Read Kok Borok 1 HABUGRA 11 Bible Online

1 HABUGRA 11 - Kok Borok bible

1 HABUGRA 11

¹Solomon buini hani kwbángma bwrwirokno hamjak kha, aboni logi Pharaoni bwsajwkbo tongo: Moabsa, Ammonsa, Idomsa, Sidonsa tei Hitisa bwrwirok.

²Subraiyung Israilni bororokno abórok bai gwdalwi ta káijak di hwnwi dagimano khna yaui’-no bo káijak kha, tamni hwn ba bórok Israilrokno kubun mwtairokno khulum rwnai.

³Solomon khorok snira Isirino káijak kha tei khorok thamra hik kotoi na kha, bórok bono Kaitor bai kak rw kha,

⁴tei bo umor chakra phuru khe bono buini hani mwtairokno khulum rw kha. Bupha Daud hai bo bini Subraiyung Kaitorni thani khir khir khe tong li ya.

⁵Bo Sidonni mwtaijwk Astarteno tei Milkom Ammonsarokni selengmasingcha mwtaino khulum kha.

⁶Bo Subraiyungni thani sumsok khlai kha, bo bupha Daud hai Subraiyungni thani sói khe tong li ya.

⁷Jerusalemni salkabaini hathái-o, bo Moabni selengmasingcha mwtai Kemosno khulumna bagwi khulumthai snam kha tei Ammonni selengmasingcha mwtai Milkomno khulumna bagwibo snam kha.

⁸Bo omo haibo snam kha, buini hani bihiksong bórokni sakni mwtaino satrai sókjaknai tei ratharwi khulumjaknai háyárok snam kha.

⁹Subraiyung Solomonno belai khe jolijak kha, tamni hwn ba bo Israilni Subraiyung Kaitorni aroni bwkha kiphil kha, bo bo bai uáinwi nukjak kha.

¹⁰Omorokno tẃiwi bono dagi kha, nwng tei kubun mwtairokni thani ta tháng di. Tamo khe bo Subraiyung dagimano khna li ya,

¹¹tei Subraiyung bono sa kha, nwng sakni muchung tẃino nwng ani swmaino narwk li ya tei ani dagimarokno narwk li ya, ang swmai tangwi sa-o, nini hano segwi ang nini tẃiphangno se rwnai.

¹²Hai phano nwpha Daudni jarwi nwng kwthang tongsani ang omo hai khlai glak; tamo khe nwsla bugra cháui tong phuru se bini yakni hano swkaknai.

¹³Phiya ang hani bebak le bini yakni na bai glak, hai wng yaui ang ani seleng Daudni bagwi bosong kaisano bono yakarwi rw anw tei ani bagwi snamjakma Jerusalem kamiyungni bagwibo abo kaisa yaphar anw.

¹⁴Hakhe Idomni bugrani núkhungni Hadadno, Subraiyung Solomonno kebeng rwnai bagwi bacha rw kha.

¹⁵Daud Idomo tong phuru, sengkrak bokhorok Joab butharjakrokno phobna bagwi tháng kha, bo Idomni bebak chwlarokno buthar kha.

¹⁶Tamni hwn ba Joab bai tei bebak Israilrok bebak chwla bwsarokno buthar bai yasak’-no Idomo taldok jora tong kha.

¹⁷Tei Hadad bai bini bupha Idomni seleng Ijibo khárwi thángnairok simi se butharjak li ya. A jora-o Hadad kwlwi bwsa si kho.

¹⁸Bórok Midian yakarwi Parano tháng kha, aro kisa borok bórok bai baksa manjagwi kha. Hakhe bórok Ijibo tháng kha tei Ijipni bugra bai malai kha, habugra Hadadno kisa ha, nok tei chámung rw kha.

¹⁹Hadad bugra Pharao bai kiching halok wng lai kha tei habugra Hadadno bini buprangjwk Isiri Tapenesni bahanok bai kái kha.

²⁰Bo bwsa chwla khoroksa bá kha, mung khe Genubat bo Pharaoni noyungo Isiri bai se tor rwjago, aro bo bugrani bwsarok bai se tongo.

²¹Ijibo Hadadni thani Daud thwimani kók tei sengkrak bokhorok Joabbo thwi kha hwnwi kók sógwi khe’-no, Hadad bugrano hai hwnwi sa kha, “Ang ani sakni ha-o tháng sinai.”

²²“Tamo wngwi thángnai?” hwnwi Pharao sẃng kha. “Ang ba tamo nono mungsa swk biyal wng lang? Aboni bagwi da nwng nogo kiphilwi thángna nai tong?” Hakhe Hadad hai hwnwi sa kha, “Mungsa phano biyal wng ya, haino tháng gra si anw.”

²³Eliadani bwsla Rejonno Kaitor Solomonno kebeng rwui bacha rw kha. Bo bini nokphang Jobani habugra Hadadejerni aroni khárwi thángnai.

²⁴Daud Jobani sengkrakrokno butharwi tong phuru Rejon kisa bororokno thumwi sekpronai dagait bodolni bokhorok wng kha. Bórok Damaskosno segwi na kha tei bono habugra chong lai kha.

²⁵Solomon kwthang tongsakno bo Israilrokni kebengnai ari wngwi tong kha tei Hadad khlaima hai samung sitra khlai kha; hakhe bo Israilrok bai kena ari khe Siriyani habugra wngwi tong kha.

²⁶Tei khoroksa bugra Solomonno kebengwi bachanaini bere khoroksa khe bini tẃiphangno Nebatni bwsla Jeroboam, bo wng kha Ephraimsa Seredani buma wng kha randijwk, bini mung Jerua.

²⁷Omono kebengwi bachamani kothoma. Solomon Jerusalemni salkabaino muthubwi tono tei kamiyungni chok deualrokno snam phirwi tongo.

²⁸Jeroboam khe belai chúkjak borok, Solomon bono samung tangkrak sikla nugwi Josepni bosongni saka-o phan khe samung tang rwna bagwi barja rw kha.

²⁹Jeroboam Jerusalem yakarwi tháng phuru, Silosa diyari Ahiano lama-o malai kha. Ahia khe kamchwlwi kwtal chumjak. Bórok khoroknwino aphuru hapharo saichung susuk.

³⁰Ahia bo chummani kamchwlwi kwtal khugwi abono chikhak chinwi khe chir kha.

³¹Aphuru khe bo Jeroboamno sa kha: Nwng nini banta chikhakchi na di; tamni hwn ba Subraiyung Israilni Kaitor ahai hwnwi sa-o, “Nai di ang Solomonni yakni hano segwi nanani naiwi tong kha tei ang nono bosong kaichirokno nini yago rwnai.

³²Ani seleng Daud tei Israil hani kamiyungrokni bisingo saiwi najak Jerusalemni bagwi bosong kaisano khe bini yago’-no tongnai.

³³Tamni hwn ba bo ano khibi kha tei mwtai Sidonrokni mwtaijwk Astarte, Moabni mwtai Kemos, Ammonsarokni mwtai Milkomno khulumui ani lama tẃi tong yaui bupha Daud tongma hai khe tong yaui ani dagimungrokno tei raidarokno rákhok li ya.

³⁴Hai phano ang Solomonni yakni bebak hano na glak, tamo khe bo kwthang tong sak bini yago’-no ha tonnai, tamni hwn ba ang chongmani ani seleng Daud bo ani dagimungrokno tei kerongrokno tẃi kha;

³⁵tamo khe ang bwslani yakni hano naui páinai tei abono nono rwnai, bórokno a bosong kaichirok.

³⁶Tamo khe ang bwslani yago bosong kaisa rwnai, hakhe ani seleng Daudni bosong ani bwskango Jerusalemo chati wngwi tongnai, a kamiyungno ani mung rwui saiwi na kha.

³⁷Jeroboam ang nono Israilni habugra khlainai tei nwng naimani bebak angkorno nini yapha-o wngnai.

³⁸Tumung nwng ani kók narwk súk khe, ani kerong tẃi tong khe tei ani dagima tẃi khlai khe, ani seleng Daud khlai langma tẃi khlai khe ang nwng bai máng tongnai tei nini bosong bugra chánai, ang habugra Daudno khlai tẃi’-no wngnai.

³⁹Tamo khe Solomonni sumsokni bagwi Daudni bosongno sátoknai, tamo khe mol brúmni bagwi ya.”

⁴⁰Hakhe Solomon Jeroboamno butharna nai kha, tamo khe bo Ijipni bugra Sisakni ha-o khárwi tháng kha, Solomon thwi yasakno bo aro tongwi kha.

⁴¹Solomon khlaima bebakni kók bini tongmungni kók tei elemni kók, simungni kókrok Solomonni láibuma bijabo bebak tisaui narwkjak kha.

⁴²Bo nokha bisi brwichi jora Israil gwnangwini habugra wng kha.

⁴³Bo thwi kha tei Daudni kamiyungo phobjak kha tei bini yakchu-o bwsla Rehoboam bugra chá kha.