Read Kok Borok 2 SAMUEL 3 Bible Online

2 SAMUEL 3 - Kok Borok bible

2 SAMUEL 3

¹Solni bororok bai Daudni bororok choba nang laimani sal kwdwkma wng kha. Daud khe phankrak wng rwk-wng rwk wng kha tei Sol khe kebel wngwi khár rwk khár rwk wng kha.

²Hebrono achainai Daudni bwslasong wng kha: Bwsla okra Amnon; bo wng kha Jejrilni Ahinoamni ogo achai-o;

³Aboni kusu khe Kilieb, bo wng khe Karmelni Nabalni bihik randijwk Abigailni ogo achai-o, aboni kusu khe Absalom, bo khe Gesurni habugra Talmaini bwsajwk Makani ogo achai-o;

⁴aboni kusu khe Adonija, bo khe Hagitni ogo achai-o, aboni kusu khe Sephatia, bo khe Abitalni ogo achai-o.

⁵Khorokbani ulni bwsla khe Ithream; bo khe Daudni bihik Eglani ogo achai-o. Bórok bebak’-no Daudni núkhungo Hebrono achai bai-o.

⁶Solni borok bai Daudni bororok choba nang lai tong kha, Abner Solni sengkrakrokni bisingo phankrak wngwi phai rwrwgo.

⁷Aiani bwsajwk Rijpa hwnwi Solni bihik kotoi tongo, Isboset Solni bwsla Abnerno hai hwnwi sa kha, “Nwng tamni bagwi ani aphani bihik kotoi bai thulai-chálai ma wng?”

⁸Hakhe Abner Isbosetni kók khnaui belai jolijagwi hai hwnwi sa kha, “Ang ba ha Judiani sẃini bokhorok da? Ang tini jora nwpha Sol, nini takhukrok tei nikichingsongni mwkhang narwgwi se tongo tei ang nono Daudni yago bo yapharwi rw li ya. Hai phano se tini nwng ano a bwrwi bai dera laima nugwi tong!

⁹Kaitor Abnerno aswkno khlai thung teibo bára phano khlai thung ang tumungno Daud ano samung khlaina rwmano khlai pái ya hwn khe Subraiyung ano majra rw thung.

¹⁰Habugra Solni hano sláiwi tei Daudni bagwi Israil bai Judani saka-o Danni simi Birseba jora achukthayung songchanai.”

¹¹Isboset Abnerno kók tháisa phano sa rak li ya tamni hwn khe bo bono belai khe kirijak kha.

¹²Abner Hebrono[4] Daudni thani borok rohorwi ahai hwnwi sa rohor kha, “O ha-o sabo habugra chánai? ano kók rw di, ang bebak Israilno nini yago yapharna bagwi chubanai.”

¹³Hakhe bo hai hwnwi sa kha, “Belai ham kha, hai phano ang nono kók rwma-o nini thani kaisa kók tongo, nwng Solni bwsajwk Mikalno ani thani tubu ya sak nwng ang bai mwkhang ta nukjak phai di.”

¹⁴Hakhe Daud Solni bwsla Isbosetni thani bo borok rohorwi hai hwnwi sa hor kha, “Ani hik Mikalno ano rw di, ang bini bagwi Philistiasarokni khorok sarani sakur raui yaphar kha.”

¹⁵Hakhe borok rohorwi Isboset Mikalno bini bwsai Laisni bwsla Paltielni yakni tubu kha.

¹⁶Tamo khe bini bwsai bini bihikni logi kap twtwi Bahurim kamikotor jora tháng kha. Hakhe Abner bono, “Nogo kiphilwi tháng si di,” hwnwi sa kha. Hakhe bo kiphilwi tháng kha.

¹⁷Abner Israilni tẃiphangrokni thani thángwi hai hwnwi saui kha, “Norok Daudno habugra chá rwnani nai laimani.

¹⁸Abo tabuk se jora wng kha, Subraiyung Daudni thani swmai tangmani. Ani seleng Daudni yak tẃi se ani Israil bororokno Philistiasarokni yakni phiyóknai tei bebak borokni arirokni yakni phiyóknai.”

¹⁹Tei Abnerbo Benjaminsarokno sa kha; tei Abnerbo Daudno sanani bagwi Hebrono tháng kha, bebak Israilrokni bai bebak Benjaminrokni bagwi tamo khlai khe kaham wngnai?

²⁰Hakhe Abner Daudni thani borok khorok nwichirokno tubu-ui Hebrono phai khe Daud bórokni bagwi chámung panda khlai kha.

²¹Abner Daudno hai hwnwi sa kha, “Ang tabuk thángwi bebak Israilrokno thumnai, hakhe bórok nono habugra chá rwnai nini bwkha muchung tẃi’-no nwng khlaiwi mannai.” Hakhe Daud Abnerno kaham kwrwng khe rohor kha.

²²Aboni ulo Joab bai tei Daudni selengrok segwi tubumani kwbángma manwirok tubu laiwi kiphil lai kha. Abner aphuru khe Hebrono Daud bai kwrwi kha tamni hwn ba Daud bono kwchang kwchang khe kiphil rwui rohor kha.

²³Joab bai tei bebak sengkrakrok sók phai khe, Nerni bwsla Abner habugrani thani phai kha tei habugra bono kaham kwrwng khe rwui rohor kha hwnwi khna kha.

²⁴Hakhe Joab habugrani thani thángwi, “Nwng tamo khlai kha?” hwnwi sa kha. Abner nini thani phaiwi suda se bono kaham kwrwng khe se yakarwi rohoro si-o.

²⁵Nwng saui mano, Abner nono bandinani se phaimani, nwng aswk tangmarok tei nini tháng-phaino naichomnani se phai-o.

²⁶Joab Daudni aroni phaiwi Abnerni thani borok rohor kha, bórok bono Sira twikhorni kiphil rwui tubu kha, phiya ba abono Daud mungsa phano saui man ya.

²⁷Abner Hebrono sók phai khe, Joab bono tepsa khe kók sana naima hai khe duglamni kisa kotono tlangwi bono bohogo yórwi buthar kha, bini takhuk Asahelno butharmani bagwi abo hai khlaijak kha.

²⁸Ulo Daud abono khna khe, hai hwnwi sa kha, “Ang bai ani bororok Nerni bwsla Abnerno butharmani mungsa cha ya kwrwi hwnwi Subraiyung saui mano.”

²⁹Aboni swraimung Joabni saka-o, bini núkhungo sók phai thung tei bini bosongo, khoroksa swk bemuk hamya, biyadi bemuk, manjak thung tei bwrwini samung tangnani simi chúknai wng thung tei choba-o butharjak thung tei chánani biyalbo wng thung.

³⁰Hakhe Joab bai bini takhuk Abisai, Abnerno buthar kha, tamni hwn ba bórokni takhuk Asahelno Gibeonni choba-o butharo.

³¹Hakhe Daud Joab tei bini bororokno bórokni rí sichigwi rí soroi kan rwui Abnerni bagwi khá khamnani dagi kha. Habugra Daud baithangbo tolai uklogo rwkthar kha.

³²Bórok Abnerno Hebrono phob lai kha, bini mangkhoro habugra chirigwi kap kha tei bebak bororokbo kap lai kha.

³³Daud Abnerni bagwi khá khamwi abo hai khe kap kha, “Tamni Abner ba butuarok hai khe ma thwi kha?”

³⁴Nini yakungrok khajak ya, nini yakrokbo khajak ya, borok cha yarokni yago butharjakmani hai khe ba ma thwi kha. Bebak bororok hai’-no hai bini bagwi kap lai phi kha.

³⁵Hakhe bebak bororok sal tongsani Daudno chá rwna nai lai kha, hai phano bo swmai tangwi hai hwnwi sa kha, “Sal tháng ya sini ang mungsa swk chá khe Kaitor ano aboni slái bára majra rw thung.”

³⁶Bebak bororok abono nuk kha tei habugra khlaimani abono bororok khá bai chajak lai kha.

³⁷Bebak bororok tei Israilrok Nerni bwsla Abnerno buthar thani habugrani mungsa yak kwrwi hwnwi saui man kha.

³⁸Hakhe habugra bini selengrokno, “Tini Israilo khoroksa tẃiphang kotor thwimani saui ma de man?” hwnwi sẃng kha.

³⁹Ang Kaitor bai chongjak habugra phano belai phan kwrwi hai ma tong kha. Jeruani bwslasong belai phan gwnang, samung hamya tangnairokno Subraiyung majra rw thung.