Read Kok Borok 1 HABUGRA 1 Bible Online

1 HABUGRA 1 - Kok Borok bible

1 HABUGRA 1

¹Bugra Daud chakra súk wng khe bini selengrok bono rwjai bai dului phano bini bwsak kwchangmano yók rwui man li ya.

²Hakhe bini selengrok bono hai hwnwi sa kha, “O bugra, chwng nini bagwi bwrwi sikla khoroksa nono naikini khlainani tei nwng bai thunani bagwi naituk si anw hakhe kisa túng-túng khe thu-ui man anw.”

³Hakhe bórok Israilni amchoi gwnangwi buro bwrwi sikla naithok khoroksa manno hwnwi naituk lai kha, ulo khe bórok Abisag hwnwi Sunemo bwrwi khoroksano man kha, hakhe bono habugrani thani tubu lai kha.

⁴Bo belai bwrwi naithok, bo bugrano naikini khlai kha tei mon kha, hai phano bugra bini sak tang li ya.

⁵Tabuk khe Hagitni bwsla Adonija sak sakno kuchugo tisaui, “Ang habugra wngnai,” hwnwi sa kha, hakhe bini korai malkhungrok tei aboni bagwi borok tiyar khlai kha, phiya bini bwskang bwskang himna bagwi khorok bachi bororokno tiyar khlai kha.

⁶Bupha bono uáisa phano, “Nwng tamoni bagwi omo hai samung khlai lang?” hwnwi saui khá hamya khlai ya kho. Bo chwla naithok; bo Absalomni slái ulo se achai-o.

⁷Bo Joab bai kók sa lai kha (bini buma wng kha Jeruia) tei ochai Abiathar baibo kók sa lai kha bórok bini bagwi bachanani kók rw lai kha.

⁸Tamo khe ochai Sadok, Jehoiadani bwsla Benaia diyari Nathan, Simei tei Rei, Daudno mwrwknai sengkrakrok Adonijani bwkhak ya.

⁹Salsa Adonija, mera, musuk chwla tei kuphung musuk bwsa masa Enrogel twisa ganani Johelet hathái-o ratharwi yaphar kha. Bo bugra Daudno tei bwsaroknobo, ha Judani habugrani tangphangroknobo bini a ratharma panda-o phai di hwnwi kobok kha.

¹⁰Tamo khe bo bini takhuk Solomon tei diyari Nathanno, Benaiano tei bugrano mwrwknai sengkrakrokno khe kobok li ya.

¹¹Hakhe Nathan Solomonni buma Batsebano thángwi hai hwnwi sẃngwi kha, “Tamo nwng Hagitni bwsla Adonija saichung sak bugra chá kha hwnmano khna ya da? Bugra Daudbo o kókno kisabo saui man ya!

¹²Tumungno nwng sakno tei nwsla Solomonno mwthangna muchung khe ani kókbiti khna di,

¹³tabukno nwng bugra Daudni thani thángwi saui di, ‘O bugra nwng ba nini ulo khe ani sajla Solomon se bugra chánai hwnwi tamo kwrak khe ano kók rw ya diba? Hakhe bahai khe Adonija habugra chá lang sla?’

¹⁴Hakhe Nathan sa phi kha, ‘Bugra Daud bai kók sa laiwi tong phuru khe ang phai anw tei nini a kók samano jora rw chru rw phai anw.’ ”

¹⁵Hakhe Batseba bugra bai malaina bagwi bini thuma nogo tháng kha. Bo belai chakra wng kha, Sunamjwk Abisag bono naikini khlaiwi tongo.

¹⁶Batseba bugrani thani bokhorok bomson kha tei bugra bono, “Nwng tamo nai?” Hwnwi sẃng kha.

¹⁷Batseba hai hwnwi sa kha, “O bugra, nwng nini Subraiyung Kaitorni mungwi ani thani kwrak khe, ‘Nini ulo khe Solomon bugra chánai tei bo ani achukthayungo achuknai’ hwnwi swmai tang kha.

¹⁸Yang le Adonija se bugra cháui tong kha, nwng le omono kisa phano se saui man ya.

¹⁹Bo kwbángma musukrok, merarok tei musuk bwsa kuphungrok, ratharwi bo nwsarokno kobok kha, ochai Abiatharno, sengkrakphang Joabno panda-o kobok kha, tamo khe nwsla Solomonno khe kobok li ya.

²⁰Bugra, Israilni bebak bororok nini thani khnana hwnwi naisingwi tong lai kha, nini ulo khe sabo chini bagwi bugra chánai?

²¹Nwng siring siring tong khe, nwng thwi khe’-no bo ano tei Solomonno le haino se thwng sinai.”

²²Diyari Nathan sók phai phuru Batseba khe kók se sa laiwi tong kho.

²³Nathan phaimano bugrano sajak khe bo bugrani thani bokhorok bom kha.

²⁴Hakhe Nathan hai hwnwi sa kha, “O bugra nwngba tamo Adonijano da bugra chánai hwnwi sakhlai?

²⁵Tini’-no bórok mera kwbángma tei musuk kwbángma, phiya musuk bwsa kuphungrok kwbángma ratharwi yaphar kha tei bo nini bebak bwsarokno nini sengkrakphang Joabno tei ochai Abiatharno kobok kha, tabuk bórok bo bai chá lai nung lai wng laiwi tong lai-o tei ‘Bugra Adonijani umor kolok wng thung!’ hwnwi chirik lai kha.

²⁶Tamo khe bo ochai Sadokno, Beniano, Solomonno tei ano kobok li ya.

²⁷O bugra omorokno nwng cha da chajak tei nwng nini tangphangroknobo sa ya sabo nini ulo bugra chánai?”

²⁸Bugra Daud, “Batsebano hap phai phi di hwnwi ringhor di,” hwnwi sa kha. Hakhe bo phaiwi bini bwskango bacha phai kha.

²⁹Hakhe bo Batsebano hai hwnwi sa kha, “Tong keseprokni ano kati rwnai Subraiyung kwthangni mungwi ang swmai tangwi sa-o,

³⁰Israilni Kaitor Subraiyungni mungwi ang nini thani nini nwsla Solomon bugra chánai hwnwi kók rwmano ang tini khlai sinai.”

³¹Batseba bokhorok bomwi hai hwnwi sa kha, “O ani bugra Daud kwthang tong phlai thung.”

³²Hakhe bugra Daud Sadok, Nathan tei Beniano naharna bagwi borok rohor kha, bórok sók phai khe’-no,

³³bo bórokno hai hwnwi sa kha, “Ani nogo samung tangnairokno norok bai tẃi di: Solomonno ani korai bwsa-o ka rwui di tei bwskango sengkrakrokno tẃiwi Gihon twisa bwkhak tẃi di;

³⁴aro se Sadok tei Nathan bono Israilni bugra ma chongnai. Aphuru khe totro tam di chirikhógwi hai hwnwi sa lai di, ‘Bugra Solomon kwthang tong phlai di!’

³⁵Hakhe bono oro kiphilwi tubu-ui phai di, oro bo ani achukthayungo ma achuknai. Bo se ani yakchu-o bugra wngnai, tamni hwn ba bono se ang Israilni tei Judaini bugra wngna bagwi chongo.”

³⁶“ ‘Abo khlaijaknai,’ hwnwi Benaia sa kha tei nini Subraiyung Kaitor abono cha rw thung hwn kha.

³⁷Subraiyung nwng bai tong tẃino bo Solomon baibo haino tong thung, bini bugra cháma jorani slái phano jolma jolsa wng thung.”

³⁸Hakhe Sadok ochai, Nathan diyari, Jehoiadani bwsla Benaia, Keritsa tei Pelethisarok thángwi Solomonno habugra Daudni koraichirka-o kasa rwui Gihono tlangwi tháng lai kha.

³⁹Hakhe ochai Sadok Subraiyungni bwskango tonma olibni thok khurino na kha tei Solomonno phulwi rw kha. Bórok totro tam lai kha tei bebak bororok hai hwnwi chirikhók lai kha, “Bugra Solomonni umor lok thung!”

⁴⁰Hakhe bórok bebakno bini ulo rwkthar laiwi phai lai kha tei tongthogwi chirikhók lai kha, sumui tam lai kha tei khorang bai ha kwlwi bai kha.

⁴¹Adonija bini nograirok cháma pái twtwi wng khe bórok kutukma khorang khna kha. Joab totro khorang khna khe’-no hai hwnwi sẃng kha, “Tamo abo kamiyungo aswk kutuk lai, abo tamo wngma klai kha?”

⁴²Bo kók sa bai ya sini’-no ochai Abiatharni bwsla Jonathan phai kha; hakhe Adonija hai hwnwi sa kha, “Bisingo hap phai di, nwng chúkjak borokba kóktma kahamno tubu-ui phai khna.”

⁴³Jonathan hai hwnwi sa kha, “Ahai ya, bugra Daud Solomonno bugra chá rw kha;

⁴⁴habugra bini logi Sadok ochai, Nathan diyari tei Benaiani bwsla Jehoiada, Keritsa tei Pelethisarok habugrani koraichirka-o khe kasa rwui rohor kha.

⁴⁵Ochai Sadok tei Nathan diyari Gihon twisa-o bono bugra chong kha. Hakhe bórok kamiyungo tháng kha tei tongthogwi chirik laiwi tong kha, bororok tabuk uphla-káphla nangjak, bini khorangno norok tabuk khnaui tongo.

⁴⁶Tabuk Solomon habugrani achukthayungo achuk kha.

⁴⁷Tei bebak bugrani tangphangrok, bugra Daudno bórom phunukna bagwi tháng lai kha tei hai hwnwi sa lai kha, ‘Nini Kaitor Solomonni mungno nini slái’-bo kuchuk khlai thung tei bo bugra cháma jora-o teibo nini slái jolma jolsa wng thung.’ Hakhe bugra Daud bini thuyamo tongwi’-no bomwi khulum kha

⁴⁸tei hai hwnwi suriui sa kha, ‘Israilni Kaitor Subraiyungno lob di, bo tini ani bosongni khoroksano ani ulo bugra chá rw kha tei ano abono nuk rwna bagwi mwthangwi ton kha.’ ”

⁴⁹Hakhe Adonijani nograirok kirijak lai kha, hakhe bórok bebakno bachaui tháng bai kha.

⁵⁰Adonija belai khe Solomonno kirijagwi Subraiyungni ríni nogo habwi kha tei Subraiyungni háyáni busu[1] kaisa bwkhak romwi tongwi kha.

⁵¹Aphuru Solomonno sa phai kha, Adonija bono kirijak kha tei Subraiyungni háyá buchuk romwi hai hwnwi sa kha, “Ang nai-o bo ano buthar ya hwnwi sa thung.”

⁵²Solomon hai hwnwi sa kha, “Bo kubui hwn khe bini khorokni bwkhnai twngsabo tangjak glak; tamo khe bo kubui ya hwn khe bo thwinai.”

⁵³Bugra Solomon, Adonijano Subraiyungni háyáni tikhlaiwi tubunani borok rohor kha. Adonija bugrani thani thángwi bomwi khulumui kha; hakhe bono bugra hai hwnwi hwn kha, “Nwng nogo tháng si di.”