Read Kok Borok 1 HABUGRA 13 Bible Online

1 HABUGRA 13 - Kok Borok bible

1 HABUGRA 13

¹Nai di Judani Kaitorni borok khoroksa Subraini kók tubu-ui Bethelo tháng kha. Jeroboam khe háyá bwskango satrai sókna bagwi bachaui tongo.

²Subraiyungni dagimano rwksaui diyari kiphilwi hai hwnwi sa kha; “O háyá, o háyá, Subraiyung o kók sa-o chwrai khoroksani bumung Josia wngnai, bo Daudni bosongo achainai. Bo nini thani ratharnai, poito kwrwini háyá-o ratharnai ochairok bórok nini thani borok bekrengrokno sóknai.”

³Diyari khúk thak yaui hai hwnwi sa kha, “O háyá pekhagwi khaknwi wngnai tei aro thaplarok lukhlaijaknai. Hakhe nwng saui man anw Subraiyung ani bising tẃi kók sa kha.”

⁴Hakhe habugra Kaitorni borokBethelni háyá-o tongwi samani a kókno khna khe bugra Jeroboam omono khna khe’-no, bo bono yasi surwi, “A borokno rom di,” Hwnwi dagi kha. aphuru khe bugrani a yak hoichaui tháng kha, phiya bo a yakno tikhlai tubu-ui man phi li ya.

⁵Achomsa háyá klaiwi khakjak kha tei thapla ha-o klaiwi tháng kha, abo Subraiyungni mungwi diyari sama tẃi’-no

⁶bugra Jeroboam diyarino hai hwnwi sa kha, “Nini Subraiyung Kaitorni thani ani yakno ham rwui rw di hwnwi kisa suri san gra di!” Diyari Subraiyungni thani suri kha, hakhe bugrani yakrok ham kha.

⁷Hakhe bugra diyarino hai hwnwi sa kha, “Ang bai nogo phai ja di tei kisa chá phai ja di. Nini samungni bagwi ang nono hili rwnai.”

⁸Phiya a borok bugrano hai hwnwi sa kha, “Nini rang-rírokni khaksa ano rw phano ang nwng bai bo tháng ya tei oro nwng bai chábo chá ya tei nubo nung ya.

⁹Subraiyung ano ta chá di tei ta nung di hwnwi dagi kha tei ang phaimani a lama tẃibo nogo ta kiphil di hwnwi sa-o.”

¹⁰Aboni bagwi bo Bethelo phaimani a lama tẃi nogo kiphil li ya tei twngsa lama tẃi se kiphil si-o.

¹¹A jora-o diyari chakra khoroksa tongo. Bwsarok phaiwi Judani diyari Bethelo a salo khlaimano sa phai kha tei bugra Jeroboamnobo saui khna rw kha.

¹²“Bo tháng phuru bu lama tẃi kiphil kha?” Hwnwi a chakra diyari bórokno sẃng kha.

¹³Bórok bono a lamano phunuk kha; tei bórok’-no bini koraino tiyar khlai kha tei bo kasaui lam rw kha.

¹⁴Lama-o Judai diyarino uk buphang yaphango achukjak nuk kha. “Nwng da Judani diyari?” Hwnwi bo sẃng kha. “I’n ang’-no,” hwnwi bo sa kha.

¹⁵“Ang bai nogo phai di tei ang bai kisa chá phai ja di,” hwnwi bo koi kha.

¹⁶Tamo khe bo hai hwnwi sa kha, “Ang nwng bai nogo thángwi man ya, nini kobokmano yachagwi man ya. Ang oro nwng bai mungsa cháuibo man ya tei nungwibo man ya,

¹⁷tamni hwn ba Subraiyung ano ‘Mungsa phano tabo ta chá di, tabo ta nung di tei tabo ta tang di, phiya ang phaima lama tẃibo ta kiphil di’ hwnwi dagi kha.”

¹⁸Hakhe Bethelni a diyari bono hai hwnwi sa kha, “Angbo nwng haino diyari tei Subraiyung bai dagijagwi suari khoroksa ano sa phai kha, nono tlangna bagwi tei nono nograi kasa rwna sa kha.” Tamo khe a diyari chakra tatal se sa-o.

¹⁹Hakhe Judani diyari a diyari chakra bai nogo tháng kha tei bo bai chá lai kha tei twibo nung lai kha.

²⁰Bórok maikhlai-o achuk laiwi tong phuruno, a diyari chakrani thani Subraiyungni kók sók phai kha,

²¹tei bo Judani diyarino hai hwnwi chirigwi sa kha, “Subraiyung sa-o nwng bini kók khna li ya tei bo dagima tẃi khlai li ya.

²²Hai wng yaui nwng kiphilwi phai di, ta chá di ta nung di hwnmano thángwi cháui kha nungwi kha. Aboni bagwi nini mang nini núkhungni simalwngo phobjak glak.”

²³Bórok chá lai phai khe, a diyari chakra Judani a diyarini bagwi a koraino tiyar khlai kha,

²⁴bo kasaui tháng kha. Lama-o singho masa malai kha tei bono uáthar kha. Bini mang lama-o klaiwi tong kha tei aboni gana-o khe korai bai singho bacha laijak.

²⁵A lama tẃi thángnairok a mangno lama klaijak tei korai bai singhono bachajak nuk khe, Bethelo diyari chakra tongma-o thángwi sógwi khe bórok nukmano saui lai kha.

²⁶A diyari chakra abo khna kheno bo hai hwnwi sa kha, “Abo wng kha Subraiyungni dagima khna ya wngnai a diyari se! Aboni bagwi Subraiyung singho rohorwi bono uár rw kha.”

²⁷Aphuru a diyari bwslano hai hwnwi sa kha, “Ani bagwi korai tiyar khlai di.” Hakhe bórokbo tiyar khlai kha.

²⁸Bo kasaui tháng kha tei lama-o a diyarini mangno klaijak nugwi kha. A korai bai singho tabukbo bachajak. A singho a mangnobo chá ya tei a korainobo mungsa khlai ya.

²⁹A diyari chakra mangno khochaui korai saka-o boksa kha tei Bethelo aboni bagwi khá khamnani tei bono phobna tubu kha,

³⁰bo bini núkhungni mangkhoro’-no phob kha, bo tei bini bwsarok bini bagwi hai hwnwi kap lai kha, “O ani takhuk o ani takhuk!”

³¹Bono phob bai khe bo bwsarokno hai hwnwi sa kha, “Ang thwi khebo o mangkhoro’-no bini gana-o khe ano phob di. Ani bekrengbo bini bekreng bai tong thung.

³²Tamni hwn ba Subraiyung dagima bai bo Bethelni háyáni bagwi tei Samaria kamiyungrokni bagwi, khulumthairokni kók sakhlaiwi manna se nangnai.”

³³Israilni bugra Jeroboam tabukbo a lama hamyani kiphil ya kho tei bo borok bángla núkhungni máng se tongma háyá-o khulumna bagwi ochai chongwi tong kho. Ochai wngna muchungnaino naui’-no bo ochai chongo.

³⁴A samungrokno bini sumsok tei bono hani kwmaui tei ha sakanini komorna lama wngo.