Read Kok Borok 2 SAMUEL 9 Bible Online

2 SAMUEL 9 - Kok Borok bible

2 SAMUEL 9

¹Aboni yagulo Daud, “Jonathanni bagwi ang khoroksa swkno khairoknani, Solni núkhungo borok khoroksa swk de tong rwkjak tong?” hwnwi sẃng kha.

²Tabuk aro Solni seleng khoroksa tongo bini mung khe Seba, bórok bono Daudni thani ringwi tubujak kha. Hakhe habugra bono, “Nwng Seba de?” hwnwi sẃng kha. Bo hai hwnwi sa kha, “I’n ang nini selengno.”

³Hakhe habugra hai hwnwi sẃng kha, “Ang Kaitorni khairokmung phunugui manna bagwi Solni núkhungo khoroksa swk borok to de tong kho?” Hakhe Seba, “Jonathanni bwsla khoroksa tong kho, bo yakung man ya,” hwnwi sa kha.

⁴Habugra bono, “Bo buro tong?” hwnwi sẃng kha. Seba habugrano sa kha, “Bo Lodebar o tongnai Amielni bwsla Makirni nogo se tongo.”

⁵Hakhe habugra Daud bono Lodebarni Amielni bwsla Makirni borok rohor tẃi aroni na rohor kha.

⁶Hakhe Solni bwsla Jonathan, Jonathanni bwsla Mephiboset Daudni bwskang sók phai kha tei bono pwtapsa khe klaiwi khulum kha. Hakhe Daud, “Mephiboset” hwnwi sa khe bo “I’n ang nini selengno” hwnwi sa kha.

⁷Tei Daud bono hai hwnwi sa kha, “Ta kiri di nini nwpha Jonathanni bagwi ang nono khairoknai, nini chuchu Solni bebak hano ang kiphilwi rw phinai tei nwng ang bai sal brúm pal khe máng ma chánai.”

⁸Hakhe bo khulumui, “Ang nini seleng sẃi kwthwi hai borokno nwng tamni aswk khairokthai?” hwnwi sa kha.

⁹Hakhe habugra Solni seleng Sebano ringwi hai hwnwi sa kha, “Ang nini bugra Sol bai bini núkhungni tong kwrwi bebakno nini bugrani bwslano rw kha.”

¹⁰Nwng nini bwsarok tei nini selengrok nini bugra Solni núkhungni bagwi haba ma khlainai, nini bugrani bwsarokni chámungni bagwi chámung manna tẃi khe tei aboni bwthái ma tubunai, phiya Mephiboset khe sal brúm ang bai máng pal chánai. Sebani bwsla takhuk khorok chiba tei selengrok khe khorok nwichi tongo.

¹¹Hakhe Seba habugrano, “Habugra dagima haino nini seleng khlainai,” hwnwi sa kha. Habugrani khoroksa bwsla hai kheno Mephiboset Daud bai pal chá kha.

¹²Mephibosetni bwsla chwrai khoroksa tongo bini mung khe Mika. Tei Sebani nogo tongnairok bebakno Mephibosetni seleng wng bai kha.

¹³Hakhe Mephiboset Jerusalemo tongwi sal brúm’-no habugra bai khe máng pal chá-o. Bini yakung kongnwino kompa.