Read Kok Borok 2 SAMUEL 8 Bible Online

2 SAMUEL 8 - Kok Borok bible

2 SAMUEL 8

¹Aboni ulo Daud Philistiasarokno mechenwi bórokni yakni Metheg-ammano segwi na kha.

²Hakhe bo Moabrokno mechen khe, bórokno berem khlainai ha-o roko rwui sú kha, remnwino khe butharna bagwi tei remsa kájakno khe narwkna bagwi ton kha. Hakhe Moabsong Daudni selengrok wngwi bini bagwi hili tubu lai kha.

³Daud Jobani habugra Rehobni bwsla Hadadejerno bo Uphratis twima amchoino kiphilwi nanani tháng phuru Daud bono mechen kha.

⁴Bini korai kasanai sengkrak khorok 1,700 tei khorok 20,000 yakung bai himnai sengkrakrokno Daud kasu-ui rom kha. Daud mak 100 korai malkhungni bagwi nangmani jora korai narwgwi teirokno khe yathek yastwng rasu-ui rw kha.

⁵Damaskoso tong bainai Siriyani bororok habugra Hadadejerno chubanani phai khe. Daud bórokno kasu-ui khorok nwichinwisai Siriyarokno buthar kha.

⁶Hakhe Daud Damaskosni Aramo batham khlai kha tei Siriyarok Daudni seleng wngwi bini bagwi hilirok tubu kha. Subraiyung Daudno bo tháng thani kwplai khlai kha.

⁷Daud Hadadejerni selengrokni rangchakni phuirokno segwi naui Jerusalemo tubu kha.

⁸Tei Hadadejerni kamiyung Beta, Berothaini kwbángma pitolrokno Daud na kha.

⁹Hamatni habugra Toi, Hadadejerni bebak sengkrakrokno Daud mechen bai kha hwnwi khna khe,

¹⁰Daud Hadadejerno mechenmani bagwi Toi bini bwsla Joramno habugrani thani bwkha kaham rwnani rohor kha. Tamni hwn ba Hadadejer jora jora-o Toi bai choba nang lai-o. Joram Daudni bagwi rangchak, rukphai tei pitolni hili tubu kha.

¹¹Habugra Daudbo dopharokno mechenwi manmani rangchak, rukphainobo abórok bai baksa Subraiyungni thani yaphar kha,

¹²abórok wng kha Idomni, Moabni, Ammonsarokni, Philistiani, Amalekni tei Rehobni bwsla Jobani habugra Hadadejerni thani namani manwirok.

¹³Sóm harungo khorok chicharsai Idomsarokno butharwi kiphil khe, Daudni mung teibo kotor wng kha.

¹⁴Idom ha thwgwi bo sengkrakrokni batham khaui rw kha. Bebak Idomni bororok bini seleng wng bai kha. Subraiyung Daud tháng thani’-ono bono kwplai khlai kha.

¹⁵Hakhe Daud bebak Israilono habugra chá kha tei bini bororokno bujsói tei baksa khe samung khlai kha.

¹⁶Jeruiani bwsla Joab khe sengkrakrokni bokhorok, Ahiludni bwsla Jihosapat khe swiwi narwknai;

¹⁷Ahitubni bwsla Sadok tei Abiatharni bwsla Ahimelek khe ochairok; Seraia khe tangphang,

¹⁸Jehoiadani bwsla Benaia khe ha Keritsa bai ha Pelethisano nainai tei Daudni bwsarok khe ba ochairok.