Read Kok Borok 1 HABUGRA 10 Bible Online

1 HABUGRA 10 - Kok Borok bible

1 HABUGRA 10

¹Sebani Isiri Solomonni mung kahamno khna kha, hakhe bo Jerusalemo thángwi bono kók kuthuk kuthuk sẃngwi amjogwi kha,

²bo bai baksa borok kwbángma tlang thángo tei mangingango khe boksaui moslarok, holong morokrok tei kwbángma rangchak tlango. Isiri Solomon bai malai kheno bo bebak uansugwi mansakno, sẃngna muchung tẃino sẃng kha;

³Solomonbo bebak sẃngmano saui khna rw kha, bo a sẃngmarokno swbai sana kisabo tukjak ya.

⁴Sebani Isiri Solomonni simungno khna kha tei bo noyung tangmanobo nuk kha.

⁵Bo bini bagwi chámung rwmarok nuk kha tei bini naikini khlainairokni tongma nokrok nuk kha, bini samung tangnairok bahai khe chapjak tei bórokni kanmungrokno nuk kha tei bini selengrok bini chámano naisingma tei bo noktharo ratharmung yapharmano nuk kha. Abo nugwi bo hama phaijak li ya tei kwmam kha.

⁶Bo habugra Solomonno hai hwnwi sa kha, “Ang ani ha-o tong twtwi nini kók khnamani nini simungrok kubuino;

⁷tamo khe ang phaiwi mokol baithang nuk yaui poito khlaiwi man ya wngwi tongmani ang aboni kosa phano se khna ya; nini simung tei nini rang rírok ang sajakmani sláibo báng kugo.

⁸Nini hiksong[15] bo tei nini selengrokbo bwswk se hamchajak, bórok sal brúm’-no nini bwskango tongwi nini simungni kókrok khnanani lama manẃi tong lai-o!

⁹Nini Subraiyung Kaitorno lobo; bo nono Israilni bugra khlaiwi nono bwswk se hamjagwi phunuk kha. Tamni hwn ba bo Israilno hamjakma abo pái phlai yani bagwi se. Bo nono bórokni bugra khlaima khe nwng kaham khe buj kubui bai naikini khlaina bagwi se khlai-o.”

¹⁰Bo bugra Solomonno rwna hwnwi tubuma hilirokno rw kha, kilo brwisaini slái kwbáng rangchak tei kwbángma mosla tei holong kahamrok rw kha. Bo rwjakma mosla aswk kwbáng aboni slái kwbáng bo uáisabo man ya kho.

¹¹Hiramni rungtorrok Ophirni rangchakrok tei junipar buphang tubumani tei holong morokrok tubu-o.

¹²Solomon a buphangrok bai noktharni yaktwkrok tei tam kwrwngrokni bagwi tamjaknai manwi, chongprengrok, sarindarok snam kha, abono Israilo tubuma junipar buphangrokni bisingo kaham kuk; abo hai tabukbo tei nuk phi ya kho.

¹³Bugra Solomon, Sebani Isiri sanma tẃi’-no rw kha, hili rwmungni raidani bára bo bono yak kuar khe rw kha, hakhe bo bini bororokno tẃiwi bini ha-o kiphilwi tháng kha.

¹⁴Bisi brúmno bugra Solomon bepar khlainairok bai teksni yagulo sekel 66 rangchak rwjago.

¹⁵Ha Arabni bugrarok bai tei Israil angkorni tẃiphangrok bai phalwi ajimani yagulo bo teks rwjago.

¹⁶Solomon rangchak togwi lapnwira kotor kotor khe phui snam kha; kaisa kaisa phui kotoro kilo 7 ká twtwi rangchak bai khopjak.

¹⁷Bo lap thamra phui snam kha; kaisa kaisa-o kilo kwnwi ká twtwi rangchak bai khopjak. Bo a phuirokno Lebanonni bolongni noyungo tonwi kha.

¹⁸Bo achukthayungbo khungsa kotor khe tan rw kha. Aboni khaksa khe mayung bua bai khopjak tei bára khe rangchak kaham bai khe khopjak.

¹⁹Achukthayungni yakhili kaidok achukthayungni uklogo khe musuk bwsani bokhorok tei babainwino yaktwk gwnang tei a yaktwk kongnwini bachingo khe singho maknwi bacha laijak.

²⁰Phiya a yakhili kaidokni bebak buchuk buchugo khe mak chiknwi singho bachajak. Abono kosol khe kaisa ha-o phano snamjak ya kho.

²¹Solomonni nungjaknai khurirok bebak’-no rangchakni máng snamjak tei Lebanon bolongni a noyungni mairang-lotarok bebak’-no rangchak kahamni máng snamjak. Solomonni jora-o rukphai kwlai ba rukphaino samungo phnangjak ya.

²²Bini twijlango chokjaknai rungtorbo tongo abo Hiramni rungtor bai khe thángo. Bisiktham brúm’-no bini rungtor rangchak, rukphai, mayung bua, mwkhrarok tei tokraithairok[16] tubu-ui phai-o.

²³Bugra Solomon wng kha hayungni kubun bugrarokni slái gwnang kuk tei sinai kuk tongmani

²⁴tei ha gwnangwini bororok bini thani phaiwi, Kaitor bono si rwmani kókno khnana bagwi phaina muchungjago.

²⁵Phainairok rukphai, rangchak, rírok, aitalrok, bakhorrok, korairok tei koraichirkarok tubu-ui phai-o. Abo hai máng bisi brúm wngwi tong kha.

²⁶Solomon sengkrak bodol khe aboni bisingo. Malkhung khung 1,400 tei chobani bagwi mak 12,000 korai, aboni bisingo baksa khe Jerusalemo tono tei bárano kubun kamiyungrogo tono.

²⁷Bini a jora-o rukphai wng kha Jerusalemo haino holongthai se tei sidar buphangbo haino khwichang buphang hai se kwbángma manthogo.

²⁸Solomon ha Ijip tei Kueni korairok tubu-o tei Kueni habugrarokni bepar thwngnairok khe aboni rangrok mano.

²⁹Bórok Hitisa bai Siriyani bugrarokno korai tei malkhung rohoro, khungsa khungsa malkhung rukphai budul 600 khe tei korairokno khe masa 150 rukphai budul bai phalo.