Read Kok Borok 2 SAMUEL 23 Bible Online

2 SAMUEL 23 - Kok Borok bible

2 SAMUEL 23

¹Tabuk omorok’-no wng kha Daudni páithakni kókrok, Jisaini bwsla Daudni kókrok, bororok sa-o bo’-no a kuchugo tisajaknai Jakobni Kaitor bai khe chongjak Israilni khorang kwtẃi khe rwchapnaisa.

²“Subraiyungni Phola ani bising tẃi khe sa-o, Bini kók ani bwslai-o.

³Israilni Kaitor sa kha, Israilni holong ano sa kha; khoroksa swk Kaitorno kiriui bororokno bujsói khe tẃi khe,

⁴bo bórokni saka-o phungni pohor hai khe chẃngo, chumui kwrwini phungo sal chẃngmani hai khe chẃngo tei abo hani samrokno loksa rwnai uatwi hai.

⁵“Ani nok Kaitor bai bachaui tong ya diba? Tamni hwn ba bo ang bai mol brúmni bagwi swmai tangjak, bebakno tong kwchang tong rwna dagi kha. Tamni hwn ba bo ani bebak hamchana-o chuba glak diba tei bebak ani naima tẃi rw glak diba?

⁶Tamo khe Kaitorno kiri ya bororok busurok hai se, hakhe abórok khibiui rohorjaknai; tamni hwn ba abono yak bai romwi man ya.

⁷Tamo khe bórokno tangnairok le yago sorni manwi tei olonga ma tẃinai; wng ya khe bórok bebak’-no hór bai khamwi páinai.”[27]

⁸Omorokno Daudni phan gwnang sengkrakrokni bumungrok; Takemono tongnai Josep basebet bo khorokthamrokni bokhorok, bo bini olonga bai khorok char-ra bororok bai nang laiwi uáisa bai bebakno’-no buthar kha.

⁹Khoroktham sengkrakrokni bere bini lamchidrop khe Dodoni bwsla Eliasar, Ahohini busuk. Salsa Israilrok Philistiasarok bai chobani bagwi aro kuthum lai phuru tei Israilrok uslu-ui tháng phuru bo Daud bai baksa aro tongo.

¹⁰Bo bachaui bini yak bel ya sak Philistiasarok bai nang lai kha. Tei bini yak seng bai kwpha kha; tei a salo Subraiyung kwmamsingcha khe kwplai khlai kha; aboni ulo bororok kwthwirokno khochanani bagwi simi se bini thani tháng si-o.

¹¹Bini yagulo tei khoroksa sengkrak khe Hararisa Ageini bwsla Sama Philistiasarok Lehini sobai bari kupulung kwrẃngsa hapharo kuthum lai kha; bororok Philistiasarokni aroni khár bai kha.

¹²Phiya ba bo khe aro kwrak khe bachaui tong kha tei abono kasu-ui Philistiasarokno buthar bai kha; Subraiyung a salo belai khe kwplai khlai kha.

¹³Mai ranani jora sók phai khe khorok thamchi bokhorokrokni bisingo khorok tham sengkrak bokhorokrok Daud tongmani Adulam hagurungo Rephaim harungo Philistiasarokni sengkrak bodol dolsa kuthum laina jora o tháng lai kha.

¹⁴Aphuru o Daud khe nok kwrak bisingo tongo. Aphuru Philistiani sengkrak bodol dolsa khe Betlehemo.

¹⁵Daud nok khátangjagwi, “Betlehemni duglam ganani twikhorni twino khoroksa swk phano ano khan phai ma te!” Hwnwi sa kha.

¹⁶Hakhe khorok tham phan gwnangrok Philistiasarokni batham tẃi thángwi twikhorni twino khógwi abono Daudni thani tubu lai kha. Tamo khe bo abono nung li ya, bo abono Subraiyungni thani lukhlai rw kha,

¹⁷tei hai hwnwi sa kha, “Ang omo hai bahai khe khlainai, o Subraiyung ang abo hai khlaiwi se man ya, hakhe ang o bororokni thẃi nungmani se klainai tamni hwn ba bórok sak sakni langmano yago naui tubumani se!” Aboni bagwi bo nungna gosi li ya. O samungrokno khorok tham phan gwnangrok se khlai-o.

¹⁸Tabuk Jeruiani bwsla Abisai Joabni takhuk khorok thamchini[28] bokhorok, bo bini olonga bai khe khorok thamrarokno buthar kha tei a khorok thamrok bai khe bumung man li ya.

¹⁹Bo wng kha a khorok thamchirokni bere sinijak kuknai borok. Tei bo bórokni bokhorok wng kha; tamo khe bo khorok thamrok swk le wng li ya.

²⁰Kabjilo tongnai Jehoiadani bwsla Benaia tei khoroksa phan gwnang sengkrak, bo kwbángma kirima kwrwi khe samung tang kha, bo Moabni phan gwnang khorok nwino buthar kha. Tei bo siyari klaima jora-o thángwi hakhoro singho masa buthar kha.

²¹Bo chwla naithok Ijipni borok khoroksano buthar kha. Bo yago olonga tẃijak, Benaia khe raidang tẃijak, bo Ijipsani yakni olonga segwi naui abo bai’-no bono buthar kha.

²²Jehoiadani bwsla Benaia abo hairok kiri ya samung tang kha tei bo khorok thamchirokni bisingo bo’-bo khoroksa mung man kha.

²³Bo khorok thamchirokni bisingo khoroksa phan gwnang, hwn ba khorokthamrok hai le wng súk man ya. Daud bono bini sak mwrwknai snam kha.

²⁴Khorokthamchirokni bere Asahelni takhuk Joab; bisingo khoroksa; Betlehemo tongnai Dodoni bwsla Elhanan;

²⁵Harodo tongnai Sama bai Elika,

²⁶Paltisa Helej, Tekoa tongnai Ikesni bwsla Ira.

²⁷Anathoto tongnai Abiejer, Husathi-o tongnai Mebunai.

²⁸Ahoto tongnai Salmon, Netopha-o tongnai Maharai,

²⁹Netophani Banani, bwsla Heleb, Benjamin bosongni, Gibea-o tongnai Ribaini bwsla Itai.

³⁰Pirathono tongnai Benaia, Gas twi rukungo tongnai Hidai,

³¹Arabathito tongnai Abi-albon, Bahurimni Asmabet.

³²Salbono tongnai Eliaba, Jasenni bwsla Jonathan,

³³Hararisa Sama, Hararisa Sararni bwsla Ahiam.

³⁴Makani Ahajbaini bwsla Eliphelet, Gilo tongnai Ahithophelni bwsla Eliam.

³⁵Karmelo tongnai Hesro, Arbato tongnai Parai,

³⁶Joba-o tongnai Nathanni bwsla Igal, Gado tongnai Bani,

³⁷Ammonsa Selek, Biroto tongnai Naharai, Joabni da-seng tẃinai Jeruiani bwsla,

³⁸Ithri-o tongnai Ira bai Gareb,

³⁹Hitisa Uria; bebagwi khe khorok thamchisni Sengkrak.