni khe khorok dokchino buthar lai kha.

³²Tei Joab bai bini bororok Asahelni mang kwthwino tubu-ui Betlehemo núkhungni simalwngo phob lai kha. Joab bai bini bororok hopung him laiwi aichugo Hebrono sók phai lai kha.