Read Kok Borok 2 SAMUEL 21 Bible Online

2 SAMUEL 21 - Kok Borok bible

2 SAMUEL 21

¹Daud habugra chámani jora-o nokha bisik tham belai kirimasingcha khe asari nang kha, hakhe Daud bisi kwbángma Subraiyungno suriui sẃngwi nai kha. Hakhe Subraiyung bono hai hwnwi sa kha, “Sol bai bini núkhungni bororok borok butharmani majra tongo, tamni hwn ba bo Gibeonni bororokno buthar kha.”

²Hakhe habugra Gibeonsarokno ring kha; tabuk Gibeonsarok khe Israilni borok ya tamo khe Amorsarok bai karwi klangjaknairok se; phiya Israil bororok bórokno buthar ya hwnwi kók rw laijak phano Sol khe Israil borok bai tei Judarokni bagwi belai khá nangma bai bórokno butharna bagwi naituk kha.

³Hakhe Daud Gibeonni bororokno hai hwnwi sa kha, “Ang norokni bagwi tamo khlainai? Norok Subraiyungni bororokno hamari rw thung hwnwi ang tamo su-ui rwnai?”

⁴Gibeonsarok bono hai hwnwi sa kha, “Omo rangchak eba rukphaini kók ya omo wng kha Sol bai bini núkhungni kók se. Eba khe Israilrokni bere khoroksa swkno chwng butharna hwnma kók ya.” Tei bo hai hwnwi sa kha, “Norokni bagwi ano tamo khlai di hwnwi hwn?”

⁵Bórok habugrano hai hwnwi sa kha, “O borok chwngno monogwi tei sokomorna hwnwi chap kha tei Israilni bebak amchoi-o chini tongthai kwrwi khlaina chong kha,

⁶bini khoroksni bwslasongno chini thani yaphar thung, hakhe chwng bórokno Gibeono Subraiyungni bwskango tlangwi, Subraiyungni hathái-o khachina bagwi rwjak thung.” Hakhe Habugra, “Ang bórokno rwnai,” hwnwi sa kha.

⁷Tamo khe habugra, Mephibosetno phiyók kha, bo wng kha Solni’-no bwsla Jonathanni bwsa, tamni hwn ba Daud Solni bwsla Jonathan bai Subraiyungni thani swmai tang laijak.

⁸Habugra Aiani bwsajwk Rijpa, Solni bagwi Armoni tei Mephiboset hwnwi bwsla khoroknwirokno man kha tei Mehola-o tongnai Barjilaini bwsla Adrielni bagwi Solni bwsajwk Merab khorokba chwla bwsa man kha.

⁹Habugra bórokno naui Gibeonsarokno yaphar kha, bórok a bororokno hathái-o Subraiyungni bwskango khachiui buthar lai kha. Khoroksnirok aro’-no thwi bai kha. O butharjakma khe mai ramani puilani salo klai-o, omo ramani chengsa phuru se klai-o.

¹⁰Hakhe Aiani bwsajwk Rijpa rí soroi naui abono holong saka-o bo kha tei aro mai ramani a salni simi nokhani uatwi klai yasak’-no arono tong kha. Tei nokhani tokrokno salo aro bá rw li ya tei horobo mal-matarokno aro hap rw li ya.

¹¹Aiani bwsajwk Rijpa, Solni bihik kotoi samung khlaimano Daudno sajak khe,

¹²Daud thángwi Sol tei bwsla Jonathanni bekrengrokno Jabes Giliadni bororokni aroni nahar kha, Philistiasarok Solno Gilboa-o butharwi Betsanni lampra-o khachiui tonmani a mangno Jabes Giliadni bororok khogwi tubu kha.

¹³Tei bo aroni Solni bekrengrok tei bini sajla Jonathanni bekrengrok tubu kha; tei bórok a khachiui butharjaknairokni bekrengroknobo thum lai kha.

¹⁴Hakhe bórok Solni bekrengrok bai bini sajla Jonathanni bekrengrokno Benjamin hani Jela-o phob lai kha, bini chuchusongni simalwngo phob kha; tei habugra sama tẃi’-no khlai lai kha. Aboni yagulo khe Kaitor, hani bagwi surimano khna kha.

¹⁵Philistiasarok tei uáisa Israilrok bai choba nang lai phi kha. Tei Daud nongkhorwi thángwi bini selengrokno thumwi kha tei Philistiasarok bai choba nang lai kha, hakhe Daud kirijakna cheng kha.

¹⁶Tei Isbibenob hwnwi phan gwnang bosongni khoroksa bini pitolni kolonga hilikmani thamra sekel ká-o tei Daudno butharna uansugwi seng kwtal kongsa yago tẃijak.

¹⁷Tamo khe Jeruiani bwsla Abisai bono chubanani phaiwi Philistiasarokno swprak kha tei bono buthar kha. Daudni bororok bono hai hwnwi swmai tang rw kha, “Nwng tei chwng bai choba-o ma tháng glak, wng ya khe nwng Israilni chatino butharnai.”

¹⁸Aboni ulo Gobo Philistiasarok bai tei uáisa choba nang lai phi kha; tei aphuruni jora-o Husathini Sibekai hwnwi khoroksa phan gwnang Sapno buthar kha. Bo wng kha phan gwnang bosongni khoroksa.

¹⁹Tei uáisa Philistiasarok bai Gobo choba nang lai phi kha, Betlehemo tongnai Jareorejimni bwsla Elhanan, Gitisa Goliatno buthar kha, (bini olonga rí takmani rwsamino kosol.)

²⁰Tei uáisa Gato choba wng phi kha, aro khoroksa Philistiani bwsak kotorma phan gwnang tongo, bini yak kongnwi’-ono yago yasi kongdok khe tongo tei bini yakungo bo yasi kongdok khe tongo, bebagwi kongnwichibrwi ká-o. Bo’-bo phan gwnang bosongni’-no khoroksa.

²¹Bo Israilrokno thamchi tung rw khe, Daudni takhuk Simeini bwsla Jonathan bono buthar kha.

²²O khorok brwino Gato tong bainai phan gwnang bosongni, bórok Daudni yago tei bini selengrokni yago butharjak bai kha.