Read Kok Borok 2 SAMUEL 20 Bible Online

2 SAMUEL 20 - Kok Borok bible

2 SAMUEL 20

¹Hakhe aro Benjamin bosongni Bikrini bwsla Seba hwnwi borok cha ya khoroksa tongo, bo totro tamwi hai hwnwi sa kha, “O Israilsong, Daudni thani chini mungsa manthai kwrwi, Jisaini bwslani bosongo chini manthai kwrwi, norok sak sakni ríni nogo tháng bai di.”

²Hakhe Israilrok bebakno Daudno yakarwi tháng kha tei Bikrini bwsla Sebano rwktharwi tháng lai kha. Tamo khe Judani bororok khe bórokni habugrano yakar yaui Jordanni simi Jerusalem jora tháng lai kha.

³Daud Jerusalemo bini noyungo phai kha; Habugra bini khorokchi hik kotoirokno naui bini noyung mwrwk di hwnwi chámung nungmungrokbo rwui klangmani, tamo khe bo bórokni thani tháng li ya, randijwkrok hai khe bórok randi hai wngwi’-no ma tong kha.

⁴Hakhe Habugra Amasano, “Judani bororokno salthamni bisingo ani thani ring bai di, hakhe nwngbo oro tong di,” hwnwi sa kha.

⁵Hakhe Amasa Judano dagina bagwi tháng kha; tamo khe bono jora rwjakmani a jora lái tháng kha.

⁶Hakhe Daud Abisaino hai hwnwi sa kha, “Tabuk Bikrini bwsla Seba se Absalomni slái chwngno teibo hamya khlai kuknai; nwng nini bugrarokni selengrokno tlangwi bono riphrik di wng ya khe bo kamiyung kaham kahamrokno na bainai tei chwngno tong kesep khlainai.”

⁷Hakhe bórok Abisaino riphrigwi tháng lai kha, abórok wng kha, Joab, Keritsasong, Pelethisasong tei bebak phan gwnangrok Jerusalemni simi Bikrini bwsla Sebano riphrigwi tháng lai kha.

⁸Bórok Gibeonni holong kotoro sók phai khe Amasa bórok bai malaina phai kha. Tabuk Joab khe chobani chummung chumjak, bini bwchango khajaknai-o khe seng bokhok khajak. Bo bwskango thángwi tong phuru khe abo klaiwi tháng kha.

⁹Hakhe Joab Amasano hai hwnwi sa kha, “Takhuk, nwng kaham kwrwng de tong?” Tei Joab bini yagra yak bai Amasano motom sunani bagwi khochai-o rom kha.

¹⁰Tamo khe Joabni yago seng tongmano Amasa nai slap li ya hakhe Joab bini bohogo abo bai yórwi rw kha, bini bubuksarok ha-o klai bai kha tei uáisa phano swprak phina nang li ya; aro’-no bo thwi kha. Hakhe Joab bai bini takhuk Abisai Bikrini bwsla Sebano riphrik lai kha.

¹¹Aphuru Joabni bororokni bere khoroksa borok Amasani gana bachaui hai hwnwi sa kha, “Joabno chajaknairok tei Daudno hamjaknai borok, Joabno se rwkthar lai thung.”

¹²Aphuru Amasani mang kwthwi lahar kotoro bini thẃi saka-o goirokjak. Tei aphuru bini gana tẃi lainairok abono nuk khe ma bathago. Bebak bororokno aro bathagwi naimani nuk khe bo Amasano laharni norwi hapharo tlangwi bini sago rí bólwi rw kha.

¹³Tei laharni mang kwthwino norjak khe, bebak bororok Bikrini bwsla Sebano riphriknani bagwi Joab bai baksa tháng lai kha.

¹⁴Hakhe Seba Israil bosongrokni bebak amchoi láiwi, Abel Betmaka-o phai kha. Bebak Bikrisa[25] bosongni bororok kuthum laiwi bo bai baksa habwi lai kha.

¹⁵Tei bebak Joabni bororok aro phaiwi Abelni Betmaka-o phaiwi kamiyungno gerep lai kha, bórok chokdeualni phataro ha kuchuk khe rúng lai kha, abo chokdeual bai baksa wng kha. Bórok abono khiklaina bagwi hakhor khur lai kha.

¹⁶Hakhe kamiyungo tongnai khoroksa elem kwrwng bwrwi phaiwi, “Khna di! Khna di! Joabno ringwi sa di, ang bono kók sanani tongo,” hwnwi sa kha.

¹⁷Hakhe bo a bwrwini gana-o phaiwi bono hai hwnwi sa kha, “Nwng Joab de?” Bo hai hwnwi sa kha, “I’n ang’-no.” Hakhe bo hai hwnwi sa kha, “Nini selengjwkni kókno khna di.” Tei bo uphilwi hai hwnwi sa kha, “Ang khnaui tongo.”

¹⁸Hakhe a bwrwi hai hwnwi sa kha, “A jora-o lukurok omo hai sa lai-o, ‘Bórok Abelni kókbiti nanaino nai thung;’ hakhe bórok abono khlai kha.

¹⁹Ang simi se Israilni bisingni kwthaui mannai tei kók narwknairokni bere borok khoroksa, norok wng kha kamiyung swbaina nainairok abo wng kha Israilrokni buma. Tamni bagwi norok Subraiyungni bosongno monokna nai?”

²⁰Joab hai hwnwi sa kha, “Abo wngwi se man ya! Omo wng ya! Hakhe ang abono mobo monok ya tei sobo sokomor ya!”

²¹Abo kubui ya; tamo khe khoroksa Iphraimni hatháini borok, Bikrini bwsla Seba se, habugra Daudno kebengwi bacha kha. O borok khoroksano yakarwi rw di, hakhe ang o kamiyungno yakarwi thángnai. A bwrwi Joabno, “Nai di bini bokhorokno chokdeual saka tẃi nini thani khitarwi ma rohornai,” hwnwi sa kha.

²²Hakhe a bwrwi bebak bororokni thani bini elem bai tháng kha. Tei bórok Bikrini bwsla Sebano bokhorok tansu kha tei abono Joabni thani khitarwi rw kha. Hakhe bo totro tam kha tei bórok kamiyungni kutulwi tháng kha tei bebak bororok sak sakni nogo tháng bai kha. Hakhe Joab Jerusalemo habugrani thani kiphilwi tháng kha.

²³Tabuk Joab khe bebak Israil sengkrakrokni bokhorok, Jehoiadani bwsla Benaia khe Keritsa bai Pelethisasongni bokhorok;

²⁴Adoram khe dagiui samung tangnairokni nokphang tei Adoram khe samung tangnai selengrokni tẃiphang tei Ahiludni bwsla Jihosapat khe swiwi narwknai.

²⁵Seba khe tangphang; Sadok bai Abiathar khe ochairok;

²⁶Jairo tongnai Irabo Daudni khoroksa ochai.