Read Kok Borok 2 SAMUEL 6 Bible Online

2 SAMUEL 6 - Kok Borok bible

2 SAMUEL 6

¹Tei uáisa Daud Israilni saiwi najak khorok 30,000 bororokno thum kha.

²Hakhe Daud bini bebak bororokno tẃi Subraiyung Kaitorni swmai bokhokno naharna bagwi Balejuda-o[8] tháng kha; bini mung Phan gwnang Kaitor, bwkrang gwnangrokni[9] saka-o achukthayungo achukjak.

³Hakhe bórok hathái saka Abinadabni nok bisingni Kaitorni swmai bokhokno kariui kwtal musuk malkhung saka-o ton kha. Abinadabni bwslasong khoroknwi Uja bai Ahio malkhung kwtalno’-no mal rwui tlang kha.

⁴Malkhung bai khe Kaitorni swmai khokno tẃiwi. Ahio swkang swkang tháng kha.

⁵Daud bebak Israil bororok Subraiyungni bwskango tongthogwi rwchabwi mwsa lai kha. Bórok chongpreng, sumui, kham, cheuang, dangdurok tam lai kha.

⁶Bórok Nakonni gom nakma kainok jora phaiwi sók phai khe a musuk yakung thutai kha hakhe Uja Kaitorni Swmai Bokhokno rom kha.

⁷Hakhe Subraiyung belai khe Ujano jolijak kha; Kaitor bono arono buthar kha, tamni hwn ba bo swmai bokhokno tang kha; tei bo Kaitorni swmai bokhok gana’-ono thwi kha.

⁸Daud jolijak kha tamni hwn ba Subraiyung Ujano buthar kha; hakhe abono tabuksak jora Peres-uja[10] hwnjago.

⁹Daud a salo Subraiyungno kirijagwi hai hwnwi sa kha, “Bahai khe ang swmai bokhokno tlangwi man sinai?”

¹⁰Hakhe Daud bini kamiyung Jerusalemo swmai bokhokno tlangna muchung li ya, tamo khe Daud lama phér rwui Gitisa Obed-Idomni nogo tonwi kha.

¹¹Gitisa Obed-Idomni núkhungo nokha taltham Subraiyungni Swmai Bokhok tonwi khe tei Subraiyung Obed-Idom bai bini núkhungno hamari rw kha.

¹²Hakhe habugra Daudno sajak kha, Subraiyungni swmai bokhok tongmani bagwi Obed-Idom bai bini núkhungni tong kwrwi bebakno hamari man kha, hakhe Daud belai tongthokjagwi Obed-Idomni nokni swmai bokhokno thángwi tubu kha.

¹³Subraini swmai bokhokno tẃinairok yakam dok swkang tháng kha, hakhe bo musuk masa tei kuphung musuk bwsa masa ratharwi yaphar kha.

¹⁴Daud chango rí bwsate kanwi Subraiyungni bwskango jai kheno mwsa kha.

¹⁵Hakhe Daud tei Israil bororok chirikhógwi bokorong sup laiwi Subraiyungni swmai bokhokno Jerusalem o tubu lai kha.

¹⁶Subraiyungni swmai bokhok Jerusalemo tubu phuru Daud tongthokjagwi bársaui mwsaui tongnaino Solni bwsajwk Mikal tailamo tong twtwi nuhur kha. Hakhe bono khá-o mokol peng ya khe nuk kha.

¹⁷Hakhe bórok swmai bokhokno tubu-ui ríni nok bisingo Daud snammani-o abono ton kha. Hakhe Daud Subraiyungni thani sógwi yapharmung tei kwthamungni yapharmungrok yaphar kha.

¹⁸Bo sógwi yaphar mungrok tei kwthamungni yapharmung yapharwi pái bai khe, bo bororokno phan gwnang Subraiyungni mung bai hamari rw kha.

¹⁹Bo chámung bak kha, Israilni chwla-bwrwi thwgwi’-no auang belep lepsa, muihan phonsa,[11] angur kwranni auan rw kha. Aboni yagulo bebak borok sak sakni nogo kiphilwi tháng bai kha.

²⁰Daud bini núkhungni bororokno hamari rwnani kiphil phai kha. Aphuru Solni bwsajwk Mikal nongkhorwi phaiwi hai hwnwi sa kha, “Bahai khe Israilni habugra, bini selengjwkrokni bwskango kobor hai rí kan ya khe phunugui sak sakno bórom khlai mannai.”

²¹Tei Daud Mikalno hai hwnwi sa kha, “Nini nwpha tei bini núkhungni saka-o, Israilni saka-o Subraiyungni bororokni saka-o, nwphani achukthai-o ano tangphang chong kha, haini bagwi Subraiyungni bororok bai ang Subraiyungni bwskango mwsa-o.”

²²Hai phano ang aboni slái teibo se khlai kuknai. Nwng[12] ano mungsa chúk ya hwnwi chong phano, nwng samani a selengjwkrok khe ano teibo se bórom khlainai.

²³Tei Solni bwsajwk Mikal thwi yasak’-no bwsa khoroksa phano man lang li ya.